Aptadaǵy premeralar: eldegi kınoteatrlardan ne kórýge bolady
Jańa apta bastalǵanda kórermen kınopremera kútip, eleńdep otyrady. Kazinform agenttiginiń tilshisi taıaý kúnderi kópshilik nazaryna usynylatyn fılmderge sholý jasaıdy.
Aýrý
Bul qazaqstandyq dramalyq trıller. Azamat pen Tańsholpan — jas otbasy. Olar qaryzǵa belshesinen batyp, tyǵyryqtan shyǵar jol izdeıdi. Sol kezde Azamat áıeliniń aıyqpas dertke shaldyqqanyn elestetip, «emge» dep aqsha jınaýdy josparlaıdy. Alǵashynda adam janyn aýyrtatyn beınerolık túsirip, jalǵan qujat jasatady. Sol kezde esepshotqa aqsha túse bastaıdy. Keıin qunyǵyp ketip, erli-zaıypty ózi qazǵan orǵa ózi túsedi. Ár qadam saıyn sátsizdikke ushyrap, bári de aldynan shyǵady.
Aldaý elesi 3
Ozyq oıly tórteý ekranǵa qaıta oraldy. Bul joly olar sıqyr, tehnologııa, aldap-arbaýdyń jańa úlgisin kórsetedi. Tórttik qaıta jumyldy, janyna ózderi sekildi jas sıqyrshylardy qosyp aldy. Sóıtip qylmys áleminiń serkesine tıesili álemdegi eń úlken almazdy urlaıdy.
Allo
Óz ómirine óziniń kóńili tolmaı júrgen Sabyr eski telefon taýyp alyp, kútpegen jerden qońyraý shalady. Sóıti 2004 jylmen baılanys ornady. Ótkendi ózgertip, jibergen qatelikterin túzetpek bolǵan ol tutqanyń arǵy jaǵyndaǵy ózine aqyl-keńesin bere bastaıdy. Biraq bul ózgeris búgingi ózine keri áserin tıgizip, quldyraıdy.
Qashqyn adam
28 jastaǵy Ben Rıchards aýyr dertke shaldyqqan qyzyn emdetý úshin «Qashqyn adam» qaýipti realıtı-shoýyna qatysady. Ol osy arqyly balasyna kómektesýdi oıǵa aldy. Kásibı «ańshylar» bul shoýdyń qatysýshylaryn álemniń túkpir-túrkipinen izdep tabý úshin joryqqa shyǵady. Al qatysýshylar bolsa ár mınýt saıyn ómir úshin kúresedi.
Ol. Meıpl-strıttegi qorqynyshty tús
Maıkıdiń anasy aljı bastaǵanda onyń qorqynyshty tústeri shyndyqqa aınala bastaıdy. Keıin bári ózgerip, ár sát onyń taǵdyrynda tereń iz qaldyrady. Qıyndyq kóbeıip, ol urpaqtan urpaqqa sozylady. Ólim-jitim kóp bolady.
Aıta keteıik, Sh. Aımanov atyndaǵy «Qazaqfılm» ulttyq kınostýdııasy bıyl Frantsııanyń Kann qalasynda ótken MIPCOM 2025 halyqaralyq televızııalyq kórmesine qatysty. Bul týraly Mádenıet jáne aqparat mınıstrligi habarlady.