Apta premerasy: Otandyq fılm Ońtústik Koreıada kórsetiledi
ASTANA. KAZINFORM — Osy aptada otandyq kınoqorjyn eki jańa týyndymen tolyqty. Onyń ishinde KESU ekshn-dramasy Ońtústik Koreıa kınematografısterimen birlesip túsirilgen. Qazaqstandyq akterler túsken týyndy Ońtústik Koreıa kınoteatrlarynda kommertsııalyq prokatqa shyǵady.
Sonymen qatar kınoteatr repertýarynda sheteldik horrorlar men shytyrman oqıǵaly dramalar da bar. Balalarǵa arnalǵan qyzyqty sıýjette qurylǵan mýltfılmder de az emes. Kazinform tilshisiniń sholýynda osy aptadaǵy eń basty kınopremeralardy usynamyz.
Kollaj: Kazinform / Kinopoisk.ru
Kesu
Janry: drama, boevık
Uzaqtyǵy: 113 mınýt
El: Qazaqstan, 2026
Rejısser: Daýlet Jumabaev
Ustazy joǵalyp ketken soń, qazaqstandyq taekvondo sheberi men Ońtústik Koreıa chempıony ony izdep Seýlge attanady. Alaıda izdestirý barysynda olar ustazynyń ótkenine qatysty qaýipti qupııanyń betin ashady.
Boıdaqtar keshi: Sońǵy tún, (Malchıshnık vs Devıchnık: Sońǵy tún)
Janry: komedııa, romantıka
Uzaqtyǵy: 79 mınýt
El: Qazaqstan, 2025
Rejısser: Álibek Abdýhalık
Mansur men Zere úılený toı aldyndaǵy boıdaqtar keshin ótkizbek bolady. Keshti uıymdastyrýdy Berik pen Seriktiń erekshe kompanııasyna tapsyrady. Olar kelisimshartta kesh sońynda qalyńdyq pen kúıeý jigittiń bir-birin shynaıy bolmysymen tanıtynyna kepildik beredi. Alaıda jup kelisimsharttyń sharttaryn tolyq oqymaı, syıǵa berilgen shampannan bir urttaǵan soń, denelerimen almasyp ketedi. Osy sátten bastap ekeýin túrli kúlkili ári kútpegen oqıǵa kútip tur.
Melanholııa barokko
Janry: drama, tarıh, melodrama
Uzaqtyǵy: 110 mınýt
El: Italııa, Germanııa, 2021
Oleg Boretskııdiń kınoklýby. Qonaq — Memlekettik sımfonııalyq orkestrdiń birinshi skrıpkashysy Aleksandr Thaı. Barokko mýzykasy — klassıkalyq ónerdiń aıryqsha kezeńi. Gendel, Vıvaldı men Bahtyń shyǵarmalary XVIII ǵasyrdyń rýhyn tanytyp, muń men saǵynyshtan bastap, asqaq qýanyshqa deıingi sezimderdi jetkizedi. Bul mýzykada tylsym syr men tereń emotsııa astasyp jatyr.
Jel perzenti, (Dıtıa vetra)
Janry: shytyrman oqıǵaly fentezı
Uzaqtyǵy: 93 mınýt
El: Ońtústik Koreıa, 2021
Rejısser: Sın Chhan Son
Endyn — jeldiń kúshine ıe bolǵan Edjon qyzy. Mýgan men Djıme bastaǵan qaraqshylar «Qasıetti jel marjanyn» ıelený úshin Tamraǵa shabýyl jasaıdy. Jergilikti turǵyndar qarsylyq kórsetkenimen, qaraqshylardyń alyp roboty «Qyzyl Onı» qorǵanysty buzady. Osy ýaqytta ańyzǵa aınalǵan marjandy izdegen ekspedıtsııa qarly taýdaǵy daýylǵa tap bolady. Marjan tabylǵan sátte qýatty energııa bólinip, topty alapat daýyl jutyp qoıady. Ýaqyt pen keńistik burmalanǵan álemde ekspedıtsııa músheleri eki túrli jolǵa túsedi.
Qozǵaltqyshtarshaıqasy, (Bıtva motorov)
Janry: shytyrman oqıǵaly drama
Uzaqtyǵy: 144 mınýt
El: Reseı, 2026
Rejısser: Ilıa Malanın
1908 jyl. Avtokólik áýesqoıy Andreı Nagel ınjener Dmıtrıı Bondarevpen birigip, «Rýsso-Balt» kóligin qurastyrýǵa kirisedi. Alaıda jobaǵa qaýip tóngende, Nagel batyl sheshim qabyldaıdy. Ol kóliktiń múmkindigin dáleldeý úshin áıgili Monte-Karlo rallıine qatysady. Bul qadam jobanyń taǵdyryn sheshýi múmkin.
Qubyjyqtardy qolǵa úıretý: Jańa jyldyq ábiger, (Kak prırýchıt monstrov: Rojdestvenskıı perepoloh)
Janry: shytyrman oqıǵaly fentezı, mýltfılm
Uzaqtyǵy: 89 mınýt
El: Ispanııa, 2026
Rejısser: Ignasıo Kýkýkovıch
Hanna men onyń qubyjyq dostary alǵashqy ortaq merekesin asyǵa kútedi. Alaıda zulym Gargýlıa jańa jyl sıqyryn ıemdenip, adamdar merekeni umyta bastaıdy. Hanna joǵalǵan Mereke rýhyn taýyp, Gargýlıa men onyń adal serigi Tsıkloptan buryn sıqyrdy qaıtarýǵa attanady. Esnamen birge qaýipti saparǵa shyqqan Hanna dostyq pen birliktiń kez kelgen kedergini jeńýge kómektesetinin túsinedi.
Kóshe jaýyngeri, (Street Fighter)
Janry: boevık
Uzaqtyǵy: 125 mınýt
El: AQSh, Japonııa, 2026
Rejısser: Kıtao Sakýraı
Rıý men Ken esimdi kóshe jaýyngerleri qaıta kezdesip, jekpe-jek álemine oralady. Jumbaq Chýn-Lı olardy World Warrior týrnırine qatysýǵa shaqyrady. Alaıda tartysty jekpe-jekterdiń artynda qaýipti qastandyq jasyrynyp jatyr. Jaýyngerler bir-birimen shaıqasyp qana qoımaı, ótken ómirindegi jaıttarmen de betpe-bet kelýge májbúr bolady.
Qolyńdy kóter 2, (Rýkı Vverh! 2)
Janry: ómirbaıandyq melodrama, mýzykalyq fılm
Uzaqtyǵy: 100 mınýt
El: Reseı, 2026
Rejısser: Alısa Shıtıkova
«Rýkı vverh!» tobyna 30 jyl tolǵan soń, Sergeı Jýkov balalarymen birge jastyq shaǵyn eske alady. Alǵashqy mahabbat, asqaq armandar, dostyq, otbasy jáne úlken sahnaǵa bastalǵan jol — ótken kúnderdiń jarqyn esteligine aınalady.
Sýasty dostary: Rıfti qorǵaý, (Podvodnaıa bratva. Na straje rıfa)
Janry: shytyrman oqıǵaly mýltfılm, mıýzıkl, otbasylyq fılm
Uzaqtyǵy: 91 mınýt
El: Germanııa, Chehııa, Kanada, 2025
Rejısser: Pavel Grýbos, Stıven Madjorı, Reza Memarı
Jas Vınsent — teńizderdi sıqyrly ánimen qorǵaǵan ánshi kıtterdiń sońǵy tuıaǵy. Muzdyq erip, odan teńiz tirshiligine qaýip tóndiretin qubyjyq bosap shyǵady. Vınsent kúńkilshil balyq Ýolter men batyl kosatka Darıaǵa qosylyp, muhıttyń eń tereń tuńǵıyǵyna sapar shegedi. Ol óz kúshine senip, sýasty álemin qutqarýǵa tıis.
Sońǵy mólsherine deıin, (Do poslednego gramma)
Janry: boevık, shytyrman oqıǵaly fılm, drama, krımınal, trıller
Uzaqtyǵy: 115 mınýt
El: Germanııa, Kanada, AQSh, 2025
Rejısser: Padrık Makkınlı
Merfıdi qyzynan aıyryp, túrmege qamaıdy. Túrme basshysy oǵan jáne birneshe tutqynǵa qaýipti altyn kontrabandasyna qatyssa, bostandyqqa shyǵýǵa múmkindik usynady. Merfı kelisedi. Alaıda iske kirisken sátte adam ashkózdiginiń altynnan da aýyr ekeni aıqyndala túsedi.
Bóten ana, (Chýjaıa mama)
Janry: qorqynyshty fılm
Uzaqtyǵy: 91 mınýt
El: AQSh, Irlandııa, 2026
Rejısser: Rob Sevedj
Bela segiz jasta. Onyń ata-anasy otbasylyq daǵdarysty bastan ótkerip jatyr. Ol shkafynan shyqqan qorqynyshty tirshilik ıesine tap bolady. Qyz ony «Bóten ana» dep ataıdy. Alaıda ýaqyt óte kele jumbaq maqulyq Belanyń ózine de, otbasyna da qaýip tóndire bastaıdy.
Uıqynyń qupııa sózi, (Kod sna)
Janry: drama, trıller, fantastıka
Uzaqtyǵy: 96 mınýt
El: AQSh, 2025
Rejısser: Mıshel K. Parandı
Baks tsıfrlyq formatta tús kórgenderin jazyp ala alatyn egiz ápkesi Eıprıldi izdeıdi. Alaıda bul izdeý ony korporatsııalar bılegen, paranoııa jaılaǵan ári shyndyq pen tústiń arasy ajyratylmaıtyn qaýipti álemge jeteleıdi.
Júrek sybyry, (Shepot serdtsa)
Janry: anıme, drama, melodrama, mýltfılm
Uzaqtyǵy: 111 mınýt
El: Japonııa, 2025
Rejısser: Esıfýmı Kondo
Sıdzýký 14 jasta. Ol Tokıoda turady jáne bos ýaqytyn kitap oqýmen ótkizedi. Bir kúni ol kitaphanada ózi alǵan kitaptardyń bárin buǵan deıin Seıdzı esimdi bireýdiń oqyǵanyn baıqaıdy. Sóıtse, ol — parallel synypta oqıtyn bala eken. Alǵashynda Sıdzýkýǵa ol unamaıdy. Alaıda ýaqyt óte kele ekeýi jaqyndaı túsedi. Seıdzıdiń skrıpka sheberi bolýǵa umtylysy qyzdy da óz armanyn izdeýge jeteleıdi. Sıdzýký antıkvarlyq dúkennen kórgen mysyq músini — Baron týraly hıkaıa jazýǵa kirisedi.
Ótken aptadaǵy kınopremeralar tizimin osy jerden kóre alasyzdar.
