Aptanyń jańa kınopremeralaryna sholý
ASTANA. KAZINFORM — Osy aptada kınoteatrlar túrli janrdaǵy jańa fılmdermen tolyqty. Kórermen kópten kútken «Moana» fılmi de úlken ekranǵa jol tartty. Sonymen qatar qorqynyshty janrdaǵy úsh fılmniń premerasy ótip, tórt drama kórermen nazaryna usynyldy. Otandyq kıno qorjyny da eki jańa týyndymen tolyqty. Osylaısha, apta repertýary janrlyq ártúrliligimen erekshelenip, kıno súıer qaýymǵa tańdaýǵa mol múmkindik berdi.
Kazinform tilshisiniń sholýynda osy aptadaǵy eń basty kınopremeralardy usynamyz.
Kollaj: Kazinform/ Kino.kz
Aǵaıyndylar
Janry: drama, qylmys
Uzaqtyǵy: 90 mınýt
El: Qazaqstan, 2026 jyl
Rejısseri: Ernat Baıuzaq
Otbasy, paryz jáne jaqyndaryn qutqarýdyń quny týraly shıelenisti krımınaldyq drama. Fılmde anasy men qara shańyraqtan aıyrylyp qalý qaýpine tap bolǵan eki aǵaıyndynyń oqıǵasy baıandalady. Jaqyndary aman alyp qalý úshin olar zańdy attap, qaýipti qylmys álemine aralasýǵa májbúr bolady. Tyǵyryqqa tirelgen aǵaıyndylar aldynda adamgershilik tańdaý men otbasylyq qaıshylyqtar qatar órbıdi. Oqıǵa jelisinde mahabbat pen opasyzdyq, adaldyq pen janqııarlyq synǵa túsedi.
Taý adam
Janry: komedııa
Uzaqtyǵy: 73 mınýt
El: Qazaqstan, 2026 jyl
Rejısseri: Maqsat Ospanov
Bir kezderi Beıbit Ystybaevtyń esimin búkil el biletin. Qazaq kúresinen álem chempıony atanǵan ol sporttyq mansabyn aıaqtaǵan soń ómirdiń jańa synaqtaryna tap bolady. Osy kezde Beıbit ómirden óz ornyn taba almaı júrgen erke minezdi stýdent Nurıslamǵa tálimger bolady. Qarapaıym jattyǵýdan bastalǵan bul qarym-qatynas kóp uzamaı ekeýiniń de kózqarasyn ózgertedi. Olar talaı synaqtan birge ótedi. Jeńilis pen alǵashqy mahabbatty, qorqynysh pen kúmándi eńserip, naǵyz jeńistiń qarsylasty emes, ózińdi jeńý ekenin túsinedi. «Taý adam» — tálimger men shákirt arasyndaǵy senim, ekinshi múmkindik jáne jiger týraly sporttyq dramedııa.
Bir-aq tún, (Vsego odna noch)
Janry: drama, komedııa, melodrama
Uzaqtyǵy: 103 mınýt
El: AQSh, 2026 jyl
Rejısseri: Ýıll Glak
Nıý-Iorkte jylyna bir ret jynystyq qatynasqa zańmen ruqsat etiledi. Dál osy erekshe kúni Oýen men Ellı kezdeısoq tanysyp, bir-birine ǵashyq bolady. Alaıda sezimge boı aldyrǵan qos keıipkerdiń baqytqa bastar jolynda kútpegen kedergiler kóp bolady.
Moana
Reıtıng: 5,9
Janry: ekshn, shytyrman oqıǵa, komedııa, mıýzıkl, fentezı, otbasylyq
Uzaqtyǵy: 120 mınýt
El: AQSh, Jańa Zelandııa, 2026 jyl
Rejısseri: Tomas Kaıl
Moana muhıttyń kezekti shaqyrýyna qulaq asyp, Motýnýı aralynyń rıfinen alǵash ret asyp ótedi. Ol ataqty jartylaı qudaı Maýımen birge teńizge attanyp, jańa ári qaýipti saparǵa shyǵady. Alda olardyń halqyna baq-bereke ákeletin umytylmas saıahat kútip tur.
Robın Gýdtyń ólimi, (Smert Robın Gýda)
Reıtıng: 6,0
Janry: ekshn, shytyrman oqıǵa, drama
Uzaqtyǵy: 122 mınýt
El: AQSh, 2026 jyl
Rejısseri: Maıkl Sarnoskı
Shervýdtyń áıgili batyry, «Urylar hanzadasy» atanǵan Robın Gýd kópten beri qaraqshylyqpen aınalyspaıdy. Alaıda ony izdeý áli de toqtaǵan joq. Odan kek alǵysy keletinder de az emes. Únemi qaýip-qaterdiń ortasynda júrgen Robın Gýd jasyrynyp, óziniń shyn esimin qupııa ustaıdy. Biraq ol ótkeninen qansha qashsa da, bir kúni ózi týraly shyndyqty aıtýǵa tıis.
Jarqyraıtyn ýaqyt, (Vremıa sııat)
Janry: drama, sport, fentezı
Uzaqtyǵy: 120 mınýt
El: Ońtústik Koreıa, 2026 jyl
Rejısseri: Kım Son-ho
Bul — jasóspirimniń eseıip, ómirdegi óz ornyn tabýy týraly sporttyq drama. Fılmniń basty keıipkeri — beısbol oınaıtyn mektep oqýshysy. Ol qatarlastarynyń qorlyǵyna tótep berýge tyrysady. Osy kezde synypqa jumbaq minezdi jańa oqýshy keledi. Ekeýiniń arasynda berik dostyq qalyptasady. Keıin jańa synyptasy jas sportshynyń komandadaǵy menedjeri bolyp, qıyndyqtardy eńserip, ózine degen senimin arttyrýǵa kómektesedi.
Іsh, je. Duǵa et. Aryqta, («Esh. Molıs. Hýdeı»)
Reıtıng: 5,6
Janry: qorqynyshty fılm
Uzaqtyǵy: 113 mınýt
El: Avstralııa, 2026 jyl
Rejısseri: Natalı Erıka Djeıms
Medıtsına fakýltetinde oqıtyn qyz bir jigitke ǵashyq bolady. Alaıda artyq salmaǵyna uıalyp, onymen tanysýǵa batyly jetpeıdi. Jigitke unaý úshin ol aryqtaýdyń qaýipti tásiline júginedi. Qyz adam kúlin taǵam retinde jeı bastaǵanda, ashqaraq zulym rýhtyń qurbanyna aınalady.
Qara taýdyń jyndary, (Demony Chernoı gory)
Janry: shytyrman oqıǵaly qorqynyshty fılm
Uzaqtyǵy: 107 mınýt
El: Indonezııa, 2026 jyl
Rejısseri: Jose Poernomo
Jigitinen 24 saǵat boıy habar bolmaǵan soń, mektep oqýshysy Avındııa ony izdeýge shyǵady. Oǵan eki qurbysy — Agnes pen Modjo qosylady. Úsheýi Merbabý taýyna attanady. Taýda olar qara magııanyń qurbany bolǵan taý qaraýylynyń qaza tapqanyn biledi. Jaqyndaryn osy taýda joǵaltqan Ioga men Dıska da izdeý tobyna qosylady. Beseýi joǵalǵan jaqyndaryn tabý úshin taýdaǵy jumbaq oqıǵalardyń syryn ashady. Sonymen qatar olar jańa Kýnsenniń kim ekenin anyqtaýǵa tyrysady.
Demonolog
Janry: horor
Uzaqtyǵy: 104 mınýt
El: Japonııa, 2026 jyl
Rejısseri: Deıv Boıl
Qala syrtyndaǵy qonaqúıdiń jańa ıeleri kelýshilerdi qorqytyp júrgen elesti qýyp shyǵý úshin Aırı esimdi jyn qýýshy qyzdy jaldaıdy. Alaıda Aırı kóp uzamaı onyń qarapaıym eles emes, óliler men tiriler álemine birdeı tıesili jyn ekenin túsinedi. Onyń basty erejesi — túnde eshqashan jumys istemeıdi. Biraq jyndy jeńý úshin ol bul qaǵıdasyn buzyp, ózi qorqatyn qarańǵylyqqa betpe-bet kelýge májbúr bolady.
Ótken aptadaǵy kınopremeralar tizimin osy jerden kóre alasyzdar.
