Aptap ystyq Germanııaǵa jetti

ASTANA. KAZINFORM – Frantsııa, Ispanııa jáne Ulybrıtanııany sharpyǵan aptap ystyq Germanııaǵa jetti. Sınoptıkterdiń boljamynsha, shildeniń 2-si kúni temperatýra sharyqtaý shegine jetip, Germanııanyń ońtústiginde 40°C shamasynda, al eldiń basqa óńirlerinde 35°C jáne odan joǵary bolady, dep habarlaıdy DW.

Eýropadaǵy anomaldi ystyq – «jańa qalyp»

Ispanııa men Portýgalııa shekarasyndaǵy El-Granado qalasynda 30 maýsymda aýa temperatýrasy +46°C-qa deıin kóterildi. Bul – Ispanııadaǵy jazdyń alǵashqy aıyna tirkelgen eń joǵary kórsetkish. Eldiń birneshe aımaǵynda dabyldyń qyzyl deńgeıi jarııalandy.

Osy rekordtyq ystyq aıasynda Sevılıa qalasynda BUU-nyń damý qarjylandyrýy jónindegi konferentsııasy ótti. Oǵan BUU Bas hatshysy Antonıý Gýterrısh te qatysty.

– Aptap ystyq endi sırek qubylys emes – ol jańa qalypqa aınaldy. Jer shary barǵan saıyn ysyp, qaýipti bolyp barady – bul qaterden eshbir el saqtandyrylmaǵan, – dep jazdy ol H platformasynda.

Gýterrısh klımattyń ózgerýine qarsy batyl áreketke shaqyrdy.

Frantsııada 400 gektar orman órtendi

Jerorta teńiziniń ońtústik-batys jaǵalaýyndaǵy Oksıtanııa aımaǵynda qatty ystyqtyń saldarynan shyqqan orman órti 400 gektar aýmaqty kúlge aınaldyrdy. 1 shilde, seısenbi kúni Parıjde jáne taǵy 15 departamentte aptap ystyqqa baılanysty dabyldyń qyzyl deńgeıi jarııalanady.

Frantsııanyń energetıkalyq aýysym mınıstri Anes Pane-Rıýnashe eldegi aýa raıyn «kóz kórip, qulaq estimegen qubylys» dep atady.

Eń ystyq Ýımbldon

30 maýsym kúni Londonda +30°C shamasyndaǵy ystyqta áıgili Úlken dýlyǵa tennıs týrnıri – Ýımbldon bastaldy. Bul – jarys tarıhyndaǵy eń ystyq alǵashqy kún retinde tirkeldi.

Buǵan deıin álemdegi eń qurǵaq shólge qar túskenin jazdyq.