Aptap ystyqta Almatyda jedel járdem shaqyrtýy kóbeıdi

Almaty qalalyq Qoǵamdyq densaýlyq saqtaý basqarmasynyń málimetinshe, shildeniń alǵashqy eki aptasynda jedel járdem qyzmetine 33,6 myńnan astam shaqyrtý túsken. Sonyń 1,5 myńǵa jýyǵy qan qysymynyń kóterilýine baılanysty bolsa, 300-den astamy júrek-qan tamyrlary aýrýlaryna, onyń ishinde júrektiń ıshemııalyq aýrýy men jedel mıokard ınfarktine baılanysty bolǵan. Sonymen qatar mı qan aınalymy jedel buzylǵan 50-ge jýyq naýqas shuǵyl túrde qalalyq aýrýhanalarǵa jetkizilgen.

Aldyńǵy kezeńmen salystyrǵanda, kún ótýge baılanysty jedel járdem shaqyrtýy eki ese artqan.

Dárigerlerdiń aıtýynsha, aptap ystyq ásirese qart adamdar, balalar, júkti áıelder jáne sozylmaly aýrýy bar naýqastar úshin qaýipti.

Almaty qalalyq Jedel medıtsınalyq járdem qyzmeti dırektorynyń mindetin atqarýshy Azamat Qurmanbekovtiń aıtýynsha, ystyq kúnderi júrek-qan tamyrlary júıesine túsetin salmaq artady.

– Aýa temperatýrasynyń kóterilýi qan qysymynyń kúrt ózgerýine, júrek yrǵaǵynyń buzylýyna jáne entigýge ákelýi múmkin. Sondaı-aq ınfarkt pen ınsýlt qaýpin arttyrady, – dedi ol.

Basqarma málimetinshe, aptap ystyq aǵzanyń sýsyzdanýyna, taǵamnan ýlanýǵa, ishek ınfektsııalaryna shaldyǵýǵa sebep bolýy múmkin. Sonymen qatar maýsymdyq allergııa belgileri de kúsheıedi.

Sondyqtan sozylmaly aýrýy bar adamdar dárigerdiń nusqaýyn buljytpaı oryndap, dári-dármegin ýaqytynda qabyldaýy kerek. Sondaı-aq qan qysymy men qandaǵy qant deńgeıin baqylap, kúnniń ystyǵynda uzaq júrmeı, josparly dáriger qabyldaýyn ótkizip almaýy qajet.

Almatydaǵy emhanalar sozylmaly aýrýy bar naýqastardy baqylaýda ustap, qajetti dári-dármekpen qamtamasyz etip keledi. Dárigerler densaýlyq syr bergen jaǵdaıda asqynýdy kútpeı, ýchaskelik dárigerge der kezinde qaralýǵa keńes beredi.

Mamandar saǵat 11:00 men 17:00 aralyǵynda kúnniń astynda uzaq júrmeýge shaqyrady. Sondaı-aq tabıǵı matadan tigilgen jeńil kıim kıip, bas kıim men kúnnen qorǵaıtyn kózildirik taqqan durys.

Dárigerler jetkilikti mólsherde sý ishýdi de usynady. Medıtsınalyq qarsy kórsetilimi joq eresek adamǵa táýligine keminde eki lıtr sý ishý qajet. Al alkogoldi ishimdikterdi, tátti gazdalǵan sýsyndar men kofeni tutynýdy shektegen jón.

Eger adamnyń basy qatty aýyryp, basy aınalsa, álsirese, júregi aınyp, esi shatassa, dene qyzýy kóterilse nemese esinen tanyp qalsa, ony dereý salqyn jerge aparyp, denesin salqyndatyp, sýdy az-azdan ishkizip, jedel járdem shaqyrý kerek.

Eske salaıyq, «Qazgıdromet» RMK boljamyna sáıkes, Almaty oblysynyń taýly aýdandarynda ótkinshi jańbyr jaýyp, naızaǵaı oınaýy múmkin. Batystan soǵatyn jeldiń ekpini taýly óńirlerde 15–20 m/s-qa deıin jetedi. Kúndiz aýa temperatýrasy 35–38 gradýsqa deıin kóteriledi. Óńirde tótenshe órt qaýpi saqtalady.