Aptanyń kınopremeralary: Qazaqstan kınoteatrlarynan ne kórýge bolady
ASTANA. KAZINFORM — Bul apta kórermenderdi qyzyqty premeralarmen qýantty. Aldaǵy kúnderi qandaı fılmder kórýge turarlyq ekenin bilý úshin Kazinform tilshisiniń materıalyn oqyńyz.
Rýyń kim?
2 kún buryn prokatqa shyqqan komedııa – otbasyńyzben demalýǵa taptyrmas tańdaý. 85 mınýtqa sozylatyn fılmniń rejısseri – Áset Jumaqan.
Biz ata-babamyz týraly qanshalyqty tereń bilemiz? Tiger Films stýdııasynyń jańa komedııasynda keıipkerler osy suraqtyń jaýabyn izdep, jeti atasyn túgendeýge kirisedi. Olar ózderiniń qaı rýdan ekenin anyqtaýǵa bel býady. Óıtkeni ár rý – ǵasyrlar boıy qalyptasqan tarıh, maqtanysh jáne keıde «eń tekti bolýǵa» degen jasyryn báseke. Bolashaq qudalarmen kezdeser aldynda basty keıipkerler ózderiniń shyqqan tegi týraly túsinikteri durys pa, joq pa – sony anyqtaýǵa tyrysady. Naqty jaýap alý úshin olar genetık mamandarǵa júginedi. Al genetıkalyq zertteý olardy kútpegen, qyzyq ári kúlkili jaǵdaılarǵa ákeledi. Osynyń bárin qyzyqty da oı salatyn «Rýyń kim?» komedııasynan kóre alasyzdar!
Tynysh tún, ólim túni
11 jeltoqsannan bastap kórermen nazaryna usynylǵan amerıkalyq horror janryndaǵy fılm. Rejısseri – Maık Pı Nelson.
Bir kezderi Bıllıdiń ata-anasyn Santa-Klaýs keıpinde jasyrynǵan adam aıaýsyz óltirip ketken edi. Jyldar ótken soń Bıllıdiń ózi osy keıipke enip, merekede qyrǵyn shyǵaryp, kinálilerdi jazalaýdy josparlaıdy. Endi Santanyń kostıými jaı qyzyl túske emes, qanǵa boıalady. Al oǵan baǵynbaıtyndardyń bárin naǵyz qorqynyshty Jańa jyl kútip tur.
Ǵajaıyptar muhıty
Qytaılyq rejısser Tıan Sıaopen usynǵan fantastıkalyq bul mýltfılm de beısenbi kúni prokatqa shyqty. 112 mınýtqa ulasatyn tańǵajaıyp týyndy balańyzǵa unary anyq.
Shensıý anasyn qatty saǵynady, biraq ákesi men ógeı anasy onyń jaǵdaıyna mán bermeıdi – olardyń bar nazary kishi balalarynda. Qyzdyń týǵan kúninde otbasy teńiz krýızine shyǵady, alaıda ata-anasy Shensıýdi emes, kishi uldaryn quttyqtaıdy. Keshke daýyl soǵyp, Shensıý teńizge qulap ketedi. Sol jerde ol alyp kózdi jumbaq jaratylyspen kezdesedi. Ol ózin anasyna jetkizedi dep senedi. Osylaısha Shensıý sıqyrly álemge jáne «Tereń teńiz» atty qalqymaly meıramhanaǵa tap bolady. Meıramhanany qutqarý úshin Shensıý bas aspaz Nanhemen kelisim jasaıdy: meıramhana bes juldyz alǵanǵa deıin ol ashanada jumys isteıdi, al Nanhe sol jaratylysty bosatýǵa ýáde beredi.
Stıch-Hed. Qubyjyqtar qorǵaýshysy
Ulybrıtanııa, Frantsııa, Germanııa, Lıýksembýrgte taspalanǵan mýltfılmniń rejısseri – Stıv Hadson.
Balańyz qııalyna erik berip, kúlip qaıtsyn deseńiz, 1 saǵat 32 mınýtqa kınoteatrǵa jiberińiz.
Oqıǵa eski qamal munarasynda órbıdi. Onda esi aýysqan professor túrli qubyjyqtardy jasap shyǵarady, biraq tez jalyǵyp, olardy qaraýsyz qaldyrady. Qamqorlyqty meıirimdi Stıch-Hed óz moınyna alyp, ár qubyjyqqa baqytty ómir syılaýǵa tyrysady. Biraq olardyń tynyshtyǵy uzaqqa sozylmaıdy. Qamalǵa zulym kóshpeli tsırk dırektorynyń nazary aýady. Endi kishkentaı qubyjyqtar birigip, dostyq pen batyldyq tanyta alatynyn dáleldeýge týra keledi.
Úsh mysyq. Ýaqyt saıahaty
Balańyzdyń 1 saǵat 6 mınýtyn alatyn taǵy bir qyzyqty anımatsııalyq fılm usynamyz. Reseılik rejısser Dmıtrıı Vysotskıı usynatyn «Úsh mysyq. Ýaqyt saıahaty» mýltfılmi balańyzǵa unary anyq.
Mysyqtar otbasy ata-anasynyń tanysqanyna 10 jyl tolýyn atap ótpek. Daıyndyq ústinde olar ájesi Izoldaǵa ǵylymı ortalyqtan arnaıy syılyq alýǵa barady. Sol jerde otbasy eski dıvanǵa kezigip, onyń ýaqyt mashınasy ekenin baıqaıdy. Osy sátten bastap olar kútpegen ári qyzyqqa toly ýaqyt saıahatyna attanady.
Aqsha ańshysy
Al ózińizge trıller janryndaǵy oılanarlyq fılm izdep júrseńiz, German ıAýdyń «Aqsha ańshysyn» kórińiz. Qytaıda túsirilgen týyndynyń uzaqtyǵy – 1 saǵat 50 mınýt.
Qarjy fakýltetiniń stýdenti Gao Han – ambıtsııasy joǵary, bilimine senimdi jas. Ol ekonomıkalyq álemdi jaqsartýdy armandaıdy. Al oǵan dosy Chý Fenniń otbasy kómektesip, iri bankte taǵylymdamadan ótý múmkindigin beredi. Onda Gao Han bedeldi ýnıversıtetterdiń túlekterimen jáne yqpaldy baılanystary bar adamdarmen qatar jumys isteıdi. Alaıda ony alda mańyzdy kásibı synaqtar kútip tur. Endi Gao Han qarjy salasyndaǵy jasyryn qaýipterge tótep bere alatynyn dáleldeýi kerek.
Aıta keteıik, jaqynda Mańǵystaýda Djekı Channyń qatysýymen fılm túsiriledi.