Apta ishindegi kadrlyq taǵaıyndaýlar
ASTANA. KAZINFORM — Osy apta ishinde elimizdiń birqatar memlekettik organ men bilim ınstıtýttarynda mańyzdy kadrlyq aýys-túıister boldy.
Apta basynda Prezıdent janyndaǵy Memlekettik basqarý akademııasynyń Tsıfrlandyrý jáne ınnovatsııalar ınstıtýtynyń dırektory bolyp Murat Qojanovtyń taǵaıyndaldy.
Prezıdenttik jastar kadr rezerviniń múshesi, «Bolashaq» baǵdarlamasynyń túlegi Murat Ǵalıasqaruly buǵan deıin joǵary oqý oryndary júıesinde tsıfrlandyrý jáne kıberqaýipsizdik baǵyttary boıynsha basshylyq qyzmetter atqarǵan.
Ol 1992 jylǵy 26 tamyzda Qaraǵandy qalasynda dúnıege kelgen. Prezıdenttik jastar kadr rezerviniń múshesi jáne «Bolashaq» baǵdarlamasynyń túlegi.
Eńbek jolyn 2015 jyly Qaraǵandy memlekettik tehnıkalyq ýnıversıtetinde kafedra zerthanasynyń meńgerýshisi bolyp bastaǵan.
2015–2025 jj. Ábilqas Saǵynov atyndaǵy Qaraǵandy tehnıkalyq ýnıversıtetinde basshylyq jáne ǵylymı-pedagogıkalyq qyzmetter atqardy.
Sondaı-aq 2025 jyldyń aqpan aıynan bastap Ábilqas Saǵynov atyndaǵy Qaraǵandy tehnıkalyq ýnıversıtetiniń «Kıberqaýipsizdik jáne jasandy ıntellekt» kafedrasynyń meńgerýshisi qyzmetin atqaryp keledi.
Sonymen qatar, Qyzylorda oblysynda jańadan qurylǵan tsıfrlyq tehnologııalar basqarmasynyń basshysy bolyp Sabıt Ibadýlla taǵaıyndaldy.
Oblys ákimi jańa basshyǵa jasandy ıntellektini damytý, ınvestıtsııa tartý jáne aqparattyq qaýipsizdikti kúsheıtý boıynsha naqty mindetter júktedi.
Sabıt Ibadýllauly 1986 jyly Qyzylorda qalasynda dúnıege kelgen. Qorqyt ata atyndaǵy Qyzylorda memlekettik ýnıversıtetinde ınformatıka, Qaraǵandy ekonomıkalyq ýnıversıtetinde ekonomıka mamandyqtary boıynsha bilim alǵan.
Sábıt Ibadýllanyń bul salada, sonyń ishinde polıtsııa departamentindegi tsıfrlandyrý baǵytynda tájirıbesi mol.
Ár jyldary Qorqyt ata atyndaǵy Qyzylorda memlekettik ýnıversıtetinde baǵdarlamashy, aǵa oqytýshy, kafedra meńgerýshisi qyzmetterin atqarǵan. 2018- 2024 jyldary oblys ákimdigi janyndaǵy aqparattyq tehnologııalar ortalyǵyn, oblys ákimi apparatynyń tsıfrlyq tehnologııalar bólimin basqardy.
Eske sala keteıik, 2025 jyldan búgingi kúnge deıin oblystyq polıtsııa departamenti bastyǵynyń tsıfrlandyrý salasyna jetekshilik jasaıtyn orynbasary qyzmetin abyroımen atqaryp kelgen.
Túrkistan oblysynyń ekologııa departamentinde de basshy aýysty. Bul laýazymǵa Baıbatyr Musabek taǵaıyndaldy.
Ol 1998 jyly Túrkistan qalasynda dúnıege kelgen. L. N. Gýmılev atyndaǵy EUÝ-dy «Memlekettik jáne jergilikti basqarý» mamandyǵy boıynsha jáne QR Prezıdenti janyndaǵy Memlekettik basqarý akademııasy magıstratýrasyn «Memlekettik saıasat» mamandyǵy boıynsha bitirgen.
Eńbek jolyn 2018 jyly «KazAgroQarjy» AQ menedjeri bolyp bastaǵan. 2019-2020 jyldary QR Aýyl sharýashylyǵy mınıstrligi Investıtsııalyq saıasat departamentiniń sarapshysy, 2020-2021 QR Aýyl sharýashylyǵy mınıstrligi Halyqaralyq yntymaqtastyq jáne ınvestıtsııa tartý departamentiniń sarapshysy qyzmetin atqardy.
2021-2025 jyldary QR Aýyl sharýashylyǵy mınıstriniń kómekshisi, 2025 jyly QR Parlamenti Májilisi depýtatynyń kómekshisi boldy.
Aıta keteıik, 2025 jyldyń shildesinen bastap Jambyl oblysy boıynsha ekologııa departamenti basshysynyń orynbasary, Bas memlekettik ekologııalyq ınspektory qyzmetin atqaryp kelgen edi.
Al Atyraý oblysynda qurylys, sáýlet jáne qala qurylysy basqarmasynyń basshysy laýazymyna Narıman Bıǵalı taǵaıyndaldy.
Narıman Bıǵalı H. Dosmuhamedov atyndaǵy Atyraý memlekettik ýnıversıtetin «Tarıh», Batys Qazaqstan ınjenerlik-gýmanıtarlyq ýnıversıtetin «Quqyq», Qazaqstan ınnovatsııalyq jáne telekommýnıkatsııalyq júıeler ýnıversıtetin «Qurylys materıaldaryn, buıymdaryn jáne konstrýktsııalaryn jasaý» mamandyǵy boıynsha támamdaǵan.
Eńbek jolyn 2011 jyly bastaǵan. Ár jyldarda Atyraý jáne Mańǵystaý oblystary boıynsha Kaspıı óńiraralyq kólik ınspektsııasynda bas maman, «Nýrkapstroıgaz» JShS dırektory, Atyraý oblysy qurylys basqarmasynyń qurylys bóliminde bas maman qyzmetterin atqarǵan.
Sondaı-aq Inder aýdandyq qurylys bólimin, Mahambet aýdandyq turǵyn úı-kommýnaldyq sharýashylyǵy, jolaýshylar kóligi jáne avtomobıl joldary, qurylys jáne turǵyn úı ınspektsııasy bólimin basqaryp, Mahambet aýdany ákiminiń orynbasary bolyp eńbek etken.
Buǵan deıin Atyraý oblysy memlekettik sáýlet-qurylys baqylaýy basqarmasynyń basshysy bolyp jumys istedi.