Apta premeralary: «Baýyr», «Qudiret» jáne ózge de fılmder

ASTANA. KAZINFORM — Bul aptada kınoteatrlarda birneshe jańa fılmniń tusaýy kesiledi. Olardyń qatarynda ázilge qurylǵan otandyq komedııa men drama bar. Sonymen qatar kórermen nazaryna sheteldik jańa týyndylar da usynylady. Kazinform tilshisi aptadaǵy kıno jańalyqtaryna sholý jasaıdy.

Apta premeralary: «Baýyr», «Qudiret» jáne ózge de fılmder
Foto: Kazinform

Kollaj: Kazinform / Kinopoisk.ru

Baýyr

Janry: komedııa

Uzaqtyǵy: 100 mınýt

El: Qazaqstan, 2026

Rejısser: Áset Jumaqan

Úsh dos — tserebraldy sal aýrýyna shaldyqqan Azamat, kózi kórmeıtin Álıhan jáne múgedekter arbasyna tańylǵan, sóıleı almaıtyn Berik Kókshetaýdan Almatyǵa jolǵa shyǵady. Alaıda qarapaıym sapar kútpegen oqıǵalarǵa toly shytyrman saıahatqa aınalady. Jolda olarǵa olaq taksıst Aman men Balnur esimdi qyz qosylady. Birge ótkizgen ýaqyt dostardy jaqyndastyra túsedi. Al bul sapar Azamat úshin aıryqsha mańyzdy. Óıtkeni ol baıaǵyda joǵaltqan adamyn tabýǵa úmittenedi.

Qara túıin

Janry: detektıv, trıller, qorqynyshty fılm

Uzaqtyǵy: 84 mınýt

El: Qyrǵyzstan, 2026

Rejısser: Ilgız Kývatbek, Shamılbek Bekbolsýn ýýlý

Qyrǵyzstannyń qalyń qar basqan shalǵaı aýylynda 12 oqýshy mingen mektep avtobýsy joǵalyp ketedi. Aýyl turǵyndary balalardy tylsym kúshter alyp ketti dep oılaıdy. Olar bul oqıǵaǵa el arasynda «Jez kempir» atanǵan kári emshini kinálaıdy. Ashýǵa býlyqqan jurt odan jaýap talap etýge attanady. Biraq sol túni bolǵan oqıǵanyń shyndyǵy odan da qorqynyshty edi.

Qudiret

Janry: drama

Uzaqtyǵy: 76 mınýt

El: Qazaqstan, 2026

Rejısser: Talgad Janybekov

Almatydaǵy tanymal kardıohırýrg Aıan operatsııa kezinde adam taǵdyry óz qolynda dep senedi. Alaıda bir sátsiz operatsııadan keıin naýqas bala kóz jumady. Dáriger sotqa tartylyp, jumystan shettetiledi. Kóp uzamaı ony halyqaralyq medıtsınalyq forýmǵa shaqyrady. Jolda kóligi buzylyp, dalada jalǵyz qalady. Sol jerde aýyr naýqas balasyn baǵyp otyrǵan Gaýharmen kezdesedi. Bul oqıǵa Aıannyń ómirge kózqarasyn ózgertip, tákapparlyǵyn jeńýge kómektesedi.

Aqyrǵy aıaldama: № 13 kópir, (Pýnkt naznachenııa: Most № 13)

Janry: ýjasy, trıller

Uzaqtyǵy: 107 mınýt

El: Indonezııa, 2026

Rejısser: Djero Poınt

Eldiń eki bóligin jalǵaıtyn alyp kópirdiń qurylysy kezinde adamdar birinen soń biri qaza taba bastaıdy. Osy oqıǵalardan keıin ákesiniń iz-túzsiz joǵalýyna alańdaǵan boıjetken men onyń aǵasy óz betinshe tergeýge kirisedi. Kóp uzamaı olar qurylys alańyndaǵy ólim-jitim jaı ǵana kezdeısoq oqıǵalar emes ekenin ańǵarady. Bireýge nemese áldebir tylsym kúshke jańa qurbandar kerek. Al ajaldyń kezekti qurbanyn tańdaıtyn ýaqyty jaqyndap keledi.

Ymyrt. Saga. Kún tutylýy, (Sýmerkı. Saga. Zatmenıe)

Janry: melodrama, fentezı, trıller

Uzaqtyǵy: 100 mınýt

El: AQSh, 2010

Rejısser: Devıd Sleıd

Sıetl qalasynda jumbaq ólimder kóbeıip, jurtty úreı bıleıdi. Osy oqıǵalardyń artynda Belladan kek alýdy kózdegen vampır tur. Al qaterli jaǵdaıǵa tap bolǵan Bella Edvardqa degen sezimi men Djeıkobpen dostyǵynyń arasynda tańdaý jasaı almaı, ekiudaı kúı keshedi. Onyń sheshimi vampırler men qasqyrlar arasyndaǵy burynnan kele jatqan bitispes tartysty qaıta órshitýi múmkin. Buǵan qosa, mektep bitirýine az qalǵan Bellany ómirindegi eń mańyzdy tańdaýlardyń biri kútip tur: ómir me, álde ólim be?

Rollıng Laýd. Dýmandy dúrbeleń, (Rollıng Laýd. Dıkoe vesele)

Janry: komedııa

Uzaqtyǵy: 110 mınýt

El: AQSh, 2026

Rejısser: Djeremı Garelık

Jasóspirim ulymen til tabysýdy qalaǵan áke ony jasyryn túrde Rolling Loud mýzykalyq festıvaline alyp barady. Alaıda áke men balanyń festıvalge jasaǵan bul sapary kóp uzamaı kútpegen oqıǵalarǵa toly ábigerge aınalady.

Djordj Maıkl: «Senim» týry, (Djordj Maıkl: The Faith Tour)

Janry: derekti kıno, óner

Uzaqtyǵy: 113 mınýt

El: Ulybrıtanııa, 2026

Rejısser: Devıd Ostın, Endrıý Morahen

1988 jyly Djordj Maıkl Parıjdegi «Pale Omnısport de Parı-Bersı» saraıynda eki kesh qatarynan kontsert berdi. Onyń óneri 35 mm kınoplenkaǵa túsirildi. Bul kontsertter ánshiniń Faith Tour atty eýropalyq týry aıasynda ótti. Araǵa jyldar salyp, beınejazba qaıta óńdelip, qalpyna keltirildi.

Imperııanyń qurylýy, (Imperııanyń qurylýy)

Janry: bıografııa, drama, tarıh

Uzaqtyǵy: 140 mınýt

El: Reseı, 2026

Rejısser: Andreı Kravchýk

Uly elshilik saparynan Otanyna oralǵan І Petr teńizge shyǵý jolyn ashý úshin Shvetsııamen uzaqqa sozylǵan soǵysqa kirisedi. Jeńiske jetý jolynda ony talaı synaq, kóńil qalý, aldaý men satqyndyq kútip tur.

Qanaty qataıǵan, (Okrylennaıa)

Janry: drama

Uzaqtyǵy: 100 mınýt

El: AQSh, Avstralııa, Germanııa, 2020

Oleg Boretskııtiń kınoklýby halyqqa jiger beretin fılmder toptamasyn jalǵastyrady. Bul fılm — adam erik-jigeriniń kez kelgen qıyndyqty jeńe alatynyn eske salatyn áserli oqıǵa. Onda mahabbattyń qudireti, jaqyn jandardyń qoldaýy men adamǵa kútpegen jerden kúsh beretin senim týraly baıandalady.

Tiri kitap, (Jıvaıa knıga)

Janry: shytyrman oqıǵaly, fentezı, otbasylyq fılm

Uzaqtyǵy: 104 mınýt

El: Reseı, 2026

Rejısser: Denıs Gýlıar

Ákesinen aıyrylǵan soń Roma jaqsylyqqa senýden qalyp, aıtqanynan qaıtpaıtyn balaǵa aınalady. Bir kúni ol jasqanshaq Vıtıamen birge jumbaq qarttyń úıine jasyryn kiredi. Sol jerden keıipkerleri tirilip ketetin sıqyrly kitaptardy tabady. Abaısyzda olar zulym sıqyrshyny bosatyp alady. Endi dosyn qutqaryp, bárin ornyna keltirý úshin Roma ózine degen senimin qaıta tabýy kerek.

Bórikti mysyq, (Kot v shlıape)

Janry: mýltfılm, fentezı

Uzaqtyǵy: 107 mınýt

El: AQSh, 2026

Rejısser: Alessandro Karlonı, Erıka Rıvınoııa

Qııal men shabyt ınstıtýtynda jumys isteıtin mysyq bir kúni eshteńeden kóńili kóterilmeı, zerigip otyrǵan aǵa men qaryndasqa kómektesýge jiberiledi.

Kishkentaı jyndar Batysty aralaıdy, (Malenkıe demony pýteshestvýıýt na Zapad)

Janry: anımatsııa, komedııa, fentezı

Uzaqtyǵy: 118 mınýt

El: Qytaı, 2026

Rejısser: ıÝı Shýı

Óz tobynan qýylǵan eki jas ıaogýaı — Qaban men Baqa úlken alaıaqtyq oılap tabady. Olar qasıetti jazbalardy izdep Batysqa sapar shegip bara jatqan tan monah pen onyń serikteri týraly estıdi. Sóıtip, solardyń keıpine enip, ózderin ataqty jolaýshylar retinde kórsetpek bolady. Qaban Chjý Batszeniń, al Baqa monahtyń rólin somdaıdy. Úndemeıtin Sha Senniń ornyna kóp sóıleıtin Kúzen jyn tańdalady. Al aılaker Sýn Ýkýnnyń rólin oınaýǵa kóp úgitten keıin jasqanshaq ári ebedeısiz Gorılla kelisedi. Olar shynaıy jolaýshylardan buryn jolǵa shyǵyp, jurttyń qurmetine bólenýdi kózdeıdi. Sondaı-aq qasıetti jazbalarǵa olardan buryn jetip, máńgilik ómirge qol jetkizýdi armandaıdy.

Ań, (Zver)

Janry: boevık, drama, trıller

Uzaqtyǵy: 99 mınýt

El: Ulybrıtanııa, AQSh, 2026

Rejısser: Rennı Harlın

AQSh-ta belgisiz qarýly top memlekettik tóńkeris uıymdastyrady. Osy kezde prezıdent óz ómiri men elin qorǵaý úshin «Ań» dep atalatyn asa qupııa áskerı júıeniń barlyq múmkindigin paıdalanýǵa májbúr bolady.

Ótken aptadaǵy kınopremeralar tizimin osy jerden kóre alasyzdar.