Aptanyń jańa kınopremeralaryna sholý

ASTANA. KAZINFORM — Osy aptada kınoteatrlar repertýary sheteldik drama men shytyrman oqıǵaly komedııalarmen tolyqty. Halyqaralyq deńgeıde tanylǵan akterler men rejısserler atsalysqan fılmder kórermen nazaryna usynyldy. Biraq bul aptada otandyq jańa týyndylar prokatqa shyqqan joq. Kazinform tilshisiniń sholýynda osy aptadaǵy kınopremeralardy usynamyz.

Ákeniń qolynan keledi (Papa mojet)

Reıtıng: 3.9
Janry: komedııa
Uzaqtyǵy: 89 mınýt
El: Reseı, 2026
Rejısseri: Dmıtrıı Sývorov

Vıktor men Veranyń otasqanyna 20 jyl. Tórt balasy bar januıa úlken úıde turady. Vıktor «Pomıdor&Ko» saýda jelisinde top-menedjer. Al Vera balalar úshin zańgerlik mansabyn toqtatyp, úı sharýasyna den qoıǵan. Bir kúni jumystan sharshap kelgen Vıktor óz qyzmeti Veranyń kúndelikti tirliginen áldeqaıda aýyr ekenin aıtady. Bul oıyna renjigen Vera on kúnge Maldıv araldaryna demalýǵa ketedi. Osy ýaqytta Vıktor bala kútimi men turmys qamy ońaı emes ekenin túsinedi.

Іsker hanym — máńgilik (Businesswoman Forever)

Reıtıng: 2.6
Janry: drama
Uzaqtyǵy: 80 mınýt
Rejısseri: Ermek Shahmet

Eki qurby bıznes bastap, talaı qıyndyqty birge eńseredi. Alaıda bir ýaqytta olar bir adamǵa ǵashyq bolady. Leıla men Emır bolashaqty birge josparlaıdy. Biraq Rýzanna Emırge joǵary mansap usyný arqyly ony ózine tartpaq bolady. Muny bilgen Leıla qurbysymen baılanysyn úzedi de, startapyn jeke damytady. Emır barlyq jınaǵyn Leılaǵa beredi. Joba sátsiz aıaqtalǵan soń, ekeýi aıyrylysady. Leıla ınvestor izdep, isti qaıta bastaıdy. Al Emır Rýzannamen tabysyp, kóp uzamaı olardyń sábı kútip júrgeni belgili bolady.

Kúlki. Zulymdyqtyń bastaýy (Ýlybka. Zarojdenıe zla)

Reıtıng: 5.3
Janry: horror 
Uzaqtyǵy: 123 mınýt
El: Indonezııa, 2024
Rejısseri: Baım Von

Bir kúni emhanaǵa jumbaq naýqas jetkiziledi. Emdeý bólmesinen estilgen onyń úreıli kúlkisi jurtty shoshytady. Kóp uzamaı emhanada jumbaq ólimder jıileı bastaıdy. Mán-jaıdy anyqtaý úshin bir top jas beıtanys jandy zertteýge kirisedi. Qarǵystyń syryn ashpasa, kelesi qurban ózderi bolýy múmkin. Ýaqyt taýsylyp barady.

Mahabbat kináli (Vınovata lıýbov)

Reıtıng: 10.0
Janry: melodrama, komedııa
Uzaqtyǵy: 101 mınýt
El: Kanada, 2024
Rejısseri: Joze Loýrensý

Toronto qalasyndaǵy is-sapar kezinde jas jazýshy Verter óz mahabbatyn kezdestiredi. Alaıda boıjetkenniń basqa janǵa atastyrylǵany belgili bolady. Ipohondrık dosynyń eskertýine qulaq aspaǵan Verter súıiktisiniń júregin jaýlaý úshin táýekelge bel býyp, ómirin túbegeıli ózgertedi.

Goat: Asqaq armanda (Goat: Mechtaı po-krýpnomý)

Reıtıng: 10.0
Janry: mýlfılm, mıýzıkl, komedııa
Uzaqtyǵy: 95 mınýt
El: AQSh, Brazılııa, Japonııa, Sıngapýr, 2026
Rejısseri: Taırı Dıllıheı, Adam Rozett

Ýıll atty eshki erekshe múmkindikke ıe bolady. Ol kásibı lıgaǵa qosylyp, «janýarbol» quramynda oınaı bastaıdy. Bul sport túri — kúshti, komandalyq rýhty jáne qarqyndy qozǵalysty qajet etedi. Ýıll álemdegi eń jyldam ári qatal janýarlarmen bir topta. Biraq jańa komanda serikteri Ýılldi kishkentaı dep baǵalamaıdy.

Naızaǵaıly asý (Grozovoı pereval)

Reıtıng: 7.0
Janry: drama
Uzaqtyǵy: 130 mınýt
El: AQSh, Ulybrıtanııa, 2026
Rejısseri: Emırald Fennel

Iorkshır jazyǵynda máńgilik mahabbat oqıǵasy bastalady. Jetim Hıtklıffti naızaǵaıly asý ústinde turatyn erekshe otbasy asyrap alady. Ol bir kórgennen Ketrın atty qyzdy unatyp qalady. Úı ıesiniń óliminen keıin múlikti qyzǵanshaq ári qatygez Hındlı basqaryp, Hıtklıffti qyzmetshi etedi. Osy tusta Hıtklıff pen Ketrınniń mahabbaty sónbeı, bir-birine degen sezimi odan ári kúsheıe túsedi.

Beldhem. Mystannyń qarǵysy (Beldhem. Proklıatıe vedmy)

Reıtıng: 3.3
Janry: horror 
Uzaqtyǵy: 85 mınýt
El: AQSh, 2024
Rejısseri: Endjela Galner

Uzaq ýaqyt boıy joq bolyp ketken Harper anasynyń qystaǵyna oralady. Bir kúni ol eski úıdiń qabyrǵasynda jasyryn turǵan ejelgi kúshpen kezdesedi. Harper óz ómiri men balasyn tylsym tuzaqtan saqtap qalý úshin bar kúshin salady.

Peıish 2: Anama hat

Reıtıng: 8.8
Janry: drama
Uzaqtyǵy: 100 mınýt
El: Qyrǵyzstan, 2026
Rejısseri: Rýslan Akýn

«Peıish 2: Anama hat» — analyq mahabbat pen rýhanı qundylyqtardy dáriptep, júrekke jetkizetin áserli drama. Ótkenniń synaqtary keıipkerlerdi ózgertedi. Jaqyndarymen qarym-qatynasyn qaıta saralaýǵa múmkindik beredi. Al jańa tanystyqtar olarǵa qıyndyqty jeńip, ishki kúsh pen tirek tabýǵa kómektesedi.

Los‑Andjelestegi urlyq (Ograblenıe v Los-Andjelese)

Reıtıng: 6.5
Janry: drama, trıller, krımınal
Uzaqtyǵy: 135 mınýt
El: Ulybrıtanııa, AQSh, 2026
Rejısseri: Bart Leıton

Detektıv Lý Lıýbesnık qymbat tastardy urlaǵan qylmyskerdiń izine túsedi. Urlyq «Krımınal 101» erejelerine sáıkes jasalǵan, ıaǵnı urylar minsiz jospar quryp, nusqaýlyq boıynsha áreket etken.

The Rose: Maǵan qaıta oral (The Rose: Come back to me)

Reıtıng: 5.5
Janry: derekti fılm
Uzaqtyǵy: 97 mınýt
El: Ońtústik Koreıa, AQSh, 2025
Rejısseri: Ýdjın ıÝ

«The Rose: Come Back to Me» — koreıalyq The Rose tobynyń K-Pop ındýstrııasynda bastan keshirgen qıyndyqtaryn baıandaıdy. Mıllıondaǵan jankúıer jınaǵannan keıin, top leıblmen shyqqan daýdyń kesirinen tarap ketedi. Biraq birneshe jyldyq úzilisten soń sahnaǵa qaıta oralady.

Sońǵy ertegi (Poslednıaıa skazka)

Janry: mıýzıkl
Uzaqtyǵy: 139 mınýt
El: Reseı, 2025
Rejısseri: Anna Shevchýk

Máskeýdiń turatyn Maks pen súıiktisi Jenıa kútpegen jerden shytyrman oqıǵalarǵa toly shyǵys astanasyna saıahattap barady. Jetken soń olar «Myń bir túnniń» keıipkerlerimen kezdesip, bir-birinen ajyrap ketý qaýpin bastan ótkeredi. Ushatyn kilemniń kómegimen olar óz sezimderi men armandaryn túsinedi.

Ótken aptadaǵy kınopremeralar tizimin osy jerden kóre alasyzdar.