Apta kınopremeralary: Qazaqstan kınoteatrlarynda ne kórýge bolady
ASTANA.KAZINFORM — Jańa kınoaptada kórermenderdi túrli janrdaǵy qyzyqty premeralar kútip tur. Aldaǵy kúnderi qandaı fılmder kórýge bolady — Kazinform tilshisiniń sholýynan oqyńyzdar.
Fantastıka jáne qorqynyshty fılmder
«Shyndyqtyń arǵy jaǵy» (Zakýlıse realnostı) fılminde jıhaz jasaýshy Klark kezdeısoq jumbaq keńistikke aparatyn portal taýyp alady. Ol jer bir-birine uqsaıtyn, sary qabyrǵaly bólmelerden quralǵan sheksiz labırıntke uqsaıdy. Bastapqyda bul jaı ǵana tosyn jaǵdaı bolyp kóringenimen, keıipker qupııa keńistikke tereńdeı túsken saıyn onyń bul jerge tap bolǵan alǵashqy adam emes ekenin túsine bastaıdy.
«Essiz áýestik» (Obsessııa) fılminiń basty keıipkeri — súıgen qyzynyń mahabbatyna jaýap ala almaǵan jas jigit. Bir kúni onyń qolyna tilekti oryndaıtyn mıstıkalyq zat túsedi. Alaıda armandaǵan baqytynyń ornyna mahabbattyń qaýipti ári úreıli túrimen betpe-bet keledi.
«Kassandra» kórermendi 1980-jyldardaǵy shalǵaı aýylǵa jeteleıdi. Jergilikti áıelderge kómektesetin emshi zulymdyqtyń belgilerin kóre bastaıdy. Biraq ýaqyt óte kele ózi de odan qashyp qutyla almaıtyn qorqynyshty oqıǵalardyń bir bóligine aınalady.
Al «Qarǵys atqan rytsar» (Proklıatyı rytsar) fılminde krest joryqtary dáýiri mıstıkalyq oqıǵalarmen astasady. Annanyń kúıeýi joǵalǵannan keıin aýylda jyn-periniń salt attysy paıda bolyp, qalypty ómir túsiniksiz kúshterdiń yqpalymen ózgere bastaıdy.
«Óte qorqynyshty kıno» (Ochen strashnoe kıno) franshızasynyń jalǵasynda eki dos taǵy da kisi óltirýshiler, qubyjyqtar men tylsym kúshterge toly haostyń ortasynda qalady.
Al qazaqstandyq «Kún batystan shyqqanda» fılminde kezekti jumbaq kisi óltirý isin tergegen Aman men onyń áriptesi Lına «Jar Áýlıe» atty orman ishindegi qasıetti orynǵa tap bolady. Onda turatyn jas emshiniń úreıli sózderi shyndyqqa aınala bastaǵanda, oqıǵa múlde basqa arnaǵa burylady. Qasıetti mekendi qorlaǵan jastardyń áreketinen keıin álemniń ózi ózgeriske ushyraıdy.
Fentezı jáne shytyrman oqıǵalar
«Álem ámirshileri» (Vlastelıny Vselennoı) fılminde kórermen qaıtadan kúıregen Eternııaǵa oralady. Arada 15 jyl ótken soń hanzada Adam Hı-Men retindegi taǵdyryn qaıta qabyldap, serikterimen birge álemdi qutqarý úshin Skeletorǵa qarsy kúreske shyǵady.
«Koşeı. Tiri sýdyń qupııasy» (Koşeı. Taına jıvoı vody) anımatsııalyq fılminde áıgili keıipker aqyry baqytqa qol jetkizýge múmkindik alady. Alaıda Varvaraǵa úılený ol oılaǵanynan áldeqaıda qıyn bolyp shyǵady.
«Sıqyrlanǵan patshalyqta» (Zacharovannoe korolevstvo) egizder ýaqytty ózgerte alatyn ǵajaıyp saǵat taýyp alady. Basqa álemge tap bolǵan olar ár sheshimniń óz saldary bar qaýipti synaqtarǵa kezigedi.
Al túrki ańyzdaryna negizdelgen «Qut» fılminde qasıetti jerdi qorǵaýǵa tyrysqan jasóspirimder ejelgi mıftermen betpe-bet keledi. Ýaqyt óte kele ańyzdar shyndyqqa aınala bastaıdy.
Komedııa jáne otbasylyq kıno
«Zverolıýtsııa» anımatsııalyq fılminde Zoıa esimdi qyzdyń úı janýarlary onyń DNQ-syna áser etedi. Sonyń saldarynan adamdar men janýarlar bir-birine uqsaı bastaıdy. Keıipkerler jańa ári túsiniksiz álemde ómir súrýdi úırenýge májbúr bolady.
«Hotıa by kıno 4» fılminde burynǵy sottalǵan adam sheteldegi qaýipti operatsııaǵa qatysý arqyly ómirin ózgertkisi keledi. Biraq oqıǵalar kútpegen baǵytqa órbip, jaǵdaı kúrdelene túsedi.
«Papasynyń qyzy» ákesi men qyzynyń qarym-qatynasyn qalpyna keltirý úshin avtokólikpen shyqqan sapary týraly baıandaıdy. Alaıda jol boıyndaǵy oqıǵalar olardyń ómirin túbegeıli ózgertedi.
Al «Mangyshlaq Express. Poıyzdaǵy dúrbeleń» fılminde Almaty–Mańǵystaý baǵytyndaǵy kádimgi poıyz sapary jumbaqtar men kúdikke toly oqıǵalar tizbegine aınalady.
Anımatsııa
«Qanatyńdy qaq!» (Shevelı perıamı!) anımatsııalyq fılminde jas búrkit qustar ushýdy umytqan álemde ósedi. Dostarymen birge ol joǵalǵan qabiletti qaıtarýǵa tyrysyp, kez kelgen armandy qaıta jańǵyrtýǵa bolatynyn dáleldeıdi.
Bul sanatqa «Sıqyrlanǵan patshalyq» (Zacharovannoe korolevstvo) týyndysyn da jatqyzýǵa bolady. Munda ǵajaıyp álemge jasalǵan saıahat úlken synaqqa aınalady.
Drama jáne trıller
«Úshinshi qabattaǵy qylmys» (Prestýplenıı na tretem etaje) fılminde kıno pániniń oqytýshysy kórshi úıdegi kúmándi jaǵdaıdyń kýási bolady. Kórgeniniń ras ekenin dáleldeýge tyrysqan saıyn ol psıhologııalyq tergeýdiń kúrdeli ıirimine túsip ketedi.
«Ósh-2: Qaryndas» kartınasynda basty keıipker urlanǵan qaryndasyn izdeý úshin qylmys pen zorlyq ústemdik qurǵan álemge kiredi.
Al «Las aqsha» (Grıaznye dengı) fılminde kásibı top urlanǵan mıllıardty qaıtarýǵa attanady. Alaıda operatsııa kóp uzamaı aman qalý úshin kúreske ulasady.
Ótken aptadaǵy kınopremeralar tizimin osy jerden kóre alasyzdar.
