Aptap ystyq Shymkent - Taraz avtojolynyń jabynyn kóterip jibergen

TÚRKІSTAN. KAZINFORM – Túrkistan oblysynda respýblıkalyq mańyzy bar avtojolda anyqtalǵan aqaýlar jedel túrde joıyldy, dep habarlaıdy «QazAvtoJol» UK» AQ Túrkistan oblystyq fılıaly.

Monıtorıng barysynda jol mamandary «RF shekarasy (Jaısań ó/p) – Mártók – Aqtóbe – Qarabutaq – Qyzylorda – Shymkent – Taraz – Qordaı – Almaty – Qorǵas – QHR shekarasy (Nur joly ó/p)» baǵytyndaǵy respýblıkalyq avtojoldyń 635+500 shaqyrymynda (Shymkent–Taraz baǵyty) tsementbeton jamylǵysynyń kóterilgenin anyqtaǵan.

- Aqaýlardy joıý úshin jol qyzmeti dereý sharalar qabyldap, qysqa ýaqyttyń ishinde jóndeý jumystaryn aıaqtady. Oǵan 3 arnaıy tehnıka men 4 maman jumyldyryldy, - delingen aqparatta.

Aıta keteıik, óńirde sońǵy kúnderi aýa temperatýrasy +40...+45°S-qa deıin kóterilip, bul jol jabynyna áser etken.

Qazirgi ýaqytta jol qaýipsizdigin qamtamasyz etý maqsatynda mamandar tarapynan baqylaý jáne aldyn alý sharalary turaqty júrgizilýde.

Eske salaıyq, jańa týrıstik jol Sharyn shatqalyn «Tańbaly» qoryq-mýzeıimen baılanystyrady.