Aptanyń jańa kınopremeralaryna sholý
ASTANA. KAZINFORM — Osy aptada kınoteatrlar repertýary sheteldik horrorlar men shytyrman oqıǵaly dramalarmen tolyqty. Halyqaralyq deńgeıde tanylǵan akterler men rejısserlerdiń fılmderi kórermen nazaryna usynyldy. Sonymen qatar, otandyq jańa týyndy da prokatqa shyqty.
Kazinform tilshisiniń sholýynda osy aptadaǵy eń basty kınopremeralardy usynamyz.
Sansyz baı
Janry: komedııa
Uzaqtyǵy: 78 mınýt
El: Qazaqstan, 2026
Rejısseri: Aıbek Nıgmet
Baı sharýa ıesi Sansyzbaı tyǵyryqqa tireledi. Onyń esepshisi Arnat jalaqysyn 3 mıllıonǵa kóterýdi talap etedi. Sebebi ol bedeldi adamnyń qyzyna úılenýdi josparlap júr. Alaıda kóp uzamaı ol qyzdyń ákesi Sansyzbaı ekeni belgili bolady.Al urlanǵan aqsha — ekeýi zańsyz ıelengen memlekettik sýbsıdııalar.
Zulym óliler: Ólim oty (Zloveşıe mertvetsy: Plamıa smertı)
Reıtıng: 6.9
Janry: detektıv, qorqynysh, qııal-ǵajaıyp.
Uzaqtyǵy: 120 mınýt
El: Jańa Zelandııa, AQSh, Kanada, 2026
Rejısseri: Sebastıan Vanıchek
Kúıeýi qaıtys bolǵannan keıin áıel onyń týǵan-týystarynyń úıine keledi. Alaıda kóp uzamaı otbasy múshelerin jyn-shaıtan bılep, qaraly jıyn qorqynyshty oqıǵaǵa ulasady. Osy sátte áıel mahabbat pen adaldyqqa bergen serttiń ólimmen de aıaqtalmaıtynyn túsinedi.
Tátti ertegi (Sladkaıa skazka)
Reıtıng: 4.7
Janry: shytyrman oqıǵa
Uzaqtyǵy: 115 mınýt
El: Chehııa, 2025
Rejısseri: Pavel Jandoýrek
Anıchka - jas dáriger. Ol eski úı men qaraýsyz qalǵan stomatologııa kabınetin muraǵa alady. Tylsym ósimdiktiń kómegimen jandy aýyrtpaı emdeýdiń qupııasyn ashady. Alaıda bul jańalyq jergilikti tis dárigeriniń qarsylyǵyn týǵyzady. Qıyn sátte Anıchkaǵa qaladaǵy batyl balalar kómekke keledi.
Sur aıýmen ótken tún (Noch s grızlı )
Reıtıng: 4.5
Janry: trıller
Uzaqtyǵy: 87 mınýt
El: AQSh, 2026
Rejısseri: Berk Doeren
1967 jyl. 12 tamyz. Keshki ýaqyt. Montana shtatyndaǵy «Gleısher» ulttyq saıabaǵy. Bir top dos demalys kúnderin qala tirshiliginen alys, tabıǵat aıasynda ótkizýdi josparlaıdy. Alaıda olar baıqamaı alyp sur aıý mekendeıtin aýmaqqa kirip ketedi. Osy sátten bastap ómir úshin kúres bastalady.
Bul — hıt!
Reıtıng: 6.8
Janry: drama, komedııa, mıýzıkl
Uzaqtyǵy: 98 mınýt
El: Irlandııa, AQSh, 2026
Rejısseri: Djon Karnı
Rık esimdi mýzykant toılarda óner kórsetip, aqsha tabady. Bir kúni oǵan boız-bend juldyzy Dennıge mýzykalyq súıemeldeý jasaý usynylady. Kesh sońynda olar shaǵyn djem-seıshn ótkizip, óz áýenderimen bólisedi. Keıin Dennı Rıktiń ánin álemdik hıtke aınaldyrady. Rık óz avtorlyq quqyǵyn qorǵap, eńbeginiń ádil baǵasyn alýǵa bel býady. Alaıda onyń sózine eshkim senbeıdi, tipti áıeli men qyzy da kúmán keltiredi.
Qaharly ashý (Jıvaıa ıarost)
Reıtıng: 7.0
Janry: boevık, qylmys
Uzaqtyǵy: 113 mınýt
El: Gonkong, 2026
Rejısseri: Kendzı Tanıgakı
Qolóner sheberi Van Veıdiń qyzy qylmystyq toptyń qolyna túsedi. Ákesiniń basqa amaly qalmaı, qyzyn ózi izdeýge attanady. Onyń jalǵyz serigi — jýrnalıst Navın. Onyń da áıeli jumbaq jaǵdaıda joǵalyp ketken. Ártúrli ortadan shyqqan eki er adam bir-birine senýdi jáne birlese áreket etýdi úırenedi. Olar bul jolda ózderiniń qupııa ótkeninen qalǵan jekpe-jek ónerindegi sheberlikterin paıdalanady.
Atamnyń aýylyna jol 2 (Na derevnıý dedýshke 2)
Janry: otbasylyq komedııa
Uzaqtyǵy: 93 mınýt
El: Reseı, 2026
Rejısseri: Vladımır Kott
Vladık demalysyn taǵy da aýyldaǵy súıikti atasy ıÝranyń janynda ótkizbek bolady. Biraq bul joly onyń ómirine ákesiniń ákesi — burynǵy dıplomat aralasady. Eki atanyń arasynda nemeresiniń mahabbatyna talas bastalady. Al jańa atanyń jumbaq ári qaýipti ótkeni ashylǵanda, kimniń shyn máninde jaqyn ekenin kórsetýge múmkindik týady.
Sıqyrshylar mektebi (Shkola volshebnıkov)
Reıtıng: 6.9
Janry: fentezı, otbasylyq.
Uzaqtyǵy: 110 mınýt
El: Chehııa, 2026
Rejısseri: Petr Kýbık, Lýkash Parık
Arıana sıqyrly álemniń bar ekenin elestetken de emes. Alaıda alhımık Arhıbald ony tuman basqan taýlarda ornalasqan qupııa sıqyrshylar mektebine shaqyrady. Kóne qabyrǵalardyń arasynda qyz jańa dostar taýyp, tylsym qupııalardy ashady. Biraq kóp uzamaı ol sıqyrly artefaktiniń sońyna túsken qaýipti sıqyrshy Mýrıenge qarsy turýǵa májbúr bolady.
Djotto. Qaıta órleý dáýiriniń bastaýy (Djotto. Predchývstvıe Renessansa)
Janry: derekti fılm, óner
Uzaqtyǵy: 95 mınýt
El: Italııa, 2023
Rejısseri: Franchesko Invernıtstsı
Fılm XIV ǵasyrdaǵy Padýıa qalasynyń óner jáne mádenıet ortalyǵy retinde qalyptasý tarıhyn baıandaıdy. Onda Djottonyń áıgili freskalary men tarıhı sáýlet eskertkishteri kórsetiledi. Sondaı-aq, qalanyń Qaıta órleý dáýirine qosqan úlesi baıandalady.
Ótken aptadaǵy kınopremeralar tizimin osy jerden kóre alasyzdar.
