Aptanyń jańa kınopremeralaryna sholý
ASTANA. KAZINFORM — Osy aptada kınosúıer qaýymǵa barlyq janrdaǵy jańa fılmder prokatqa shyqty. Kórermender kópten kútken «Órmekshi adam: Jańa kún» kınosy da úlken ekranǵa jol tartty. Sonymen qatar, birden úsh qorqynyshty fılmniń tusaýy kesilse, balalarǵa arnalǵan eki jańa anımatsııalyq týyndy jaryq kórdi. Biraq osy aptada otandyq fılmder prokatta joq.
Kazinform tilshisiniń sholýynda osy aptadaǵy eń basty kınopremeralardy usynamyz.
Kollaj: Kazinform / JI
Órmekshi-adam: Jańa kún
- Reıtıng: 7.8
- Janry: ekshn, shytyrman oqıǵa, fentezı, fantastıka
- Uzaqtyǵy: 150 mınýt
- El: AQSh, 2026 jyl
- Rejısseri: Destın Denıel Kretton
Jalǵyz qalǵan Pıter Parker endi bar kúshin Nıý-Iorktegi qylmyspen kúresýge arnaıdy. Tórt jyl buryn Doktor Strendjdiń jasaǵan sıqyrynan keıin álemdegi adamdardyń barlyǵy, tipti oǵan jaqyn jandar da Pıterdi umytyp ketken edi. Ýaqyt óte kele Órmekshi-adamǵa artylǵan jaýapkershilik pen qaýip-qater kúsheıe túsedi. Osy sátte onyń boıyndaǵy erekshe qabiletteri ózgere bastaıdy. Bul ózgerister Pıterdiń óz ómirine ǵana emes, aınalasyndaǵy adamdardyń qaýipsizdigine de qater tóndiredi.
Biz joǵaltqannyń bári, (Vse, chto my poterıalı)
- Reıtıng: 6.1
- Janry: drama, melodrama
- Uzaqtyǵy: 107 mınýt
- El: Ispanııa, 2026 jyl
- Rejısseri: Horhe Alonso
Ata-anasynan aıyrylǵan jas sýretshi Lııa basyna túsken qaıǵyny umytýǵa tyrysady. Aǵasy úıden ketken kezde, Lııaǵa qamqor bolýdy óziniń eń jaqyn dosy Akselge tapsyrady. Alaıda ol Lııanyń Akselge degen sezimi bar ekeninen beıhabar edi.
Motor Sıtı
- Reıtıng: 7.1
- Janry: boevık, trıller
- Uzaqtyǵy: 103 mınýt
- El: AQSh, 2026 jyl
- Rejısseri: Potsı Ponchırolı
Djon Mıller — buryn reındjer bolyp jumys istegen. Alaıda mahabbatyn kezdestirgen soń, ol tynysh ári beıbit ómirdi tańdady. Biraq taǵdyr oǵan basqa synaq daıyndaǵan eken. Qylmystyq top basshysy onyń súıiktisin urlap ketedi, al Djon asa qatań baqylaýdaǵy túrmege qamalady. Ol ádilettilikti óz qolymen ornatýǵa májbúr bolady.
Tamyrlar: Vampırler týraly dastan, (Kornı: Saga o vampırah)
- Janry: ýjas
- Uzaqtyǵy: 93 mınýt
- El: Ulybrıtanııa, 2026 jyl
- Rejısseri: Marko Van Bell
Bes bloger demalys kúnderin tabıǵat aıasynda, ormanda ótkizýdi uıǵarady. Alaıda alańsyz demalys kútpegen jerden qorqynyshty oqıǵaǵa ulasady. Olardyń ormanǵa kelýi álemdegi eń alǵashqy vampırdi oıatady. Osy sátten bastap aman qalý jolynda kúres bastalady.
Pororo: Sýasty shytyrman oqıǵalary, (Pıngvınenok Pororo: Podvodnye prıklıýchenııa)
- Reıtıng:
- Janry: shytyrman oqıǵalar, balalarǵa arnalǵan, mýltfılm
- Uzaqtyǵy: 72 mınýt
- El: Ońtústik Koreıa, 2026 jyl
- Rejısseri: ıÝn Dje-van
Batyl pıngvın Pororo men onyń dostary muhıttyń tylsym tereńdigin zertteýge attanady. Olar sýasty qaıyǵyn jasap, sýǵa batqan kemeler men teńiz tirshiligine toly ǵajaıyp álemge súńgıdi. Alda olardy kútpegen synaqtar kútip tur. Dostar qıyndyqtardy birge eńserip, sýasty patshalyǵynyń tańǵajaıyp syrlaryn ashady.
Smesharıkter: Ǵalamdar toǵysynda, (Smesharıkı skvoz vselennye)
- Reıtıng:
- Janry: shytyrman oqıǵalar, komedııa, fantastıka
- Uzaqtyǵy: 106 mınýt
- El: Reseı, 2026 jyl
- Rejısseri: Andreı Marmontov, Ilıa Maksımov
Krosh pen kirpi túımedaq alqabynan erekshe qurylǵy taýyp alady. Qupııa qondyrǵy olardy bolashaqqa jeteleıdi. Bul álemde olar Marsqa bet alǵan ǵarysh kemesindegi qarapaıym balalarǵa aınalady. Alaıda kóp uzamaı keıipkerler munyń jaı oıyn emes ekenin túsinedi. Osy sátten bastap olardyń ǵalamdar arasyndaǵy qaýipti de qyzyqty shytyrman oqıǵasy bastalady.
Qabir rásimi. Zulymdyq qaıta oraldy, (Mogılnyı rıtýal. Zlo vernýlos)
- Reıtıng:
- Janry: ýjas
- Uzaqtyǵy: 104 mınýt
- El: Indonezııa, 2026 jyl
- Rejısseri: Denı Sapýtra
Akýsher Rahaıýdyń ómiri bir kezderi baqytqa toly edi. Alaıda kóp uzamaı olardyń tynyshtyǵyn birinen soń biri bolǵan jumbaq oqıǵalar buzady. Qater Rahaıýdy qýyp, úreı qushaǵyna engizedi.
Elester mektebi, (Shkola prızrakov)
- Reıtıng:
- Janry: ýjas, horror
- Uzaqtyǵy: 106 mınýt
- El: Japonııa, 2026 jyl
- Rejısseri: Masakı Nısııama
Jartylaı japon qyzy Elenaǵa jańa mektepke beıimdelý ońaıǵa soqpaıdy. Onyń Nıan atty dosy mektepte elester bar ekenine senedi. Elena da ózin bireýdiń únemi baqylap júrgenin seze bastaıdy. Tipti qulaqqap taqqan kezde elesterdiń daýysyn esteıdi. Kóp uzamaı basqa oqýshylardan da oǵash áreketter baıqalady.
Ýffıtsıdiń qupııa ómiri, (Taınaıa jızn Ýffıtsı)
- Reıtıng: 5.7
- Janry: derekti, óner
- Uzaqtyǵy: 96 mınýt
- El: Germanııa, 2026 jyl
- Rejısseri: Korınna Belts, Enrıke Sanches Lansh
Fılm kórme daıyndaý, óner týyndylaryn qalpyna keltirý jáne ıtalııalyq óner murasyn saqtaý isine jaýapty mamandardyń jumysyn baıandaıdy. Álemdegi eń kóne mýzeılerdiń biri sanalatyn Ýffıtsı galereıasynyń tarıhy men baǵa jetpes kollektsııasyn qorǵaý jolyndaǵy kúresi de qamtylady.
Ótken aptadaǵy kınopremeralar tizimin osy jerden kóre alasyzdar.
