Aptap ystyq pen qurǵaqshylyq: BUU aldaǵy aptalarda El-Nıno kúsheıetinin eskertti
ASTANA. KAZINFORM — BUU aldaǵy aptalarda El-Nıno qubylysynyń qalyptasýy múmkin ekenin eskertti. Bul klımattyq qubylys álemde jańa temperatýra rekordtaryna, qurǵaqshylyqqa, sý tasqynyna jáne orman órtterine ákelýi múmkin, dep habarlaıdy BBC.
El-Nıno Tynyq muhıty ústindegi jelderdiń aınalymynyń ózgerýinen paıda bolady. Sonyń nátıjesinde jyly sý shyǵysqa qaraı taralyp, muhıt temperatýrasy men planetanyń biraz aımaǵynda atmosferalyq úderisterdi ózgertedi.
Mamandardyń aıtýynsha, qazir Tynyq muhıtynyń ortalyq bóliginde ádetten tys qatty jylynǵan sýdyń úlken aýmaǵy baıqalyp otyr. Keıbir aımaqtarda temperatýra qalypty deńgeıden Tselsıı boıynsha 6 gradýstan da joǵary. Bul jyly sý massasy birneshe júz metr tereńdikte taralyp jatyr jáne aldaǵy El-Nınonyń negizgi belgileriniń biri retinde qarastyrylyp otyr.
Ulybrıtanııa meteorologııalyq qyzmetiniń uzaqmerzimdi boljamdar bóliminiń jetekshisi Adam Skeıf iri klımattyq qubylys bolýy yqtımal ekenin aıtty.
— Biz qýatty El-Nıno bolatynyna senimdimiz. Onyń rekordtyq deńgeıge jetýi de múmkin, — dedi sarapshy.
BUU Bas hatshysy Antonıý Gýterrısh jańa El-Nıno jahandyq jylynýdyń saldaryn kúsheıtetini týraly eskertti. Onyń aıtýynsha, ekstremaldy aýa raıy qubylystary kúsheıip, kóp elge áser etýi múmkin.
El-Nıno ádette Ońtústik Amerıka, Avstralııa jáne Ońtústik-Shyǵys Azııanyń keıbir aımaqtarynda ystyq ári qurǵaq aýa raıyna ákeledi. Al álemniń basqa bólikterinde nóser jaýyn men sý tasqynynyń qaýpi artady. AQSh pen Afrıka elderiniń jekelegen aımaqtary da qaýip aımaǵynda bolýy múmkin. Klımattyń ózgerýi mıllıondaǵan adamdar aýyl sharýashylyǵymen aınalysatyn úndi mýssonyn da álsiretýi yqtımal.
Ekonomıkalyq saldary da asa aýyr bolady. Burynǵy El-Nıno kezeńderinde eginniń shyqpaı qalýy, azyq-túlik baǵasynyń qymbattaýy, taýar jetkizýdegi irkilister jáne álemdik ekonomıkadaǵy mıllıardtaǵan shyǵyny este qalǵan.
Ǵalymdar bolashaq El-Nınonyń naqty kúshin ázirge dál anyqtaý múmkin emes ekenin aıtady. Bul qubylys Tynyq muhıty ústindegi jelderge baılanysty, al olar — eń qıyn boljanatyn faktorlardyń biri.
Degenmen sınoptıkter jańa El-Nıno «sýper El-Nıno» deńgeıine jetpese de, onyń saldary aıqyn bolýy múmkin ekenin eskertedi. Sebebi ol qazirdiń ózinde qatty jylynǵan klımat jaǵdaıynda damyp jatyr.
Dúnıejúzilik meteorologııalyq uıym (DMU) El-Nıno 2026 jyldyń qalǵan bóliginde kúsheıe túsedi dep esepteıdi.
Aıta keteıik, buǵan deıin de El-Nıno kúsheıse, álemdi aptap ystyq kútip turǵany týraly habarlaǵan bolatynbyz.
