Aptap ystyqqa baılanysty úlken tasjoldarda polıtsııa kúsheıtilgen rejımde qyzmet etýde

ASTANA. KAZINFORM — Aqmola oblysynda polıtsııa qyzmetkerleri aptap ystyqta jolǵa shyqqan júrgizýshilerge sý usynyp, jol qaýipsizdigine muqııat bolýǵa shaqyrýda. Bul týraly QazAqparat Polisia.kz saıty habarlady.

Aýa raıynyń kúrt ysýyna baılanysty Aqmola oblystyq patrýldik polıtsııa rotasynyń qyzmetkerleri respýblıkalyq mańyzy bar úsh baǵytta – Astana–Qaraǵandy, Astana–Pavlodar jáne Astana–Qabanbaı batyr–Temirtaý avtojoldarynda arnaıy profılaktıkalyq is-shara ótkizip jatyr.

– Kólik júrgizip kele jatyp sharshaý nemese uıqy qysý sezilse, jol shetine toqtap, tynyǵyp alǵan jón. Júrgizýshi men jolaýshylardyń ómiri – basty qundylyq. Kúnniń qatty ysýyna baılanysty biz beti-qoldy jýýǵa nemese salqyndaýǵa kómektesý úshin sý usynyp jatyrmyz, – dedi Aqmola oblysy PD patrýldik polıtsııa rotasynyń 1-vzvod komandıri Aıbek Tóleýbaev.

Polıtsııa qyzmetkerleri alys saparǵa shyǵar aldynda kólik quraldarynyń tehnıkalyq jaı-kúıin muqııat tekserýge jáne jolda tártip erejelerin qatań saqtaýǵa keńes beredi. Sondaı-aq olar azamattardy óz densaýlyǵyna da jaýapkershilikpen qaraýǵa shaqyrady.

– Qurmetti júrgizýshiler, sizderdi úıde otbasyńyz kútip otyr. Sondyqtan jolda asyqpaı, demalyp otyryńyzdar. Polıtsııa árqashan sizdermen birge, – dep atap ótti vzvod komandıri.

Tártip saqshylarynyń aıtýynsha, mundaı aldyn alý sharalary, ásirese aptap ystyq kúnderi mańyzdy. Polıtsııa turǵyndardy jolda abaı bolýǵa jáne jaqyndaryn qaýipten saqtandyrýǵa úndeıdi.

Aıta keteıik, Qazgıdromet elimizdiń birqatar óńirinde aýa raıyna baılanysty eskertý jasady.