Aptap ystyqta aýyr júk kólikteriniń qozǵalysyna shekteý engizildi
ACTANA. KAZINFORM - Qazaqstan Respýblıkasynyń aýmaǵynda 10 shilde men 10 tamyz aralyǵynda iri gabarıtti jáne aýyr salmaqty júkterdi tasymaldaýǵa baqylaýdy kúsheıtýge, sondaı-aq avtomobıl joldarynyń saqtalýyn qamtamasyz etý maqsatynda «Nazar aýdaryńyz! Aýyr salmaqty kólik!» profılaktıkalyq aktsııasy ótip jatyr.
Sonymen qatar elimizde jol tóseminiń joǵary temperatýra áserinen búlinýiniń aldyn alý maqsatynda júk avtokólikteriniń qozǵalysyna ýaqytsha shekteý qoıatyn maýsymdyq temperatýralyq rejım qoldanylady.
QR Kólik mınıstrligi baspasóz qyzmetiniń habarlaýynsha, temperatýralyq shekteýler aýa temperatýrasy +25 °C-tan joǵary bolǵan kezde engiziledi jáne júk kólikteriniń jekelegen sanattaryna qoldanylady.
Bul rette halyqaralyq jáne jolaýshylar tasymalyn júzege asyratyn kólik quraldaryna, tez buzylatyn, qaýipti jáne gýmanıtarlyq júkterdi tasymaldaıtyn kólikterge, sondaı-aq tótenshe jaǵdaılardyń saldaryn joıýǵa, jol jumystaryn júrgizýge jáne áskerı tasymaldarǵa tartylǵan avtokólikterge atalǵan shekteýler qoldanylmaıdy.
Salmaqtyq-gabarıttik parametrlerdiń saqtalýyn jáne temperatýralyq rejım talaptarynyń oryndalýyn Kóliktik baqylaý komıtetiniń aýmaqtyq organdary qamtamasyz etedi.
-Ótkizilip jatqan is-sharalar aıasynda 500-den astam aýyr salmaqty avtokólik quraly tekserildi. Nátıjesinde kólik zańnamasynyń 281 buzýshylyǵy, onyń ishinde 116 artyq júk tıeý deregi anyqtaldy. Sonymen qatar maýsymdyq temperatýralyq rejım talaptaryn saqtamaýyna baılanysty 302 júk avtokóliginiń qozǵalysyna shekteý qoıyldy. Anyqtalǵan barlyq quqyqbuzýshylyqtar boıynsha tasymaldaýshylar Qazaqstan Respýblıkasynyń qoldanystaǵy zańnamasyna sáıkes ákimshilik jaýapkershilikke tartyldy,-delingen habarlamada.
Qazaqstan Respýblıkasy Kólik mınıstrligi tasymaldaýshylardy qoldanystaǵy maýsymdyq shekteýlerdi eskere otyryp, marshrýttary men qozǵalys kestesin aldyn ala josparlaýǵa shaqyrady.
Osyǵan deıin QazAvtoJol aýyr júk kóligi júrgizýshilerine mańyzdy eskertý jasaǵan bolatyn.
