Aptanyń jańa kınopremeralaryna sholý
ASTANA. KAZINFORM — Osy aptada kınoteatrlar túrli janrdaǵy jańa fılmdermen tolyqty. Kórermen nazaryna qorqynyshty janrdaǵy úsh fılm usynylyp, balalarǵa arnalǵan bes jańa týyndy jaryqqa shyqty.
Otandyq kıno qorjyny da jańa fılmmen tolyqty. Kazinform tilshisiniń sholýynda osy aptadaǵy eń basty kınopremeralardy usynamyz.
14 kún
Janry: drama, komedııa
Uzaqtyǵy: 90 mınýt
El: Qazaqstan, 2026 jyl
Rejısseri: Oljas Nurbaev
Darhan – tabysty ári aýqatty kásipker. Ómirinde bári bar bolǵanymen, janynda jaqyn adamdary joq. Bir kúni ol mansap pen baılyqqa umtylamyn dep, shynaıy dostarynan alystap ketkenin túsinedi. Dostaryn qaıta tabystyryp, aradaǵy baılanysty jańǵyrtý úshin Darhan táýekelge bel býady. Kútpegen kezdesýden keıin bala kúngi úsh dos mekteptegi armandary men oryndalmaı qalǵan tilekterin júzege asyrýǵa baǵyttalǵan shytyrman saparǵa attanady.
Marstan kelgen qyz, (Marsıanka)
Janry: shytyrman oqıǵa, drama, otbasylyq, fantastıka
Uzaqtyǵy: 112 mınýt
El: Indonezııa, 2026 jyl
Rejısseri: Upie Guava
Pelangı – Marsta dúnıege kelgen alǵashqy bala. 2100 jyldary Jerde sý tapshylyǵy kúsheıip, adamzattyń bolashaǵyna qaýip tónedi. Osyndaı sátte Pelangı adamzatty qutqara alatyn asa sırek mıneral – «Omega» tseolıtin izdeýge attanady. Ol sapar barysynda robottarmen birigip, mıneraldy tabýǵa kúsh salady. Alaıda «Omegaǵa» ıelik etýdi kózdegen qýatty korporatsııa Pelangıdiń jolyna kedergi keltiredi.
Astral 6: Olar qazir osynda, (Astral 6: Onı ýje zdes)
Reıtıng: 6.2
Janry: qorqynyshty fılm
Uzaqtyǵy: 105 mınýt
El: AQSh, 2026 jyl
Rejısseri: Djeıkob Cheız
Jas áıel tylsym álemge ótip, sol jerden zulym rýhtardy tiriler álemine ákele alatynyn baıqaıdy.
Koral-Groýv kóshesindegi qorqynyshty tús, (Koshmar na ýlıtse Koral Groýv)
Janry: qorqynyshty fılm
Uzaqtyǵy: 91 mınýt
El: Kanada, 2026 jyl
Rejısseri: Felıpe Vargas
Sasha Koral-Groývtaǵy kóshesindegi elıtalyq qalashyqqa bala kútýshi bolyp jumysqa ornalasady. Munda bala kútýshiler uzaq turaqtamaıdy, balalardyń minez-qulqy da birtúrli. Bir kúni serýen kezinde Sasha balalar alańynda jasyrynǵan tylsym kúshtiń bar ekenin baıqaıdy. Bul kúsh balalardy qorqynyshty jaratylystarǵa aınaldyrady. Balalardy qutqarý úshin Sasha syrt kózge kóringendeı emes bul álemniń qupııasyn ashyp, zulymdyqty jeńýi kerek.
Búlik, (Mıatej)
Reıtıng: 5.6
Janry: ekshn, trıller
Uzaqtyǵy: 94 mınýt
El: Ulybrıtanııa, AQSh, 2026 jyl
Rejısseri: Jan-Fransýa Rıshe
Koýl Rıd - arnaıy jasaq pen polıtsııada qyzmet etken. Al qazir jeke kúzetshi bolyp jumys isteıdi. Bir kúni onyń mıllıarder basshysyn belgisiz bireýler óltiredi. Osy qylmysqa Rıdtiń ózi basty kúdikti retinde iligedi. Zańnan qashýǵa májbúr bolǵan ol shynaıy qylmyskerlerdiń izine túsip, ádildikti ornatýǵa bel býady.
Sońǵy batyr. Baýyrsaq, (Poslednıı bogatyr. Kolobok)
Reıtıng: 3.0
Janry: shytyrman oqıǵa, komedııa, fentezı
Uzaqtyǵy: 108 mınýt
El: Reseı, 2026 jyl
Rejısseri: Anton Maslov
Fılmde Belogoreniń eń tanymal keıipkeri Baýyrsaqtyń bastan keshken oqıǵasy kórsetiledi. Ony qandaı maqsatpen pisirgeni, qalaı qashyp ketkeni jáne qaraqshylar tobyna qalaı qosylǵany baıandalady. Keıin Baýyrsaq joly bolmaı júrgen naýbaıshy Tıhon men Lada esimdi erekshe qyzdyń serigine aınalady. Úsheýi kútpegen oqıǵalarǵa toly saparǵa attanady.
Lıdııa men Tuman salt attysy, (Lıdııa ı Vsadnık Týmana)
Janry: shytyrman oqıǵa, balalarǵa arnalǵan, mýltfılm, fentezı, otbasylyq
Uzaqtyǵy: 75 mınýt
El: Kanada, 2026 jyl
Rejısseri: Emılı Rosas, Nensı Sevard, Fılıpp Arseno Bıýssere
Lıdııanyń aǵasyn jumbaq Sıqyrshy urlap ketedi. Ony izdegen qyz Tumandy teńizge attanady. Jolda ony «Delfın» atty ushatyn kemeniń ekıpajy qutqaryp, Lıdııa astromag Ambrozııanyń shákirti atanady. Ambrozııa da joǵalǵan ulyn jáne basqa balalardy izdep júr. Aǵasyn qutqarý úshin Lıdııa shoqjuldyzdar sıqyryn meńgerip, óz estelikteriniń kúshine senýi kerek.
Lýntık. Aıdyń arǵy beti, (Lýntık. Obratnaıa storona Lýny)
Janry: shytyrman oqıǵa, mýltfılm, otbasylyq
Uzaqtyǵy: 80 mınýt
El: Reseı, 2026 jyl
Rejısseri: Darına Shmıdt
Lýntık Aıda anasymen birge turady jáne Jerdegi dostaryna da jıi baryp turady. Bir kúni ol ákesiniń qaıda ekenin suraıdy. Anasy ákesiniń Aıdyń arǵy betinde joǵalyp ketkenin aıtady. Ákesin kútkisi kelmegen Lýntık dosy Kýzıamen birge ony izdeýge attanady. Olarǵa Výpsen men Pýpsen esimdi buzyq juldyzqurttar da erip ketedi. Keıipkerler Aıdyń arǵy betine jetip, qaýipti ári tańǵajaıyp oqıǵalarǵa tap bolady.
Garrı Potter jáne pálsapa tasy, (Garrı Potter ı fılosofskıı kamen)
Reıtıng: 8.3
Janry: shytyrman oqıǵa, fentezı, otbasylyq
Uzaqtyǵy: 100 mınýt
El: Ulybrıtanııa, AQSh, 2026 jyl
Rejısseri: Krıs Kolambýs
On jasar Garrıdiń balalyq shaǵy ońaı ótpeıdi. Bir jasynda ata-anasynan aıyrylǵan ol naǵashysy men tátesiniń qolynda ósip, únemi qorlyq kóredi. Alaıda on birinshi týǵan kúninde onyń ómiri kúrt ózgeredi. Jumbaq qonaq Garrıge sıqyrshy ekenin jáne Hogvarts sıqyr mektebine qabyldanǵanyn habarlaıdy. Kóp uzamaı Garrı Hogvarts ekspressine otyryp, jańa ómirge qadam basady. Ol jerde ony ǵajaıyp oqıǵalar, adal dostar jáne ata-anasynyń ólimine qatysty qupııa kútedi.
Máıithana kúzetshisi, (Assıstent v morge)
Janry: qorqynyshty fılm
Uzaqtyǵy: 80 mınýt
El: Meksıka, 2026 jyl
Rejısseri: Olallo Rýbıo
Ábden tıtyqtaǵan kúzetshi máıithanaǵa jumysqa ornalasady. Alǵashqy túninde-aq ol tynyshtyq pen qarańǵylyqtyń ar jaǵynda qutylý múmkin emes tylsym azaptyń jasyrynǵanyn sezedi.
Ótken aptadaǵy kınopremeralar tizimin osy jerden kóre alasyzdar.
