Apta ishinde bolǵan kadrlyq taǵaıyndaýlar

Ótip bara jatqan apta ishinde elimizdiń ortalyq jáne jergilikti atqarýshy organdarynda birqatar kadrlyq aýys-túıis boldy, dep habarlaıdy Kazinform.

Sý resýrstary jáne ırrıgatsııa mınıstriniń buıryǵymen Múslim Jıenbaev Ǵylym jáne ınnovatsııa departamentiniń dırektory bolyp taǵaıyndaldy.

Múslim Rysmahanuly 1967 jyly 6 jeltoqsanda Jambyl oblysynda dúnıege kelgen. 1994 jyly Jambyl gıdromelıoratıvtik qurylys ınstıtýtyn bitirgen.

Eńbek jolyn 1985 jyly jumysshy bolyp bastady.

1995-2003 jyldary Taraz qalasynyń sý sharýashylyǵy ǵylymı-zertteý ınstıtýty zerthanasynyń aspıranty, kishi ǵylymı qyzmetkeri, aǵa ǵylymı qyzmetkeri;

2003-2006 jyldary «Qazagromelısýshar» RMO MM normatıvtik-ádistemelik qamtamasyz etý bóliminiń basshysy, jetekshi ǵylymı qyzmetker — bólim bastyǵy;

2006-2014 jyldary Sý resýrstary komıtetiniń mamany, bas mamany, bólim basshysy, bas sarapshysy, basqarma basshysy;

2014-2019 jyldary Transshekaralyq ózender departamenti basqarmasynyń basshysy;

2019-2022 jyldary QR Ekologııa, geologııa jáne tabıǵı resýrstar mınıstrligi Transshekaralyq ózender departamenti dırektorynyń orynbasary boldy.

Ǵalymjan Moldash QR SRIM Іshki aýdıt departamentiniń dırektory bolyp taǵaıyndaldy.

Ǵalymjan Ómiráliuly Ál-Farabı atyndaǵy Qazaq memlekettik ulttyq ýnıversıtetin, Qaztutyný odaǵy Qaraǵandy ekonomıkalyq ýnıversıtetin jáne Qazaq ekonomıka, qarjy jáne halyqaralyq saýda ýnıversıtetin bitirgen.

Quqyqtyq jáne ekonomıkalyq bilimi bar.

Eńbek jolyn 1999 jyly «Zańger» JShS zań agenttigi dırektorynyń kómekshisi bolyp bastady.

2000-2008 jyldary Astana qalasy eńbek, jumyspen qamtý jáne halyqty áleýmettik qorǵaý departamentiniń jetekshi mamany, bas mamany, bólim basshysy, departament basshysynyń orynbasary boldy.

2008-2010 jyldary Astana qalasy qarjy basqarmasy basshysynyń orynbasary, 2010-2011 jyldary Astana qalasy Ekonomıka jáne bıýdjettik josparlaý basqarmasy basshysynyń orynbasary, 2011-2018 jyldary Astana qalasy boıynsha Tekserý komıssııasynyń tóraǵasy, 2020-2022 jyldary QR Bilim jáne ǵylym mınıstrligi Іshki aýdıt departamentiniń dırektory, 2022 jylǵy naýryzdan qazanǵa deıin QR Bilim jáne ǵylym mınıstrligi Qarjy jáne bıýdjettik josparlaý departamentiniń dırektory, 2022 jylǵy qazannan 2023 jylǵy qarashaǵa deıin QR Oqý-aǵartý mınıstrligi bıýdjettik josparlaý departamentiniń dırektory qyzmetin atqarǵan.

Ásııa Baımurat QR SRIM kadr jumysy departamentiniń dırektory bolyp taǵaıyndaldy.

Ásııa Baımuratqyzy 1979 jyly 27 qarashada Aqtóbe oblysynda dúnıege kelgen.

2001 jyly Qazaq memlekettik zań akademııasyn «Quqyqtaný» mamandyǵy boıynsha bitirgen.

Eńbek jolyn 2001 jyly Qazaq memlekettik zań akademııasynda oqytýshy bolyp bastady.

2002-2008 jyldary — oqytýshy, sektsııa meńgerýshisi, memlekettik-quqyqtyq pánder kafedrasynyń meńgerýshisi; 2009-2011 jyldary zańger; 2012-2018 jyldary ákimshilik-kadr jumysy jáne quqyqtyq qamtamasyz etý bóliminiń bas mamany, basshysy; 2018-2021 jyldary ekologııalyq retteý jáne baqylaý komıtetiniń ákimshilik-kadr jumysy basqarmasynyń basshysy. 2021-2023 jyldary QR Ekologııa, geologııa jáne tabıǵı resýrstar mınıstrliginiń Ákimshilik jáne kadr jumysy departamenti dırektorynyń orynbasary boldy.

Shymkent ákiminiń ókimimen Bahtııar Ónerbaev qalalyq Іshki saıasat jáne jastar isteri jónindegi basqarmasynyń basshysy laýazymyna taǵaıyndaldy.

Bahtııar Áltaıuly 1967 jylǵy 9 aqpanda Ońtústik Qazaqstan oblysy Tólebı aýdany Kóksáıek aýylynda týǵan.

S. M. Kırov atyndaǵy Qazaq memlekettik ýnıversıtetiniń jáne Qyrǵyz memlekettik ulttyq ýnıversıtetiniń túlegi. Mamandyǵy — hımııa, quqyqtaný.

Eńbek jolyn 1989 jyly Qazaqtyń Eńbek Qyzyl Tý ordendi S. M. Kırov atyndaǵy memlekettik ýnıversıteti organıkalyq emes hımııa kafedrasynyń aǵa preparatory bolyp bastaǵan.

1990-2012 jyldary Almaty qalasy jekeshelendirý komıtetinde, Almaty qalasy Jetisý aýdany ákimdiginde, Prezıdenttiń Іs basqarmasynda, Joǵarǵy Sotta jáne Parlament Senatynyń apparatynda jaýapty basshylyq qyzmetter atqardy.

2014-2016 jyldary Almaty oblysy ákiminiń orynbasary, 2016-2020 jyldary Almaty oblysy Tekeli qalasynyń ákimi, 2020 jyly Almaty oblysy ákiminiń Astana qalasyndaǵy keńesshisi laýazymdarynda eńbek etti.

2020 jyldyń jeltoqsan aıynan bastap búgingi kúnge deıin Eńbek jáne halyqty áleýmettik qorǵaý mınıstrligi eńbek, áleýmettik qorǵaý jáne kóshi-qon komıtetiniń Shymkent qalasy boıynsha departamentiniń basshysy boldy.

Shymkent ákiminiń ókimimen qalalyq jumyspen qamtý jáne áleýmettik qorǵaý basqarmasynyń basshysy laýazymyna Janat Ótebaeva keldi.

Janat Ómirseıitqyzy 1970 jyly Túrkistan oblysy, Ordabasy aýdany, Shubar aýylynda dúnıege kelgen.

Almaty halyq sharýashylyǵy ınstıtýtyn «qarjy jáne nesıe» mamandyǵy boıynsha aıaqtaǵan.

Eńbek jolyn 1991 jyly Qazaq SSR Jınaq banki Shymkent oblystyq basqarmasynyń býhgalterlik esep bóliminiń ınspektory bolyp bastaǵan.

1992-2022 jyldar aralyǵynda jeke sektorda jáne áleýmettik salada jaýapty basshylyq qyzmetter atqardy.

2022 jyldyń mamyr aıynan bastap búgingi kúnge deıin Shymkent qalasy ákimdigine qarasty Turǵyn úı basqarmasynyń basshysy laýazymynda eńbek etti.

Qaraǵandy oblysy boıynsha aýmaqtyq statıstıka departamentiniń basshysy bolyp Sáýle Komýtova taǵaıyndaldy.

Sáýle Komýtova kásipkerlik jáne menedjment mádenıeti ınstıtýtyn «Ekonomıka jáne menedjment» mamandyǵy boıynsha bitirgen.

Ol eńbek jolyn 1997 jyly Qaraǵandy oblystyq statıstıka basqarmasynyń halyq jáne eńbek statıstıkasy bóliminiń mamany bolyp bastady.

Ári qaraı qurylys jáne ınvestıtsııa statıstıkasy tobynyń meńgerýshisi boldy.

1999-2001 jyldary aqparat-statıstıka ortalyǵynyń óndiristik sala bóliminiń bastyǵy bolyp jumys istedi.

Keıingi jyldary aýmaqtyq statıstıka organynda ártúrli laýazymdarda eńbektendi.

2009 jyldan bastap Qaraǵandy oblysynyń statıstıka bólimi basshysynyń orynbasary qyzmetin atqardy.

«Qazaqstan Respýblıkasynyń Táýelsizdigine 20 jyl» mereıtoı medalimen, «Statıstıka úzdigi» tósbelgisimen marapattalǵan.

Aslanbek Shúıinshálıev Aqtóbe qalasy Almaty aýdanynyń ákimi bolyp taǵaıyndaldy.

Aslanbek Shúıinshálıev 1988 jyly dúnıege kelgen.

Qazaq-orys halyqaralyq ýnıversıtetin «quqyqtaný», Almaty ekonomıka jáne statıstıka akademııasyn «ekonomıka», QR Prezıdentiniń janyndaǵy Memlekettik basqarý akademııasyn «óńirlik damý» biliktiligi boıynsha aıaqtaǵan.

Aqtóbe oblysynyń balalardyń quqyqtaryn qorǵaý departamentinde, Aqtóbe jáne Batys Qazaqstan oblystary boıynsha básekelestikti qorǵaý (monopolııaǵa qarsy) ınspektsııasynda, oblys boıynsha aýmaqtyq jer ınspektsııasynda jumys istegen. Qarǵaly aýdandyq turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bóliminiń basshysy, Qarǵaly aýdany Badamsha aýyldyq okrýginiń ákimi, Alǵa aýdandyq qarjy bóliminiń basshysy, oblys ákimi apparatynyń uıymdastyrý-ınspektorlyq jáne taldaý bóliminiń bas ınspektory, Qarǵaly aýdany ákiminiń orynbasary, oblys ákimi apparatynyń quqyq qorǵaý organdarymen ózara árekettesý bóliminiń basshysy bolyp qyzmet atqardy.

Osy laýazymǵa taǵaıyndalǵanǵa deıin Aqtóbe oblystyq Jumyspen qamtýdy úılestirý jáne áleýmettik baǵdarlamalar basqarmasynyń basshysy boldy.

Aqtóbe oblysy Mártók aýdany ákimi qyzmetine Medet Ysqaqov taǵaıyndaldy.

Ol Q.Jubanov atyndaǵy Aqtóbe memlekettik ýnıversıtetin, Almaty ekonomıka jáne statıstıka akademııasyn támamdaǵan.

Eńbek jolyn 2000 jyly Q.Medetov atyndaǵy Mártók balalar óner mektebiniń muǵalimi bolyp bastap, mektep dırektory qyzmetine deıin kóterilgen.

2016-2021 jyldary Qaratoǵaı aýyldyq okrýginiń ákimi, Mártók aýdandyq mádenıet jáne tilderdi damytý bóliminiń basshysy, Mártók aýdany ákiminiń orynbasary qyzmetterin atqarǵan.

2021-2022 jyldary Aqtóbe oblysynyń tilderdi damytý basqarmasyn basqardy.

2022 jyldyń qazan aıynan bastap osy ýaqytqa deıin Aqtóbe qalasy Almaty aýdanynyń ákimi laýazymynda boldy.

Ádiljan Arǵynov Qarqaraly aýdanynyń ákimi qyzmetine taǵaıyndaldy.

Ádiljan Arǵynov eńbek jolyn 2007 jyly Qarqaraly qalasyndaǵy orta mektep muǵalimi bolyp bastaǵan.

2013 jyldan bastap memlekettik qyzmette. Qaraǵandy oblysy Aýyl sharýashylyǵy basqarmasynyń bas mamany bolyp jumys istedi.

2015 jyldan 2022 jylǵa deıin Qazaqstan Respýblıkasy Ulttyq ekonomıka mınıstrliginde sarapshydan shaǵyn jáne monoqalalardy damytý basqarmasynyń basshysyna deıingi jol ótti.

2022 jyldyń shildesinen bastap osy taǵaıyndaýǵa deıin Qarqaraly aýdany ákiminiń orynbasary bolyp jumys istedi.