Apta ishinde bolǵan kadrlyq taǵaıyndaýlar
ASTANA.KAZINFORM – Elimizde jáne halyqaralyq deńgeıde osy apta ishinde birqatar kadrlyq taǵaıyndaýlar men qyzmettik ózgerister boldy.
Apta basynda Ábdirásil Jeleýbaev Jambyl oblysy Aýyl sharýashylyǵy basqarmasynyń basshysy bolyp taǵaıyndaldy.
2025 jylǵy qarasha aıynan bastap QR Prezıdenttik jastar kadr rezerviniń múshesi.
Eńbek jolyn 2017 jyly Jambyl oblysy ákimdiginiń aýyl sharýashylyǵy basqarmasy egin sharýashylyǵy bóliminiń bas mamany bolyp bastady.
2019-2023 jyldary Jambyl oblysy ákimdiginiń aýyl sharýashylyǵy basqarmasy egin jáne sý sharýashylyǵy bóliminde bas maman, bólim basshysy qyzmetterin atqardy.
2023-2024 jyldary QR Aýyl sharýashylyǵy mınıstrligi Eginshilik departamentiniń agromelıoratsııa basqarmasynda bas sarapshy, basqarma basshysy laýazymdarynda eńbek etti.
2024 jyldyń 20 maýsymynan bastap Jambyl oblysy ákimdiginiń aýyl sharýashylyǵy basqarmasy egin sharýashylyǵy, memlekettik astyq, tuqym jáne tehnıkalyq ınspektsııasy bóliminiń basshysy boldy.
2024 jyldyń shilde aıynan bastap búgingi kúnge deıin Jambyl oblysy ákimdiginiń aýyl sharýashylyǵy basqarmasy basshysynyń orynbasary qyzmetin atqardy.
Sport salasynda da mańyzdy kadrlyq ózgeris boldy. Dmıtrıı Ogaı «Shahter» fýtbol klýbynyń bas jattyqtyrýshysy bolyp taǵaıyndaldy.
Ol bapkerlik mansabynda «Ertis» (Pavlodar) klýbymen eki márte Qazaqstan chempıony atanǵan. Qazaqstan fýtbolyndaǵy tájirıbeli maman túrli jyldary eldiń jetekshi komandalarymen jumys istep, joǵary nátıjelerge qol jetkizgen.
Qazirgi tańda Dmıtrıı Ogaıdyń basty maqsaty – «Shahter» fýtbol klýbyn Qazaqstan Premer-lıgasyna qaıta shyǵarý. Bıyl qaraǵandylyq klýb Birinshi lıgada tórtinshi oryn alyp, joǵary dıvızıonǵa joldamadan tys qalǵan bolatyn.
Aıta keteıik, «Shahter» fýtbol klýby óz tarıhynda eki ret Qazaqstan chempıony atanǵan. Sondaı-aq qaraǵandylyq komanda qazaqstandyq klýbtar arasynda alǵashqylardyń biri bolyp 2013–2014 jylǵy maýsymda ÝEFA Eýropa lıgasynyń toptyq kezeńinde óner kórsetti.
Talǵat Qozbekov QR Qarjy mınıstrligi Memlekettik kirister komıtetiniń Aqtóbe oblysy boıynsha departamenti basshysy qyzmetine taǵaıyndaldy.
Talǵat Japarhanuly eńbek jolyn 1999 jyly memlekettik kirister organdarynda Panfılov aýdanynyń Salyq komıtetinde salyq ınspektory laýazymynan bastaǵan.
Ár jyldary jetekshi jáne aǵa salyq ınspektory, bólim basshysy, basqarma basshysynyń orynbasary qyzmetterin atqardy. Sondaı-aq Panfılov jáne Uıǵyr aýdandary boıynsha basqarma basshysy, Atyraý oblysy boıynsha Memlekettik kirister departamenti basshysynyń orynbasary, Almaty oblysy, Jetisý oblysy jáne Aqtóbe oblysy boıynsha Memlekettik kirister departamentiniń basshysy boldy.
Sońǵy bir jylda Túrkistan oblysy ákiminiń orynbasary qyzmetin atqarǵan.
Sondaı-aq Semeı qalasy ákimine Bahtııar Topaev orynbasar taǵaıyndaldy.
Ol eńbek jolyn 2008 jyly Astana qalasynyń Saryarqa aýdany ákiminiń apparatynda esep júrgizý jónindegi tehnık qyzmetker retinde bastaǵan.
2010–2012 jyldary bas maman, keıin abattandyrý bóliminiń basshysy qyzmetterin atqardy.
2013–2017 jyldary abattandyrý bólimin basqaryp, aýdan aýmaǵyn sanıtarlyq tazalaý jáne kútip-ustaý máselelerine jetekshilik etti.
2017–2019 jyldary Saryarqa aýdany ákiminiń apparaty janyndaǵy abattandyrý jáne qoǵamdyq keńistikterdi damytý bólimin, al 2019–2020 jyldary aýdan ákimdiginiń bas ınspektory qyzmetin atqardy.
2020 jyldyń qazan aıynan 2025 jyldyń mamyr aıyna deıin Almaty aýdany ákiminiń apparaty janyndaǵy abattandyrý bóliminiń basshysy boldy.
2025 jyldyń mamyr aıynan bastap taǵaıyndalǵanǵa deıin Semeı qalasynyń turǵyn úı-kommýnaldyq sharýashylyq bólimine jetekshilik etti.
Pavlodar oblysynda memlekettik sáýlet-qurylys baqylaý basqarmasyna Qazbek Orazuly taǵaıyndaldy.
2005 jyldan 2023 jylǵa deıin qurylys jáne kommýnaldyq sharýashylyq salasyndaǵy memlekettik emes uıymdarda basshylyq qyzmetter atqardy.
2023–2024 jyldary Pavlodar qalasynyń turǵyn úı ınspektsııasy jáne kommýnaldyq sharýashylyq bóliminiń basshysy bolyp eńbek etti.
2024 jyldan osy qyzmetke taǵaıyndalǵanǵa deıin Pavlodar qalasynyń qurylys bóliminiń basshysy laýazymyn atqarǵan.
Eske sala keteıik, buǵan deıin Memleket basshysynyń Jarlyǵymen Ásel Janasova Qazaqstan Prezıdenti Ákimshiligi basshysynyń orynbasary bolyp taǵaıyndalǵan edi. Ol 2022–2025 jyldary «Qazposhta» AQ basqarma tóraǵasy qyzmetin atqaryp kelgen.
AQSh Senaty mıllıarder Djared Aızekmandy NASA basshysy qyzmetine bekitti.
Ony bekitýge 67 senator qoldasa, 30 senator qarsy daýys bergen.
Aızekman agenttikti basqarǵan alǵashqy saıası tájirıbesi joq basshy atanbaq. Ol áýesqoı ushqysh retinde tanymal ári ashyq ǵaryshqa shyqqan alǵashqy kásibı emes astronavt.
Forbes deregine sáıkes, onyń baılyǵy shamamen 1,2 mlrd dollardy quraıdy. Bul qarajat tólemdermen aınalysatyn kompanııadan, sondaı-aq ushqyshtardy daıarlaý jáne jeke áýe parkin basqarý salasyndaǵy bıznesten túsken.
Buǵan deıin NASA basshysynyń mindetin ýaqytsha kólik mınıstri Shon Daffı atqaryp kelgen.