Aptap ystyq Eýropanyń balyq sharýashylyǵyna mıllıondaǵan dollar shyǵyn keltirdi
ASTANA. KAZINFORM – Bıylǵy jazda Eýropanyń birqatar elinde bolǵan aptap ystyq pen qurǵaqshylyq tutas ekojúıelerge áser etip, balyq sharýashylyǵyna aıtarlyqtaı zııan keltirdi. Bul týraly TASS agenttigi Associated Press derekterine silteme jasap habarlady.
AP málimetinshe, aýa raıynyń qalyptan tys ystyq bolýy men jaýyn-shashynnyń azdyǵynan balyq sharýashylyǵy salasynyń shyǵyny birneshe mıllıon dollarǵa baǵalanyp otyr.
Zardap shekken elderdiń qatarynda Serbııa, Slovenııa, Bosnııa jáne Gertsegovına, Chehııa, Rýmynııa men Vengrııa bar.
– Eýropalyq elder men bıznes 2026 jylǵy daǵdarysqa daıyn bolmaı shyqty. Endi olarǵa bolashaqta osyndaı qalyptan tys aýa raıy qubylystarynyń saldaryn azaıtýdyń joldaryn izdeýge týra keledi, – dep jazady Associated Press.
Qalyptasqan jaǵdaıdy aýyl sharýashylyǵyndaǵy ónim kóleminiń tómendeýi, sondaı-aq saýda men ózen arqyly júk tasymaldaý salalaryndaǵy shyǵyndar kúrdelendirip otyr.
Buǵan deıin Frantsııada aptap ystyq pen qurǵaqshylyq saldarynan 2026 jyly kartop óndirisi 21%-ǵa qysqaratyny habarlanǵan edi. Bul Belgııanyń frı kartobyn óndiretin ónerkásibine qajetti shıkizat tapshylyǵyna ákelýi múmkin.
BUU-nyń Azyq-túlik jáne aýyl sharýashylyǵy uıymy da Ormýz buǵazyndaǵy jaǵdaıǵa baılanysty álemde eleýli azyq-túlik daǵdarysy týyndaýy múmkin ekenin eskertken bolatyn.
