Aptap ystyqtan Frantsııada segiz ıadrolyq reaktordyń qýaty tómendetildi
ASTANA. KAZINFORM – Frantsııanyń EDF energetıkalyq kompanııasy aptap ystyqqa baılanysty úsh ıadrolyq reaktordyń jumysyn ýaqytsha toqtatyp, taǵy segiz reaktordyń qýatyn tómendetti, dep habarlaıdy Le Parisien basylymy.
Mundaı sheshim ózenderdegi sý temperatýrasynyń ruqsat etilgen deńgeıden asyp ketýine baılanysty qabyldandy.
Le Parisien basylymynyń málimetinshe, shekteýler «Golfesh», «Bıýje» jáne «Sho» atom elektr stantsııalaryndaǵy reaktorlarǵa qatysty engizildi. Sonymen qatar «Sent-Alban», «Blaıe», «Bıýje», «Sho» jáne «Trıkasten» AES-terindegi birneshe reaktordyń qýaty azaıtyldy.
Frantsııanyń ekologııalyq talaptaryna sáıkes, reaktorlardy salqyndatýǵa paıdalanylatyn ózen sýynyń temperatýrasy kóterilgen jaǵdaıda operator energııa óndirý kólemin qysqartýǵa nemese reaktorlardy ýaqytsha toqtatýǵa mindetti. Bul ózenderdiń qyzyp ketýine jol bermeı, jergilikti ekojúıeni qorǵaý úshin jasalady.
Eske salsaq, maýsym aıynda EDF aptap ystyqqa baılanysty eki ıadrolyq reaktordyń jumysyn ýaqytsha toqtatqan bolatyn. Ol kezde de mundaı shekteýler qorshaǵan ortaǵa túsetin salmaqty azaıtý maqsatynda engizilgen.
23 maýsymda Frantsııada 1947 jyldan bergi meteobaqylaý tarıhyndaǵy eń ystyq kún tirkelip, táýliktik ortasha temperatýra 30 gradýsqa jetti. Aptap ystyq saldarynan Eýropanyń birqatar óńirinde ondaǵan adam qaza taýyp, elektrmen jabdyqtaý, mektepter men týrıstik nysandardyń jumysy buzylǵan edi.
Aıta keteıik, buǵan deıin Frantsııada ormandy qasaqana órtedi degen kúdikpen 32 adamnyń ustalǵany habarlandy.
