Aptanyń kınopremeralary: Qazaqstan kınoteatrlarynda ne kórýge bolady
ASTANA.KAZINFORM — Jańa kınoaptanyń bastalýymen kórermenderdi qyzyqty premeralar kútip tur. Aldaǵy kúnderi nazar aýdarýǵa turarlyq fılmder týraly Kazinform tilshisiniń materıalynan oqyńyz.
«Ystyq uıa»
Qazaqstandyq rejısser Darhan Qarıpovtyń dramalyq fılmi.
Birneshe jyl Koreıada jumys istegen soń, Ǵalııa týǵan aýylyna óz qarajatyna turǵyzǵan ata-anasynyń úıine oralady. Jańa úıge qonys toıǵa týystary jınalady, bastapqyda bári onyń oralýyna qýanyshty sııaqty kórinedi. Alaıda ortaq dastarqan basynda árkimniń úıge degen shyn nıeti men kózqarasy birtindep ashyla bastaıdy.
Aǵaıyndary — Abaı men Ermek, kishi sińlisi Álııa jáne jezdesi Shalqar árqaısysy úıdiń bolashaǵyna qatysty óz pikirin aıta bastaıdy. Ýaqyt óte kele jasyryn qalǵan renishter, básekelestik, ókpe-naz ben buryn aıtylmaǵan syrlar syrtqa shyǵyp, otbasy qatynasyndaǵy shynaıy bolmysty aıqyn kórsetedi.
«Avatar: Sý joly» (qaıta kórsetilim)
Djeıms Kemeronnyń ańyzǵa aınalǵan fılminiń jalǵasy — «Avatar: Sý joly» qaıtadan úlken ekranǵa oraldy. Fılm kórermenderdi qaıtadan Pandora ǵalamsharyna jeteleıdi, munda Djeık Sallı men Neıtırı qazir otbasyn tárbıelep otyr.
Biraq olardyń tynysh ómirine jańa qaýip tónedi. Keıipkerler úıin tastap, Pandoranyń muhıttaryn zertteýge jáne jańa taıpalar men syn-qaterlermen betpe-bet kelýge májbúr bolady.
Fılm zamanaýı vızýaldy effektilerdiń sońǵy tehnologııalaryn qoldaný arqyly jasalǵan tamasha sýasty álemine qaıta boılaýǵa múmkindik beredi.
«Kereksiń»
Qazaqstandyq drama. Bul jas erli-zaıypty Ádilet pen Aıjannyń hıkaıasy.
Olardyń tynysh ári qarapaıym ómiri bir sátte astan-kesten bolady. Aıjannan tórtinshi satydaǵy qaterli isik anyqtalady, dárigerler oǵan az ýaqyt qalǵanyn aıtady.
Ádiletke búkil otbasynyń jaýapkershiligin moınyna alýyna týra keledi, bir jarym jastaǵy Nazik pen alty jastaǵy Inaıaǵa qamqor bolyp, olarǵa áke de, ana da bolý qajet. Aýyr dıagnozǵa qaramastan, ol sońyna deıin kúresýge jáne Aıjanǵa ómir súrýge múmkindik syılaý úshin baryn salýǵa bel býady.
«Ot ishindegi álem»
Kúnniń joıqyn jarqyly Jerdiń shyǵys jarty sharyn kúlge aınaldyrǵannan keıin, álem haosqa túsedi.
Osy dúrbeleńniń ortasynda qazyna izdeýshi ómirindegi eń qaýipti urlyqty júzege asyrýǵa sheshim qabyldaıdy. Onyń maqsaty álemdegi eń tanymal týyndy, «Mona Lızany» urlaý. Bul týyndy qazir planetadaǵy eń qaýipti jerde jasyrylǵan. Biraq sonymen birge ol álemdi de qutqarýǵa tyrysady eger, oǵan bul mıssııany oryndaý buıyrsa.
«Baýyrlar murasy»
Eshqashan kezdespegen eki nemere baýyr ǵasyrlar boıy jınalǵan otbasylyq daýlar men kelispeýshilikterdiń túıinin sheshýge májbúr bolady.
Irlandııalyq Kıaran ákesiniń sońǵy ósıetin oryndap, Nıý-Iorkten kelgen nemere inisi Barrıdi Irlandııaǵa shaqyrady. Kúndelikti tirshilikten sharshaǵan Barrı bul usynysty qabyl alady.
Alaıda jyly qabyldaýdan keıin Barrıdiń Kıarannyń ákesinen qalǵan muranyń jartysyna ıe bolǵany belgili bolady. Bul jańalyq olardyń arasyndaǵy qatynasty kúrt shıelenistirip jiberedi.
«Tozaq úıi: Іbiliske túsý»
Vanessa túsinde úreıli elesterdi kóredi. Olar ony «Abaddon qonaqúıine» — «Tozaq úıi» degen atpen belgili qarǵys atqan jerge jeteleıdi.
Oǵan jýrnalıst jolyǵyp, bul qonaqúıdiń, Karmaıkldar áýletiniń ıeliginiń jáne uzaq jyl boıy bolǵan jumbaq ólimderdiń arasynda baılanys baryn aıtady.
Vanessa kóp jyl burynǵy qaıǵyly oqıǵa ejelgi jyn-perini oıatqanyn biledi. Endi «Tozaq úıi» jańa qurbandar izdeýde. Vanessa óz túsi shyndyqqa aınalmaı turyp, jynnyń qarǵysyn toqtatýdyń amalyn tabýy tıis.