Apta ishinde elimizde bolǵan kadrlyq taǵaıyndaýlar
Ótip bara jatqan apta ishinde ortalyq jáne jergilikti memlekettik organdarda birqatar kadrlyq aýys-túıis boldy, sondaı-aq úsh memlekettegi elshiler taǵaıyndaldy, dep habarlaıdy Kazinform.
***
Serjan Oralbaıuly Ábdikárimov Qazaqstan Respýblıkasynyń Indonezııa Respýblıkasyndaǵy Tótenshe jáne Ókiletti Elshisi laýazymyna taǵaıyndaldy.
S. Ábdikárimov 1976 jyly 11 mamyrda Qaraǵandy qalasynda týǵan. Abaı atyndaǵy Almaty memlekettik ýnıversıtetin jáne Reseı SІM Dıplomatııalyq akademııasyn bitirgen.
Ol 2019 jylǵy qyrkúıekten 2023 jylǵy sáýirge deıin Qazaqstannyń Ázerbaıjandaǵy Elshisi boldy.
***
Tımýr Pirimbetov Qazaqstan Respýblıkasynyń Meksıka Qurama Shtattaryndaǵy Tótenshe jáne Ókiletti Elshisi bolyp taǵaıyndaldy.
Tımýr Vladımırovıch Pirimbetov 1973 jyly 17 qyrkúıekte Almaty qalasynda dúnıege kelgen. Ál-Farabı atyndaǵy Qazaq ulttyq ýnıversıtetin bitirgen. Dıplomatııalyq qyzmetin 1997 jyly Qazaqstan Respýblıkasy Syrtqy ister mınıstrliginiń Eýropa jáne Amerıka departamentinde referent qyzmetinen bastap, sodan keıin attashe jáne úshinshi hatshy qyzmetterin atqardy.
2019 jyldyń qarasha aıynan bastap Qazaqstannyń Meksıkadaǵy Elshisi bolyp taǵaıyndalǵanǵa deıin Qazaqstannyń Latvııadaǵy Elshisi qyzmetin atqardy.
***
Dáýren Káripov Qazaqstan Respýblıkasynyń Latvııa Respýblıkasyndaǵy Tótenshe jáne Ókiletti Elshisi laýazymyna taǵaıyndaldy.
Daýren Aıtbaıuly Káripov 1969 jyly 2 shildede Taldyqorǵan oblysynda dúnıege kelgen. Abylaı han atyndaǵy Qazaq memlekettik álem tilderi ýnıversıtetin bitirgen.
Eńbek jolyn 1994 jyly QR Kólik jáne kommýnıkatsııa mınıstrliginiń mamany retinde bastaǵan. Keıin 1996 jyly Qazaqstan Respýblıkasy Syrtqy ister mınıstrliginiń Bas konsýldyq basqarmasynyń referenti boldy. 1996-1998 jyldary QR SІM Konsýldyq qyzmet departamentiniń attashesi, úshinshi hatshysy boldy. 1998-2001 jyldary QR Germanııadaǵy Elshiliginiń úshinshi hatshysy, al 2001-2003 jyldary QR SІM Konsýldyq qyzmet departamentiniń ekinshi hatshysy boldy.
2022 jyldyń maýsymnan bastap Qazaqstannyń Latvııadaǵy Elshisi retinde taǵaıyndalǵanǵa deıin QR SІM Syrtqy saıası taldaý jáne strategııalyq josparlaý departamentiniń dırektory boldy.
***
Vadım Basın «ArsellorMıtal Temirtaý» AQ Kómir departamentiniń bas dırektory mindetin atqarýshy bolyp taǵaıyndalady.
Aıta keteıik, Vadım Basın 2022 jylǵy 12 qazanda Qaraǵandy oblysy ákiminiń birinshi orynbasary qyzmetine bekitilgen edi.
***
Úkimettiń qaýlysymen Bolat Qabykenuly Beknııaz Qazaqstan Respýblıkasynyń Sý resýrstary jáne ırrıgatsııa birinshi vıtse-mınıstri qyzmetine taǵaıyndaldy.
Bolat Beknııaz 1962 jyly Aqmola oblysynda dúnıege kelgen.
V.I. Lenın atyndaǵy Qazaq polıtehnıkalyq ınstıtýtyn, QR Prezıdenti janyndaǵy Memlekettik qyzmet akademııasyn, V.O. Lomonosov atyndaǵy Máskeý memlekettik ýnıversıtetin, M. Dýlatı atyndaǵy Taraz memlekettik ýnıversıtetin támamdaǵan. Eńbek jolyn 1984 jyly QazSSR ǵylym akademııasynyń Eńbek qyzyl Tý ordeni Q.Sátbaev atyndaǵy geologııalyq ǵylymdar ınstıtýtynyń ınjeneri bolyp bastaǵan.
2016 jyldan bastap qazirge deıin QR Halyqaralyq Araldy qutqarý qorynyń atqarýshy dırektsııasynyń dırektory qyzmetin atqardy.
***
Qazaqstan Respýblıkasy Úkimetiniń qaýlysymen Talǵat Tleýbekuly Lastaev QR Kólik vıtse-mınıstri qyzmetine taǵaıyndaldy.
Talǵat Lastaev 1980 jyly Shyǵys Qazaqstan oblysynda dúnıege keldi. Shyǵys Qazaqstan memlekettik ýnıversıtetin, S. Amanjolov atyndaǵy Shyǵys Qazaqstan memlekettik ýnıversıtetin, QR Prezıdenti janyndaǵy Memlekettik basqarý akademııasyn, Ýkraına Ulttyq avıatsııalyq ýnıversıtetin, Dıýk ýnıversıtetiniń Senford memlekettik saıasat mektebin (Soltústik Karolına, AQSh) bitirdi. Eńbek jolyn 1999 jyly bank salasynda bastady.
2019-2023 jyldary — QR Indýstrııa jáne ınfraqurylymdyq damý mınıstrligi Azamattyq avıatsııa komıtetiniń tóraǵasy.
***
Qazaqstan Respýblıkasy Úkimetiniń qaýlysymen Іlııas Esetuly Ospanov QR Ónerkásip jáne qurylys vıtse-mınıstri qyzmetine taǵaıyndaldy.
Іlııas Ospanov 1986 jyly Astana qalasynda dúnıege kelgen. L.N. Gýmılev atyndaǵy Eýrazııa ulttyq ýnıversıtetin jáne London ımperııalyq kolledjin bitirgen. Prezıdenttik jastar kadr rezerviniń múshesi. Eńbek jolyn 2008 jyly «Astana sý arnasy» MQK ınjeneri bolyp bastady.
2023 jylǵy 30 qańtardan bastap qazirge deıin — QR Indýstrııa jáne ınfraqurylymdyq damý vıtse-mınıstri.
***
Osy aptada Evgenıı Glotov Astana ákiminiń orynbasary bolyp taǵaıyndaldy.
Evgenıı Glotov eńbek jolyn «Qazaqstan jastary kongresi» zańdy tulǵalar birlestiginde bastady. Ár jyldary «Aýyl jastary odaǵy» qoǵamdyq birlestiginde, «GP group» JShS jáne taǵy da basqa mekemelerde jumys istedi.
Keıingi jyldary QR Prezıdenti Ákimshiliginiń Іshki saıasat bólimi meńgerýshisiniń orynbasary, QR Prezıdenti Ákimshiliginiń memlekettik ınspektory qyzmetterin atqardy.
***
Túrkistan oblysy Saýran aýdanynyń ákimi bolyp Maqsat Asylbekuly Tańǵatarov taǵaıyndaldy.
Maqsat Tańǵatarov 1981 jyly Túrkistan qalasynda dúnıege kelgen. Qoja Ahmet ıAsaýı atyndaǵy halyqaralyq qazaq-túrik ýnıversıtetinde «ekonomıka» jáne «quqyqtaný» mamandyqtaryn meńgerdi. Eńbek jolyn 2003 jyly Túrkistan qalalyq bilim bóliminde esepshi bolyp bastady. 2012-2017 jyldar aralyǵynda Túrkistan qalalyq ákimdiginiń ekonomıka jáne qarjy bóliminiń basshysy boldy. 2017-2019 jyldary Túrkistan qalasy ákiminiń orynbasary qyzmetin atqardy.
2021-2023 jyldary Túrkistan qalalyq máslıhatynyń hatshysy, 2023 jyldyń shilde aıynan beri Saýran aýdany ákiminiń orynbasary qyzmetin atqaryp keldi.
***
Soltústik Qazaqstan oblysy ákiminiń orynbasary bolyp Qanat Dúzelbaev taǵaıyndaldy. Osy taǵaıyndaýǵa deıin ol Aqmola oblysynyń ekonomıka jáne bıýdjettik josparlaý basqarmasynyń basshysy qyzmetin atqarǵan.
Qanat Malǵajdaruly 1974 jyly týǵan, burynǵy Torǵaı oblysynyń týmasy. Almatynyń ekonomıka jáne statıstıka akademııasyn bitirgen. Bank júıesinde, qazynashylyq, ekonomıka jáne bıýdjetti josparlaý salasynda tájirıbesi bar. Eńbek jolyn 1991 jyly Torǵaı oblysy, Qıma aýdany, Qıma aýylyndaǵy "Qıma" astyq keńsharynda qurylys ýchaskesiniń jumysshysy bolyp bastady.
2018 jyldan bastap qazirgi ýaqytqa deıin "Aqmola oblysynyń ekonomıka jáne bıýdjettik josparlaý basqarmasy" MM basshysy laýazymynda boldy.
***
Túrkistan oblysy bala quqyqtary jónindegi óńirlik ýákili laýazymyna Egemberdıeva Dınara Asylqyzy taǵaıyndaldy.
Túrkistan oblystyq máslıhatynyń depýtaty D. Egemberdıeva jańa qyzmetke kiristi. Endigi jerde ol Túrkistan oblysy bala quqyqtary jónindegi óńirlik ýákili laýazymyn qosa atqarady.
Bala quqyqtary jónindegi ýákil balanyń quqyqtary men zańdy múddeleriniń buzylýy týraly ótinishterdi, jergilikti atqarýshy organdardyń jáne ózge de uıymdardyń áreketterine nemese beıáreketine qatysty shaǵymdardy qaraıdy.
***
Osy aptada Qazaqstan Respýblıkasy Parlamenti Senatynyń depýtattary Nurlan Beknazarov, Altynbek Nýhuly jáne Lázzat Qaltaeva TMD Parlamentaralyq Assambleıasynyń turaqty komıssııalarynyń jumysyna qatysty.
Sonymen qatar, TMD PAA-nyń quqyqtyq máseleler jónindegi turaqty komıssııasynyń músheleri N. Beknazarovty komıssııa tóraǵasynyń orynbasary etip saılaý týraly sheshim qabyldady.
