Aptap ystyq Germanııa ekonomıkasyna qalaı áser etip jatyr
ASTANA. KAZINFORM – Germanııada 26 maýsym kúni aýa temperatýrasy tarıhı rekordqa jetti, dep habarlaıdy DW.
Saarbrıýkken qalasyndaǵy meteostantsııada termometr 41,3 gradýs Tselsııdi kórsetti. Alaıda meteorologtardyń boljamynsha, bul rekord uzaq saqtalmaýy múmkin. Aldaǵy demalys kúnderi aptap ystyqtyń báseńdeýi emes, kerisinshe kúsheıýi kútilip otyr.
Aptap ystyq adamdardyń densaýlyǵyna ǵana emes, ekonomıkaǵa da áser ete bastady.
– Aýa temperatýrasy 30 gradýstan asqanda eńbek ónimdiligi árbir qosymsha 1 gradýs saıyn 3 paıyzǵa tómendeıdi, al elektr energııasyna jumsalatyn shyǵyn 1,2 paıyzǵa artady, – deıdi Allianz saqtandyrý kontserniniń ekonomıkalyq saıasat jónindegi zertteýshisi Katarına Ýtermel.
Onyń aıtýynsha, mundaı jaǵdaıda adamdar baıaý jumys isteıdi, jıi qatelesedi, al óndiristik jabdyqtar qyzyp ketedi. Olardy salqyndatý úshin qosymsha elektr energııasy qajet, al ol qymbatqa túsedi. Sonymen qatar Soltústik Eýropa elderindegi ǵımarattar sýyq qysta jylýdy saqtaýǵa beıimdelip salynǵandyqtan, jazdaǵy ystyqqa tótep berýge qolaısyz.
Germanııanyń Federaldyq eńbek mınıstrliginiń málimetinshe, aýa temperatýrasy 30 gradýstan asatyn kúnderi eńbekke jaramsyzdyq paraǵyn rásimdeý jaǵdaılary shamamen 3,5 paıyzǵa kóbeıedi. Al aptap ystyq uzaqqa sozylǵan kezde bul kórsetkish 6 paıyzǵa deıin jetedi.
Allianz boljamyna sáıkes, osyndaı jaǵdaı saqtalsa, 2026–2030 jyldary Germanııa ekonomıkasynyń jalpy shyǵyny shamamen 120 mlrd eýrony quraýy múmkin. Sonymen birge eldiń jalpy ishki ónimi 3 paıyzǵa tómendeýi yqtımal.
Klımattyń ózgerýinen týyndaıtyn ekonomıkalyq shyǵyn turǵysynan alǵanda Germanııa ázirge ortasha deńgeıde tur. Al Frantsııa, Italııa jáne Ispanııa bul saldardyń áldeqaıda aýyr zardabyn sezine bastady. Kerisinshe, Soltústik Eýropa elderi ázirge klımattyń jylynýynan belgili bir paıda kórip otyr, óıtkeni qystyń jumsaq bolýy jylytý shyǵyndaryn azaıtady.
Aıta keteıik, Eýropadaǵy aptap ystyq 50 jyl buryn múmkin emes bolǵanyn jazdyq.
Al Frantsııadaǵy aptap ystyqqa baılanysty atom reaktorlary ýaqytsha toqtatyldy.
