Apta saıyn aqtóbelik «Jedel járdemniń» 50 qyzmetkeri demalys ortalyǵynda tynyǵyp qaıtady
AQTÓBE. QazAqparat – Aqtóbe qalasy Almaty aýdany ákimdiginiń bastamasymen «Jedel járdem» qyzmetkerlerine apta saıyn qaýipti de adal eńbegine oraı qurmet kórsetilip keledi, dep habarlaıdy QazAqparat.
Aýdan aýmaǵynda ornalasqan demalys ortalyqtary barlyq karantın erejelerine saı sanıtarlyq normalardyń talaptaryn saqtaı otyryp, kúndiz-túni úı kórmeı, naýqastarǵa qyzmet etetin dárigerlerge esikterin ashty. «Jedel járdemniń» qyzmetkerleri kezekshilikten bosaǵan kúnderi 50 adamnan 6 saǵatqa demalyp qaıtady.
Ótken aptada «Kók jaılaý» saýyqtyrý-demalys ortalyǵy 50 adamdy qabyldasa, bul joly «Green Land» demalys bazasy 50 qyzmetkerdi qarsy aldy. Osylaısha, eki aıdyń ishinde 500 medıtsına mamany qamtylmaq.
Dárigerlerdi demalys ornyna jetkizý úshin «Avtopark» mekemesi eki avtobýspen bólgen.
«Bir táýlikke deıin kezekshilikke shyǵatyn dárigerlerdiń eńbegin baǵalaý kerek. Búgingi kúnniń qaharmandary medıtsına qyzmetkerleri ekeni sózsiz. Onyń ishine dárigerlerden bólek, feldsherler de, jedel járdem júrgizýshileri de, dıspetcherler de kiredi. Kúni-túni olar óz jandaryn aıamaı, ózgelerdiń ómirin saqtap qalýǵa eńbek etip keledi. Osyndaı qurmetke bul top ókilderi ábden laıyq», - dedi Almaty aýdanynyń ákimi Ádilkereı Áýelbaev.
Aıta ketelik, demalys bazasynda dárigerlerge taza aýada shıpaly sýsyn – saýmal men qymyz usynyldy. Karantın rejımine baılanysty sanıtarlyq talaptar qatań saqtaldy. Sondaı-aq, Tótenshe jaǵdaı ýaqytynda eren eńbegimen kózge túsken aq halatty abzal jandarǵa aýdan ákimi oblys jáne qala basshylyǵynyń atynan alǵys hattar tabystady.
