Aptanyń jańa kınopremeralaryna sholý
ASTANA. KAZINFORM — Osy aptada kınoteatrlar repertýary sheteldik horrorlar men shytyrman oqıǵaly dramalarmen tolyqty. Halyqaralyq deńgeıde tanylǵan akterler men rejısserlerdiń fılmderi kórermen nazaryna usynyldy. Sonymen qatar otandyq jańa týyndylar da prokatqa shyqty.
Kazinform tilshisiniń sholýynda osy aptadaǵy eń basty kınopremeralardy usynamyz.
Bolǵan oqıǵa 2
Janry: drama, komedııa
Uzaqtyǵy: 90 mınýt
El: Qazaqstan, 2026 jyl
Rejısseri: Nurbolhan Sharapov
Birjannyń ómiri birqalypty ótip jatyr. Ol advokat bolýdy armandap, mańyzdy ózgeristerge daıyndalyp júredi. Alaıda kezdeısoq tabylǵan bir zat onyń óz tegine qatysty kúmán týdyrady. Osydan keıin ol bıologııalyq anasyn izdeýge kirisedi. Birjan aǵalarymen birge ótkenniń umyt bolǵan qupııalaryn ashady. Іzdeý barysynda olar kezinde úlken shý týdyrǵan qylmystyq istiń jaı-japsaryn biledi. Alaıda bul shyndyqtyń barlyǵy Birjannyń ózi týraly túsinigin túbegeıli ózgertýi múmkin.
Uıat
Janry: drama, trıller
Uzaqtyǵy: 99 mınýt
El: Qazaqstan, 2026 jyl
Rejısseri: Marat Qudaıbergenuly
Márııamnyń qolynda úzdik dıplomy, al aldynda jarqyn bolashaqqa bastar talaı múmkindigi bar edi. Alaıda onyń ómiri bir kúnde astań-kesteń bolady. Baı Jáńgir Márııamdy ózine tıesili adamdaı kórip, ony kúshtep alyp qashady. Dástúrdiń qysymynan ımengen Márııam únsizdikke boı aldyryp, Jáńgirge turmysqa shyǵýǵa májbúr bolady.
Biraq bul neke onyń baqytyna emes, qorlyq pen úreıge toly ómirge aınalady. Jáńgirdiń uryp-soqqanyna shydamaǵan Márııam bir túni úıinen qashyp ketedi. Endi ol ótkeninen qashyp, jańa ómir bastaýǵa tyrysady.
Tom men Djerrı: Tyıym salynǵan kompas (Tom ı Djerrı: Zapretnyı kompas)
Janry: komedııa, mýltfılm
Uzaqtyǵy: 104 mınýt
El: Qytaı, AQSh, 2026 jyl
Rejısseri: Chjan Gan
Tom men Djerrı murajaıda bir-birin qýyp júrip, sıqyrly jádigerdi taýyp alady. Alaıda jádigerdiń tylsym kúshi olardy ótken zamanǵa alyp ketedi. Beıtanys dáýirde qalyp qoıǵan ekeýi óz ýaqytyna oralý úshin kúsh biriktirip, úıge aparar joldy tabýǵa tıis.
Tylsym súıis (Elektrıcheskıı potselýı)
Janry: komedııa, melodrama
Uzaqtyǵy: 122 mınýt
El: Frantsııa, Belgııa, 2026 jyl
Rejısseri: Per Salvadorı
Parıj, 1928 jyl. Jubaıynan aıyrylǵan talantty sýretshi Antýan shyǵarmashylyq shabytynan aıyrylady. Janyna jubanysh izdegen ol medıýmnyń kómegine júginedi. Alaıda ol arǵy dúnıeden habar jetkizip otyrǵan daýystyń ıesi — kóshpeli tsırkte óner kórsetetin aılaker alaıaq Sıýzanna ekenin bilmeıdi. Sıýzannanyń oılastyrǵan aılasy Antýanǵa shyǵarmashylyq shabytyn qaıta tabýǵa kómektesedi, biraq Sıýzanna sýretshige kútpegen jerden ǵashyq bolyp qalady.
Taǵdyr tálkeginde (Jertva obstoıatelstv)
Janry: shytyrman oqıǵaly komedııa
Uzaqtyǵy: 103 mınýt
El: Ulybrıtanııa, Gretsııa, AQSh, 2026 jyl
Rejısseri: Romen Gavras
Grekııada qaıyrymdylyq sharasy ótip jatyr, biraq munda jınalǵandar qorshaǵan ortany qorǵaýdan góri Gollıvýd juldyzdarynyń jabyq keshine kelgen qonaqtarǵa kóbirek uqsaıdy. Olardyń arasynda kezinde tanymal bolǵan akter Maık Taıler de bar. Ol burynǵy ataq-dańqyn qaıtarýdy armandaıdy. Keshtiń shyrqyn radıkaldy ekolog Djoan buzady. Onyń pikirinshe, alyp janartaýdyń atqylaýyn toqtatyp, álemdi apattan qutqarýdyń bir ǵana joly bar. Ol úshin úsh tanymal adamdy qurban etý qajet. Kóp uzamaı Maıktyń ózi adamzattyń taǵdyryn sheshetin jaǵdaıǵa tap bolady. Endi ol ómirindegi eń mańyzdy rólin somdaýy kerek. Alaıda bul joly onyń sahnasy — kıno emes, shynaıy ómir.
Samýraı men tutqyn (Samýraı ı plennık)
Janry: áskerı-tarıhı detektıv
Uzaqtyǵy: 147 mınýt
El: Japonııa, 2026 jyl
Rejısseri: Kıesı Kýrosava
Arakı Mýrasıge áskerı qolbasshy ári strateg Kýroda Kambeıdi túrmeden bosatady. Ol Kýrodadan Arıoka qamalynda bolǵan jumbaq qylmysty tergeýge kómektesýin suraıdy.
Óliler úıi, (Dom mertvyh)
Janry: ýjas
Uzaqtyǵy: 120 mınýt
El: Taıland, 2026 jyl
Rejısseri: Khom Kongkiat Khomsiri
Tabysy mol satý menedjeri men júkti áıeli kópten armandaǵan úıin taýyp, sonda kóship keledi. Alaıda jańa qońystan keıin túsiniksiz oqıǵalar bastalady. Kóp uzamaı er adam kórshi úıdiń oǵan tikeleı qatysy bar ekenin baıqaıdy. Osylaısha, kórshi úı men onyń otbasynyń arasynda jumbaq baılanys bar ekeni belgili bolady.
40 kezdesý, 40 tún (40 svıdanıı, 40 nocheı)
Janry: komedııa, melodrama
Uzaqtyǵy: 100 mınýt
El: AQSh, 2026 jyl
Rejısseri: Endı Delanı
Leanyń ómirinde bári oıdaǵydaı ótip jatqandaı. Tek jigittermen qarym-qatynasy men aı saıynǵy páteraqy máselesi ǵana onyń bas aýrýyna aınalǵan. Kezekti sátsiz kezdesýden keıin ájesi oǵan kútpegen usynys jasaıdy: eger Lea 40 jigitpen kezdesip, ózine laıyq jar taba alsa, ájesi onyń bir jyldyq páteraqysyn tólep berýge ýáde etedi.
Kúshik patrýl: Dınofılm (Şenıachıı patrýl: Dınofılm)
Janry: shytyrman oqıǵaly, anımatsııalyq, otbasylyq, fantastıkalyq fılm
Uzaqtyǵy: 88 mınýt
El: Kanada, AQSh, 2026 jyl
Rejısseri: Kellan Brýnker
Daýyldan keıin Kúshik patrýl jumbaq dınozavrlar aralyna tap bolady. Onda olar Rekspen kezdesedi. Alaıda mer Hamdıngerdiń oılanbaı jasaǵan áreketi janartaýdyń atqylaýyna sebep bolady. Endi komanda aral turǵyndaryn qutqarý úshin eń aýqymdy qutqarý operatsııasyn júrgizýge tıis.
Qatar órilgen hıkaıalar (Parallelnye ıstorıı)
Janry: detektıv, drama, trıller
Uzaqtyǵy: 139 mınýt
El: Frantsııa, Italııa, Belgııa, Saýd Arabııasy, AQSh, 2026 jyl
Rejısseri: Asgar Farhadı
Sılvı qarsy úıde turatyn kórshileriniń ómirin baqylap, jańa roman jazyp júredi. Jazýshynyń kómekshisi Adam Sılvıdiń kórshisi ári romanynyń keıipkeri Nıtaǵa ǵashyq bolady. Qyzdyń kóńilin tabý úshin ol Sılvıdiń qoljazbasyn kóshirip alyp, ony óz shyǵarmasy retinde usynady. Alaıda ómirde roman keıipkerleriniń prototıpteri men olardyń arasyndaǵy qarym-qatynas Sılvıdiń qııalyndaǵydaı bolmaı shyǵady.
Batys qaqpasy
Janry: boevık, tarıhı fılm.
Uzaqtyǵy: 105 mınýt
El: Majarstan, 2025 jyl
Rejısseri: Peter Shoosh
1242 jyly Uly Mońǵol áskeri Eýropaǵa basyp kirýge attanady. Alaıda olardyń jolyn vengr qamaly men onyń basshysy Evsevıı bógeıdi. Mońǵol áskeriniń joryǵyn toqtatýǵa shaǵyn qamaldyń tótep berýi kútpegen jaǵdaı edi.
Oýk-strıttiń shetinde (Na kraıý Oýk-strıt)
Janry: boevık, shytyrman oqıǵa, trıller, fantastıka
Uzaqtyǵy: 100 mınýt
El: AQSh, 2026 jyl
Rejısseri: Devıd Robert Mıtchell
Jumbaq ǵaryshtyq oqıǵadan keıin Platttar otbasy ózderi turatyn aýdanmen birge belgisiz jerge tap bolady. Endi olar aman qalý úshin birigip áreket etýge májbúr.
Ótken aptadaǵy kınopremeralar tizimin osy jerden kóre alasyzdar.
