Aptap ystyq pen medýza: Frantsııadaǵy AES-ter qýatynyń besten biri isten shyqty
ASTANA. KAZINFORM – Frantsııada sársenbi kúni atom elektr stantsııalarynyń belgilengen qýatynyń 20%-dan astamy ýaqytsha qoljetimsiz boldy. Buǵan qurǵaqshylyq, aptap ystyq jáne medýzalardyń kóbeıýi sebep bolǵan, dep habarlaıdy Euronews.
Atom energetıkasy Frantsııadaǵy elektr energııasynyń shamamen 70%-yn qamtamasyz etedi. Bıyl aptap ystyq pen qurǵaqshylyq AES jumysyna birneshe ret kedergi keltirdi.
AFP agenttiginiń EDF energetıkalyq kontserniniń derekterine negizdelgen esebine sáıkes, sársenbi kúni atom energetıkasy qýatynyń 20,4%-y qoljetimsiz boldy. Bul «ekologııalyq shekteýler» men «qorshaǵan ortaǵa baılanysty syrtqy faktorlar» saldarynan tirkelgen jańa rekord.
Frantsııadaǵy 57 ıadrolyq reaktordyń 13-iniń jumysyna shekteý qoıyldy. Onyń segizi tolyǵymen toqtatylyp, taǵy beseýi tómendetilgen qýatpen jumys istedi.
Qýattyń aıtarlyqtaı tómendeýine Batys Eýropadaǵy eń iri Gravelines AES-indegi jaǵdaı áser etti. Ondaǵy alty reaktordyń beseýi tolyq nemese ishinara toqtatyldy. Buǵan salqyndatý júıesiniń sorǵylaryna medýzalardyń jınalyp qalýy sebep boldy.
EDF ókiliniń aıtýynsha, teńiz sýyn tartatyn sorǵy stantsııalaryna «birneshe tonna medýza» túsip, súzgi júıelerin bitep tastaǵan. Stantsııa jabdyqtaryn salqyndatý úshin Soltústik teńizdiń sýyn paıdalanady. Gravelines AES-inde dál osyndaı jaǵdaı bir jyl buryn da bolǵan.
Mamandar balyqty shamadan tys aýlaý, plastıkpen lastaný jáne klımattyń ózgerýinen teńiz sýynyń jylynýy medýzalardyń jappaı kóbeıýine qolaıly jaǵdaı týǵyzǵanyn aıtady.
Basqa AES reaktorlaryndaǵy toqtaý men qýattyń tómendeýine aptap ystyq pen qurǵaqshylyq sebep boldy. Ózenderdegi sý deńgeıiniń tómendeýi jáne temperatýrasynyń kóterilýi kezinde EDF qorshaǵan orta men bıoalýantúrlilikti qorǵaý úshin elektr energııasyn óndirýdi azaıtýǵa nemese tolyq toqtatýǵa májbúr bolýy múmkin.
Colombus Consulting kompanııasynyń energetıka jónindegi sarapshysy Nıkolıa Goldbergtiń aıtýynsha, ázirge Frantsııada elektr energııasynyń tapshylyǵy týyndamaıdy. Tamyzda elektr tutyný ádette tómendeıdi, al el elektr energııasynyń iri eksporttaýshysy bolyp qala beredi.
Alaıda sarapshy aldaǵy 20–30 jylda klımattyń jylynýyna baılanysty eski atom reaktorlaryn jańa jaǵdaıǵa beıimdeý Frantsııa energetıkasy úshin eleýli synaqqa aınalýy múmkin ekenin eskertti.
Aıta keteıik, buǵan deıin Frantsııadaǵy aptap ystyqqa baılanysty atom reaktorlary ýaqytsha toqtatylǵanyn jazdyq.
Sondaı-aq aptap ystyqtan Frantsııada segiz ıadrolyq reaktordyń qýaty tómendetilgeni habarlandy.
Al Shveıtsarııada aptap ystyq muzdyqtardyń kólemin kishireıtip, pishinen ózgertip jatyr.
