Aptap ystyqta beton joldar nege deformatsııalanady: mamandar túsindirdi
ASTANA. KAZINFORM — Qazaqstanda aýa temperatýrasynyń kúrt kóterilýine baılanysty tsementbeton jabyndary bar avtomobıl joldarynda temperatýralyq deformatsııalar paıda bolýy múmkin. Bul týraly QR Kólik mınıstrliginiń Jol aktıvteri sapasynyń ulttyq ortalyǵy málimdedi.
Keıingi aptalarda elimizdiń birqatar óńirinde aýa temperatýrasy +35…+40 gradýsqa deıin jetip, keı jerlerde +40 gradýstan asty. Mamandardyń aıtýynsha, mundaı kezde jol jamylǵysynyń temperatýrasy aýa temperatýrasynan áldeqaıda joǵary bolyp, +60…+70 gradýsqa deıin kóterilýi múmkin.
Joǵary temperatýra áserinen tsementbeton plıtalary tabıǵı túrde ulǵaıady. Sonyń saldarynan jol konstrýktsııasynda ishki qysym paıda bolyp, belgili bir shekke jetken jaǵdaıda plıtalardyń kóterilýi nemese qısaıýy sııaqty deformatsııalar bolýy yqtımal.
Ulttyq ortalyq mundaı qubylys tsementbeton joldarynyń paıdalaný erekshelikteriniń biri ekenin atap ótti. Bul jaǵdaı álemniń kóptegen elderinde, sonyń ishinde AQSh, Kanada, Germanııa, Ulybrıtanııa, Ońtústik Koreıa jáne Avstralııada da tirkelgen.
Mamandardyń túsindirýinshe, mundaı ózgerister beton sapasynyń tómendigin nemese qurylys tehnologııasynyń buzylǵanyn bildirmeıdi. Negizgi sebep — aptap ystyq kezinde beton plıtalarynyń jylýlyq ulǵaıýynan týyndaıtyn ishki kerneýlerdiń jınalýy.
Qazir Qazaqstandaǵy jol uıymdary tsementbeton jabyndary bar joldarǵa táýlik boıy monıtorıng júrgizip jatyr. Anyqtalǵan aqaýlar qoldanystaǵy talaptarǵa sáıkes jedel túrde jóndeledi.
— Ekstremaldy temperatýra jaǵdaıynda paıda bolatyn jekelegen deformatsııalar álemdik paıdalaný tájirıbesinde kezdesetin boljamdy faktor bolyp esepteledi, — dep habarlady vedomstvo.
Eske salaıyq, buǵan deıin eldiń shyǵysy men ońtústiginde aptap ystyq saqtalatynyn habarlaǵanbyz.
