Aptap ystyqta jıi sý iship, kókónisti kóbirek jegen durys – dáriger
QYZYLORDA. KAZINFORM – Shilińgir shildeniń mı qaınatar ystyǵy kim-kimge de qıyn bolyp tur. Bul kúnder, ásirese, náresteler men balalar, egde jastaǵy adamdar, júkti áıelder, sondaı-aq júrek-qan tamyry, tynys alý júıesiniń aýrýy, qant dıabeti bar naýqastar úshin óte qaýipti.
Dárigerler sondyqtan olarǵa kún shaqyraıyp turǵan kezde dalada júrmeýge keńes beredi. Saǵat 11 men 17 aralyǵynda múmkindiginshe kóleńkede nemese salqyn jerde bolǵan durys dep esepteıdi.
- Aýa temperatýrasynyń shamadan tys kóterilýi aǵzanyń jylý almasý júıesine kúsh túsiredi. Sonyń saldarynan adam tez sharshaıdy, álsizdik, bastyń aınalýy men aýrýy baıqalyp, júrek qaǵysy jıileýi múmkin. Keıbir jaǵdaıda basynan kún ótip, esten tanýy da ǵajap emes. Sondyqtan ystyq kúnderi densaýlyqqa erekshe mán bergen abzal. Kúni boıy jetkilikti mólsherde taza sý iship, jeńil ári ashyq tústi kıim kıgen jón. Bas kıimdi umytpaý kerek. Maıly ári qorytylýy qıyn taǵamdardy azaıtyp, kókónis pen jemis-jıdekti kóbirek tutynýǵa shaqyramyn, - dedi Qyzylorda qalasyndaǵy №3 emhananyń dárigeri Nılýfar Hasanova.
Maman kún ótkenin qalaı bilýge bolatyny týraly az-kem aıtyp berdi.
- Kún ótken kezde adamnyń dene qyzýy kóterilip, basy qatty aýyrady. Júregi aınıdy, qusady, álsireıdi, basy aınalady. Keıde esinen tanyp qalýy múmkin. Mundaı jaǵdaıda naýqasty dereý kóleńkege nemese salqyn jerge aparyp, kıimin jeńildetip, sý berip, denesin salqyndatý qajet. Eger jaǵdaıy jaqsarmasa, mindetti túrde jedel medıtsınalyq kómekke júginý kerek, - dedi ol.
Dáriger sozylmaly syrqatqa shaldyqqan jandarǵa dáriger taǵaıyndaǵan em-domdy úzbeı qabyldap, qan qysymy men jalpy jaǵdaıyn baqylap júrý kerek ekenin jetkizdi. Qajet bolǵan jaǵdaıda emdeýshi dárigerdiń keńesine júgingen durys. Aptap ystyqtyń beti qaıtqansha aǵzaǵa artyq kúsh túsiretin jumystarǵa jolamaýǵa keńes berdi.
- Qaýiptiń aldyn alý árkimniń óz qolynda. Árbir adam densaýlyǵyna jaýapkershilikpen qarap, qarapaıym saqtyq sharalaryn saqtasa, jaz mezgilin qaýipsiz ári jaıly ótkize alady. Ózderińizdi ǵana emes, jaqyndaryńyzdy, ásirese, balalar men qarttardy nazardan tys qaldyrmańyzdar, - dedi Nılýfar Hasanova.
Buǵan deıin Qazgıdromet málimdegendeı, Qyzylorda oblysynda jaýyn-shashynsyz ári qatty ystyq aýa raıy 18-19 shildege deıin jalǵasady.
