Aptap ystyq, órt qaýpi, kúshti jel: Qazgıdromet eskertý jasady
ASTANA. KAZINFORM — 23 maýsymda Qazgıdromet eldiń 16 oblysy men 3 megapolısinde aýa raıyna baılanysty eskertý jarııalady.
Sınoptıkterdiń boljamynsha, Qazaqstannyń birqatar óńirinde shańdy daýyl, naızaǵaı, burshaq, qatty jel jáne aptap ystyq kútiledi. Sonymen qatar órt qaýpi de joǵary bolýy yqtımal.
Astana qalasynda kúndiz shańdy daýyl soǵady. Jeldiń ekpini sekýndyna 15–20 metrge deıin jetedi. Aýa temperatýrasy 35–37 gradýsqa deıin kóteriledi.
Eldiń ońtústik jáne ortalyq óńirlerinde aptap ystyq kúsheıedi. Ásirese Túrkistan, Jambyl, Qyzylorda jáne Jetisý oblystarynda aýa temperatýrasy 38–41 gradýsqa deıin ysıdy.
Eń joǵary temperatýra Túrkistan qalasy men oblysynda tirkelýi múmkin. Munda synap baǵany 41 gradýsqa deıin kóteriledi.
Aqmola, Batys Qazaqstan, Qostanaı, Soltústik Qazaqstan, Ulytaý jáne Qaraǵandy oblystarynda jańbyr jaýyp, naızaǵaı oınaıdy. Keı jerlerde burshaq túsip, daýyldy jel men shańdy daýyl kútiledi.
Mańǵystaý, Qyzylorda jáne Qaraǵandy oblystarynyń jekelegen aýmaqtarynda shańdy daýyl bolýy yqtımal.
Shyǵys Qazaqstan, Abaı jáne Pavlodar oblystarynda qatty jel soǵyp, joǵary jáne tótenshe órt qaýpi saqtalady.
Sınoptıkter turǵyndarǵa kúnniń ystyq ýaqytynda uzaq ýaqyt dalada júrmeýge, órt qaýipsizdigi talaptaryn qatań saqtaýǵa keńes berdi.
Osyǵan deıin SQO-da aptap ystyqtyń kópjyldyq normadan 5 gradýsqa joǵary bolǵany týraly jazdyq.
