Apta premeralary: Qazaqstan kınoteatrlarynda qandaı fılmder kórsetiledi
ASTANA. KAZINFORM — Jańa kınoaptada kórermenderge túrli janrdaǵy fılmder usynylady. Arasynda krımınaldyq drama, anımatsııalyq týyndy, fantastıka men qorqynyshty kınotýyndylar bar. Kazinform agenttigi aldaǵy kúnderi prokatqa shyǵatyn kartınalarǵa sholý jasady.
ERІKSІZ QANDYQOLDAR (Ýbııtsy ponevole)
Janry: drama, komedııa, krımınal
Uzaqtyǵy: 118 mınýt
El: AQSh, 2024
Rejısser: Djeffrı Reıner
Túrmeden bosap shyqqan Don ótken ómirin artta qaldyryp, jańa paraqtan bastaǵysy keledi. Alaıda burynǵy seriktesiniń usynysy ony qaıtadan qylmys álemine jeteleıdi. Úlken qaryzdan qutylý úshin oǵan kisi óltirý tapsyrmasyn oryndaýdy usynady. Endi basty keıipker taǵdyryn ózgerter sheshim qabyldaýy kerek.
OIYNShYQTAR HIKAıASY 5 (Istorııa ıgrýshek 5)
Janry: shytyrman oqıǵa, drama, komedııa, mýltfılm, qııal-ǵajaıyp, otbasy
Uzaqtyǵy: 90 mınýt
El: AQSh, Japonııa, 2026
Rejısser: Makkenna Harrıs, Endrıý Stenton
Výdı, Bazz jáne Djessı taǵy da ekranǵa oraldy. Biraq bul joly olardyń basty qarsylasy basqa oıynshyqtar emes, balalardyń ýaqytyn tolyqtaı jaýlap alǵan zamanaýı gadjetter. Keıipkerler dostyq pen qııaldyń qundylyǵyn dáleldeýge tyrysady.
AQIQAT AShYLǴAN KÚN (Den razoblachenııa)
Janry: drama, trıller, ǵajaıyp
Uzaqtyǵy: 120 mınýt
El: AQSh, 2026
Rejısser: Stıven Spılberg
Adamzat tarıhyndaǵy eń úlken jańalyqtardyń biri jarııa bolady: ǵalamda adamdardan ózge tirshilik ıeleri bar ekeni anyqtalady. Bul habar búkil álemdi dúr silkindirip, qoǵamdy jańa shyndyqpen betpe-bet qaldyrady. Kartına adamdardyń mundaı aqıqatty qabyldaýǵa qanshalyqty daıyn ekenin kórsetedi.
QYSYM (Davlenıe)
Janry: áskerı, drama, tarıh, trıller
Uzaqtyǵy: 100 mınýt
El: Ulybrıtanııa, Frantsııa, 2026
Rejısser: Entonı Maras
Fılm oqıǵasy 1944 jyldyń maýsymynda órbıdi. Normandııaǵa áskerdi qondyrý operatsııasyna daıyndyq júrip jatqan shaqta sheshýshi ról brıtandyq meteorolog Djeıms Steggke júkteledi. Onyń aýa raıyna qatysty qorytyndysy myńdaǵan adamnyń taǵdyryna áser etýi múmkin. Qate sheshim soǵystyń baǵytyn ózgertip jiberýi yqtımal.
ZULYM UıASY: MÝTATsIıA (Obıtel zla: Mýtatsııa)
Janry: horror
Uzaqtyǵy: 91 mınýt
El: AQSh, 2026
Rejısser: Nensı Leopardı
16 jastaǵy Ellı ózindegi syrqattyń sebebi qarapaıym genetıkalyq erekshelikte emes ekenin seze bastaıdy. Kóp uzamaı ol asyrap alǵan ata-anasynyń shyǵý tegi týraly mańyzdy qupııalardy jasyrǵanyn biledi. Shyndyqqa jaqyndaǵan saıyn qyzdyń ómiri qaýipti bola túsedi.
OMEN: ZULYMNYŃ BEINESІ (Omen. Oblıche zla)
Janry: horror
Uzaqtyǵy: 75 mınýt
El: Ispanııa, 2026
Rejısser: Djeıkob Santana
Kúıeýimen ajyrasqan Alısııa qyzymen birge jańa úıge kóship keledi. Alaıda tynysh ómir uzaqqa sozylmaıdy. Qyzy jumbaq kók kóılek taýyp alyp, belgisiz rýhpen baılanys ornatady. Osydan keıin otbasynyń ótkenine qatysty qupııalar ashyla bastaıdy.
OL. TÚNGІ QORQYNYSh (Ono. Nochnoı koshmar)
Janry: horror, trıller
Uzaqtyǵy: 89 mınýt
El: AQSh, 2026
Rejısser: Brendon Oman
Jańa qalaǵa qonys aýdarǵan Sara bala kúngi qorqynyshtarymen qaıta betpe-bet keledi. Buryn tek túsinde kóretin qubyjyq endi shynaıy ómirge enip, onyń ulyna qaýip tóndiredi. Keıipker zulymdyqtyń kózin joıý úshin ótken shaqtyń aýyr estelikterine qaıta oralýǵa májbúr bolady.
Ótken aptadaǵy kınopremeralar tizimin osy jerden kóre alasyzdar.
