Apta ishindegi kadrlyq taǵaıyndaýlar
ASTANA. KAZINFORM — Osy aptada 2 oblys ákiminiń orynbasary taǵaıyndalyp, jergilikti memlekettik kirister departamentterinde, qylmystyq-atqarý júıesinde kadrlyq taǵaıyndaýlar boldy.
Atap aıtqanda, Nurjan Kelbýǵanov Temirjol jáne sý kóligi komıtetiniń tóraǵalyǵyna taǵaıyndaldy.
Nurjan Kelbýǵanov 1972 jyly Shyǵys Qazaqstan oblysynda dúnıege kelgen. Ol Almaty temirjol kóligi ınjenerleri ınstıtýtyn jáne M. O. Áýezov atyndaǵy Semeı ýnıversıtetin bitirgen.
Eńbek jolyn «QTJ «UK» AQ – «Almaty jol bólimshesi» fılıalynyń parki boıynsha kezekshi bolyp bastady. Ár jyldary tasymaldaý qujattaryn óńdeý jónindegi operator, stantsııa boıynsha kezekshi, ortalyqtandyrý beketiniń aǵa operatory, jol dıspetcheri jáne birqatar stantsııanyń bastyǵy bolyp jumys istedi.
Sondaı-aq «QTJ «UK» AQ – «Aqmola jol bólimshesi» fılıaly dırektorynyń jedel jumys jónindegi birinshi orynbasary, «QTJ «UK» AQ – «Shyǵys Qazaqstan jol bólimshesi» fılıalynyń dırektory, «QTJ-Júk tasymaly» AQ departamentiniń dırektory, «QTJ-Júk tasymaly» JShS bas dırektorynyń marketıng jáne josparlaý boıynsha orynbasary boldy.
Almaty oblysy ákiminiń ókimimen Ǵanı Maılybaev Almaty oblysy ákiminiń orynbasary laýazymyna taǵaıyndaldy.
Ǵanı Aıdaruly 1987 jyly týǵan. Bilimi — joǵary. 2008 jyly Abaı atyndaǵy qazaq ulttyq pedagogıka ýnıversıtetin «qarjy» mamandyǵy, 2018 jyly Reseı Federatsııasy Prezıdentiniń janyndaǵy Reseı halyq sharýashylyǵy jáne Memlekettik qyzmet akademııasyn «aımaqtyq jáne mýnıtsıpaldy basqarý» mamandyǵy boıynsha bitirgen, 2010 jyly Abaı atyndaǵy qazaq ulttyq pedagogıka ýnıversıtetinde «quqyq jáne ekonomıka negizderi» mamandyǵy boıynsha magıstr dárejesin alǵan.
Eńbek jolyn 2008 Almaty qalasy «Nur Otan» partııasy Bostandyq aýdandyq fılıalynyń esep jáne statıstıka sektorynyń meńgerýshisi bolyp bastaǵan.
Ár jyldary Almaty qalasy «Nur Otan» partııasy Alataý aýdandyq fılıalynyń zańger-konsýltanty, Medeý aýdandyq fılıaly tóraǵasynyń birinshi orynbasary, Almaty qalasy Medeý, Naýryzbaı aýdandary ákiminiń orynbasary, Jambyl oblysy týrızm basqarmasynyń basshysy laýazymdaryn atqarǵan. 2020 jyldyń jeltoqsan aıynan bastap Almaty qalasy mádenıet basqarmasynyń basshysy laýazymynda qyzmet etti.
Jambyl oblysy ákiminiń ókimimen Altaı Sembekuly Áli Jambyl oblysy ákiminiń orynbasary laýazymyna kiristi.
Altaı Sembekuly 1985 jyly Jambyl oblysy Sarysý aýdanynda dúnıege kelgen. Bilimi joǵary. Abaı atyndaǵy Qazaq ulttyq pedagogıkalyq ýnıversıtetin bitirgen.
Eńbek jolyn 2005 jyly «Rahat» Qazaq-Avstrııa birlesken kásiporny AQ-da baılanys ortalyǵynyń qyzmetkeri bolyp bastaǵan. Ár jyldary «Damý» kásipkerlikti damytý qory» AQ sýbsıdııalaý departamentiniń menedjeri, Astana qalalyq sotynyń bas mamany, QR Premer-Mınıstri Keńsesiniń qurylymynda jumys istedi.
Sonymen birge Shymkent qalasy ákiminiń apparat basshysy, kómekshisi, Shymkent qalasy ákimi apparaty basshysynyń orynbasary — hatshylyq meńgerýshisi, Shymkent qalasy Energetıka jáne kommýnaldyq sharýashylyq basqarmasynyń basshysy, QR Indýstrııa jáne ınfraqurylymdyq damý mınıstrligi Kólik komıteti tóraǵasynyń orynbasary, tóraǵasy qyzmetterin atqardy.
2023 jyldyń qarasha aıynan bastap búgingi kúnge deıin QR Kólik mınıstrligi Avtomobıl kóligi jáne kólik baqylaý komıtetiniń tóraǵasy laýazymynda eńbek etip keldi.
Qanat Joltaıuly Baltabekov Qarjy mınıstrligi Memlekettik kirister komıteti Batys Qazaqstan oblystyq memlekettik kirister departamentiniń basshysy boldy.
Qanat Joltaıuly 1996 jyly Qazaq memlekettik agrarlyq ýnıversıtetin «Ekonomıst-býhgalter» mamandyǵy boıynsha, 2005 jyly D. Qonaev atyndaǵy ýnıversıtetin «Zańger» mamandyǵy boıynsha bitirgen.
Eńbek qyzmetin 1996 jyly Almaty qalalyq salyq ınspektsııasynda 1-sanatty maman laýazymynan bastaǵan. Salyq ınspektory, bólim basshysy, aýdandyq basqarma basshysy, sondaı-aq Almaty qalasy men Qaraǵandy oblysy boıynsha Memlekettik kirister departamenti basshysynyń orynbasary qyzmetterin atqarǵan.
2022 jyldyń sáýir aıynan bastap Astana qalasy boıynsha Memlekettik kirister departamenti basshysynyń orynbasary qyzmetinde boldy.
Al Soltústik Qazaqstan oblysy boıynsha memlekettik kirister departamentin Amanjol Jaqanov basqarady.
Amanjol Jaqanov 1974 jyly Qostanaı oblysy Fedorov aýdany Mırnyı eldi mekeninde dúnıege kelgen.
1995 jyly Qostanaı aýyl sharýashylyǵy ınstıtýtyn «Ekonomıst-uıymdastyrýshy» mamandyǵy boıynsha, 2000 jyly Máskeý qalasynda Qazirgi zamanǵy gýmanıtarlyq ınstıtýtty «Quqyqtaný» mamandyǵy boıynsha támamdaǵan.
1997 jyly eńbek jolyn QR Qarjy mınıstrligi Salyq komıteti Qostanaı oblysy boıynsha Salyq komıtetiniń jeke tulǵalarǵa salyq salý bóliminiń 1-sanatty mamany bolyp bastaıdy. Ár jyldary bas maman, bólim basshysy, aýdandyq salyq basqarmalarynyń basshysy, sondaı-aq Qostanaı jáne Batys Qazaqstan oblystary boıynsha Memlekettik kirister departamentteri basshysynyń orynbasary jáne basshysy qyzmetterin atqarǵan.
2020 jyldan bastap osy taǵaıyndaýǵa deıin Aqtóbe oblysy boıynsha Memlekettik kirister departamentin basqardy.
Almaty oblystyq memlekettik kirister departamentiniń basshysy laýazymyna Shyńǵys Ánýarbekov taǵaıyndaldy.
Shyńǵys Ánýarbekov eńbek jolyn 1998 jyly Almaty qalasy Túrksib aýdany boıynsha Salyq komıtetinde maman bolyp bastaǵan. Buǵan qosa ár jyldary Almaty qalasy, Jambyl, Aqmola jáne Qostanaı oblystary boıynsha salyq departamentterinde basshylyq qyzmetter atqardy. 2022 jyldyń tamyz aıynan bastap búginge deıin Astana qalasy boıynsha Memlekettik kirister departamentin basqarǵan.
Pavlodar oblystyq qylmystyq-atqarý júıesi departamentiniń bastyǵy qyzmetine ádilet polkovnıgi Dáýlet Rahymbekov kiristi.
Dáýlet Rahymbekov Aqmola oblysynda týǵan. 1998 jyly Gýmılev atyndaǵy Eýrazııa ulttyq ýnıversıtetin zańger mamandyǵy boıynsha támamdaǵan. Keıinirek QR ІІM-niń B.Beısenov atyndaǵy Qaraǵandy akademııasyn bitirgen.
Áskerı boryshyn ótegen soń 1993-1998 jyldar aralyǵynda Aqmola oblysynyń ishki ister salasynda qyzmet etip, keıinirek Astana qalasy ishki ister basqarmasynda túrli laýazymdardy atqarǵan. 2005-2006 jyldary — Astana qalasy ishki ister departamenti Saryarqa aýdandyq ishki ister basqarmasynyń bastyǵy, 2006-2020 jyldary QR ІІM-niń ortalyq apparatynda túrli laýazymdarda qyzmet etken.
QR ІІM Qylmystyq-atqarý júıesi komıtetiniń ózindik qaýipsizdik basqarmasynyń bastyǵy, Nur-Sultan qalasy boıynsha QAJD bastyǵynyń orynbasary, Astana qalasy boıynsha QAJD bastyǵy laýazymdarynda bolǵan.
Rýslan Ýrazbaev Qylmystyq-atqarý júıesiniń Mańǵystaý oblysy boıynsha departamentiniń bastyǵy boldy.
Rýslan Ýrazbaev Aqtóbe oblysynyń týmasy, ádilet polkovnıgi. 1998 jyly QR ІІM-niń B. Momyshuly atyndaǵy zań kolledjin bitirgen. 2002 jyly Ortalyq Azııa ınnovatsııalyq ýnıversıtetin «Quqyq qorǵaý qyzmeti» mamandyǵy boıynsha támamdaǵan.
Eńbek jolyn Aqtóbe oblysy ІІB-niń № 6 túzetý kolonııasynda jedel bóliminiń jedel ýákili bolyp bastaǵan.
Qaraǵandy oblysy boıynsha QAJ departamenti bastyǵynyń orynbasary, QR ІІM QAJK-niń Jedel basqarmasynyń bastyǵy, Mańǵystaý oblysy boıynsha QAJ departamenti bastyǵynyń orynbasary, Aqtóbe oblysy boıynsha QAJ departamentiniń bastyǵy, Mańǵystaý oblysy boıynsha QAJ departamentiniń bastyǵy.
Qylmystyq-atqarý júıesinde jáne quqyq qorǵaý organdarynda 25 jyldan astam tájirıbesi bar.
Shaımerden Esenkeldıev Aqtóbe oblystyq qylmystyq atqarý júıesi departamentiniń bastyǵy bolyp taǵaıyndaldy.
Ol buǵan deıin Qyzylorda oblysynda dál osy qyzmetti atqardy.
Shaımerden Esenkeldıev Túrkistan oblysynda dúnıege kelgen. Qyzmet jolyn Shymkent qalalyq polıtsııa basqarmasynda bastady. 2003 jyldan bastap Ońtústik Qazaqstan oblysyndaǵy qylmystyq atqarý júıesi departamentinde eńbek etip, túrli qyzmetti atqardy.
2018-2020 jyldar aralyǵynda Shymkent qalasy qylmystyq atqarý júıesi departamenti bastyǵynyń orynbasary boldy.
2020 jyldan bastap kúni búginge deıin Qyzylorda oblystyq qylmystyq atqarý júıesi departamentiniń bastyǵy qyzmetin atqardy. Qazan aıynan bastap Aqtóbe oblystyq qylmystyq atqarý júıesi departamentiniń bastyǵy bolyp taǵaıyndaldy.
Kólik mınıstrligi Avtomobıl joldary komıteti tóraǵasynyń buıryǵymen «Qazaqstan jol ǵylymı-zertteý ınstıtýty» aktsıonerlik qoǵamynyń («QazjolǴZI») prezıdenti qyzmetine Birjan Bısekenuly Kaneshev taǵaıyndaldy.
Birjan Bısekenuly Saratov polıtehnıkalyq ınstıtýtyn men QR Prezıdenti janyndaǵy Ulttyq joǵary memlekettik basqarý mektebin bitirgen. Sonymen qatar, AQSh-taǵy Massachýsets tehnologııalyq ınstıtýtynan iskerlik basqarý magıstri (MBA) dárejesin alǵan.
Eńbek jolyn 1988 jyly kólik kásipornynda bastaǵan. Ár jyldary kólik jáne kommýnıkatsııa, tsıfrlandyrý, halyqaralyq qatynastar salalarynda memlekettik jáne saıası laýazymdardy atqardy.
Sondaı-aq Batys Qazaqstan men Mańǵystaý oblystarynyń jergilikti atqarýshy organdarynda jáne «Samuryq-Qazyna» AQ, «Kazakh Invest» AQ Ulttyq kompanııalarynda basshylyq qyzmetterde bolǵan.