Apta ishinde áleýmettik mańyzy bar azyq-túlik taýarlarynyń baǵasy óspedi

ASTANA. KAZINFORM — Áleýmettik mańyzy bar azyq-túlik taýarlary baǵasynyń ósý qarqyny báseńdeýde. Bıyl alǵash ret apta ishinde atalǵan taýarlarǵa baǵanyń ósýi tirkelgen joq.

— Ótken aptada birqatar azyq-túlik ónimderine baǵa tómendedi. Atap aıtqanda, jumyrtqa 1,2%-ǵa, pııaz 0,8%-ǵa, sábiz 0,6%-ǵa, al rojkı men kúrish 0,1%-ǵa arzandady. Sonymen qatar, jyl basynan beri un baǵasy 1,7%-ǵa tómendegeni baıqaldy.

Óńirler arasynda baǵa ındeksiniń tómendeýi Túrkistan oblysynda — 0,2%, Batys Qazaqstan jáne Soltústik Qazaqstan oblystarynda — 0,1 tirkeldi. Al Almaty, Astana qalalarynda, sondaı-aq Shyǵys Qazaqstan, Jambyl, Almaty, Qostanaı jáne Abaı oblystarynda baǵa ındeksi ózgerissiz, nóldik deńgeıde qaldy, — delingen Saýda komıteti habarlamasynda.

Óńirlik komıssııalar anyqtaǵan áleýmettik mańyzy bar azyq-túlik taýarlaryna baǵa belgileýdi baqylaý maqsatynda belgilengen 15%-dyq shekti saýda ústemesin asyrý faktileri boıynsha 1 872 ákimshilik is qozǵaldy.

6 100-den astam taýar jetkizý tizbegine taldaý júrgizildi. Sonyń ishinde 655 jaǵdaıda básekelestik zańnamasyn buzý qaýpi anyqtaldy. Bul derekter naqty sharalar qabyldap, baqylaýdy kúsheıtýge negiz boldy.

Áleýmettik mańyzy bar azyq-túliktiń qoljetimdiligin qamtamasyz etýdegi tıimdi quraldardyń biri — aýyl sharýashylyǵy jármeńkeleri. Jyl basynan beri elimizdiń óńirlerinde fermerlik ónimder deldalsyz, tikeleı satylatyn 3 myńǵa jýyq jármeńke uıymdastyryldy.

Sonymen qatar, baǵa turaqtylyǵyn qamtamasyz etý jáne naryqty úzdiksiz ónimmen qamtý maqsatynda bıznes ókilderimen jáne salalyq qaýymdastyqtarmen turaqty dıalog júrgizilip jatyr.

 Aıta ketelik áleýmettik mańyzy bar azyq-túlik taýarlary tranzıtine baqylaý kúsheıdi.