Aptanyń kınopremeralary: detektıvten horrorǵa deıin – jańa fılmder kórermen nazaryna usynyldy
ASTANA. KAZINFORM — Osy aptada Qazaqstan kınoteatrlarynda otbasylyq anımatsııalyq hıkaıalardan bastap, romantıkalyq komedııalar men tartysty trıllerge deıingi birqatar jańa fılm kórermen nazaryna usynyldy. Aldaǵy kúnderi kınoteatrdan qandaı jańa fılm kórýge bolatynyn Kazinform tilshisiniń sholýynan bile alasyz.
OIYN 6.6⭐
Qyrǵyzstanda túsirilgen detektıv-trıllerdiń uzaqtyǵy – 1 saǵat 32 mınýtqa sozylady. Fılmniń rejısseri – Aıbek Bektemırov.
Qalada qoǵamǵa zııan keltirgen adamdardy nysanaǵa alatyn erekshe manıak paıda bolady.
Onyń qurbandarynyń qatarynda alaıaqtar, jemqorlar, esirtki taratýshylar, pedofılder jáne basqa da qylmyskerler bar. Kúrdeli ári jumbaq isti tergeýge detektıv Qalys kirisedi. Ol kisi ólimderiniń artynda jatqan shyndyqty ashyp, qurbandar men qylmysker arasyndaǵy baılanysty anyqtaýy kerek.
PRIMAT 8.0⭐
AQSh-tyq horror fılmniń uzaqtyǵy – 1 saǵat 29 mınýt. Rejısseri – Iohannes Roberts.
Lıýsı dostarymen birge Gavaııde turatyn ákesi Adam men qaryndasy Erınge jáne olardyń úıde asyrap otyrǵan shımpanzesi Benge qonaqqa keledi. Adam jankúıerlerimen kezdesýge ketkende, Lıýsı úıde kesh uıymdastyrady. Alaıda dostary Benniń basqa bir janýardan qutyrma aýrýyn juqtyrǵanyn bilmeıdi. Kesh bastalǵan sátten-aq prımattyń minezi ózgere bastaıdy, beıqam demalys qorqynyshty tirshilik úshin kúreske aınalady.
MEIІRІMDІ DÁRІGER (Dobryı doktor) 5.5⭐
Fılm reseılik rejısser Nıkıta Grammatıkovtyń týyndysy. Uzaqtyǵy – shamamen 1 saǵat 30 mınýt.
Minezi aýyr, adamdarmen kóp aralaspaıtyn dáriger Oleg Semenovıch Mandrygın men qarapaıym jas kýrer Dımanyń joly kútpegen sátte qıylysady. Samokatpen kele jatyp dárigerge soǵylǵan Dıma onyń ornyna shaqyrtýlarǵa barýǵa májbúr. Osylaısha ózin naǵyz dárigerdeı kórsetýge tyrysqan jas jigit kúlkili ári tosyn jaǵdaılarǵa tap bolady.
QYZMETShІ QYZ (Gornıchnaıa) 8.8⭐
AQSh-ta túsirilgen trıller-dramanyń uzaqtyǵy – 2 saǵat 11 mınýt. Al rejısseri – Pol Fıg.
Mıllı ómirin jańa paraqtan bastaýdy armandap, Vınchesterler áýletiniń sán-saltanaty jarasqan záýlim úıine qyzmetshi bolyp ornalasady. Alaıda jabyq esikter men qatań erejelerdiń artynda sumdyq qupııa jasyrynǵan. Mıllı shyndyqqa jaqyndaǵan saıyn, óziniń de ótken ómirindegi jasyryn syrlary ashyla bastaıdy. Fılm kórermendi qatty tolǵandyryp, kerneýli atmosferasyn sońyna deıin saqtaıdy.
SINISTER. ALǴAShQY QARǴYS (Sınıster. Pervoe proklıatıe) 5.9⭐
Kezekti AQSh-tyq týyndy boıyńyzdy úreıge bóleıdi. Ýıll Kenonnyń horror janryndaǵy fılmi 1 saǵat 27 mınýtqa sozylady.
Naomı balalyq shaǵy ótken úıine qaıta oralǵanda, marqum ákesiniń jazbasyn tabady. Onda zulymdyqtyń qaıta oralǵany týraly eskertý bar. Qalada balalar joǵalyp, Naomıdiń ulynyń minez-qulqy ózgerip ketedi. Jergilikti ańyzǵa sáıkes, balalardyń jandaryn bir tylsym kúsh urlap áketedi. Ulyn qutqarý úshin Naomı bul zulymdyqtyń qaıdan shyqqanyn anyqtaýǵa tyrysady.
PROSTOKVAShINO 4.3⭐
Reseılik otbasylyq shytyrman oqıǵanyń uzaqtyǵy – 1 saǵat 45 mınýt. Rejısseri – Sarık Andreasıan.
Janýarlardy jaqsy kóretin Dıadıa Fedor esimdi bala ata-anasynyń tyıymyna qaramastan, mysyq Matroskın men adal ıt Sharıkti ertip, Prostokvashıno aýylyna ketedi. Alda olardy qyzyqty ári kóńildi shytyrman oqıǵalar kútip tur. Mýltfılm otbasymen birge ýaqyt ótkizgisi keletin kórermenge arnalǵan.
JALǴAN SANTA (Ne tot Santa) 4.5⭐
Bul AQSh-ta túsirilgen melodrama. Fılmniń uzaqtyǵy 1 saǵat 35 mınýtqa sozylady. Rejısseri – Ross Kagan Marks.
Santa-Klaýs óziniń nemere aǵasy Koltonnan kómek suraıdy. Ol Nıý-Meksıkodaǵy shaǵyn qalaǵa baryp, merekelik kóńil kúıdi qaıta jandandyrýy kerek. Sol jerde ol uly Zak úshin merekeni erekshe etkisi keletin Natalımen tanysady. Ortaq maqsat olardy bir-birine jaqyndata túsedi. Fılm mereke atmosferasyn sezingisi keletin kórermen úshin taptyrmas tańdaý.
Ótken aptadaǵy kınopremeralar tizimin osy jerden kóre alasyzdar.