Aptap ystyqta Kaspıı sýy nege salqyn bolady: ǵalym sebebin aıtty
AQTAÝ. KAZINFORM — Aqtaý jaǵalaýyndaǵy teńiz sýy jazdyń qaq ortasynda da salqyn bolýy múmkin. Onyń temperatýrasyna aýa raıymen qatar jel, teńiz aǵystary jáne tereń qabattardaǵy sýyq sýdyń joǵary kóterilýi áser etedi.
Bul týraly Kaspıı teńizi ǵylymı-zertteý ınstıtýty tóraǵasynyń orynbasary Saltanat Sadvakasova aıtty.
Kaspııdiń shyǵys jaǵalaýyna tán qubylystardyń biri — apvellıng, ıaǵnı tereń qabattaǵy sýyq sýdyń jer betine kóterilýi.
Mamannyń málimetinshe, bul qubylys Aqtaý mańynda da ǵylymı zertteýler arqyly rastalǵan. Apvellıng shilde jáne tamyz aılarynda neǵurlym qarqyndy baıqalady. Jekelegen jaǵdaılarda qubylys birneshe kúnge sozylyp, jaǵalaýdaǵy sý temperatýrasynyń aıtarlyqtaı tómendeýine ákelýi múmkin. Sondyqtan aýa temperatýrasynyń joǵary bolýy teńiz jaǵasyndaǵy sýdyń da jyly bolatynyn bildirmeıdi.
— Kaspıı — dınamıkalyq sý aıdyny. Jaǵalaýdaǵy sý temperatýrasyna bir mezette birneshe faktor áser etedi. Olardyń qatarynda jel rejımi, teńiz aǵystary, teńiz túbiniń bederi jáne sý massalarynyń tik baǵytta aralasýy bar. Jazdyń qaq ortasynda aýa temperatýrasy joǵary bolǵannyń ózinde jaǵalaýdaǵy sý salqyn bolýy nemese birneshe kúnniń ishinde kúrt sýyp ketýi múmkin, — deıdi maman.
Kaspıı teńizi ǵylymı-zertteý ınstıtýty ókiliniń túsindirýinshe, Aqtaý mańyndaǵy sý temperatýrasy tek jergilikti aýa raıynyń áserinen qalyptaspaıdy. Oǵan belgili bir ýaqytta jaǵalaýǵa qandaı sý massalarynyń jaqyndaǵany jáne teńizde qandaı protsesterdiń júrip jatqany da yqpal etedi.
Sondyqtan Aqtaýǵa keletin turǵyndar men týrıster tek aýa temperatýrasyna nemese kúntizbedegi aıǵa qarap, teńiz sýynyń jaǵdaıyn baǵalamaǵany jón. Birneshe kún qatarynan kún ystyq bolǵannyń ózinde sý salqyn kúıinde qalýy nemese qysqa merzim ishinde temperatýrasy aıtarlyqtaı ózgerýi múmkin.
Buǵan deıin, Kaspııdiń kózge kórinbeıtin tirshiligin taspaǵa túsirip júrgen aqtaýlyq snorkler týraly jazǵan bolatynbyz.
