Apta ishinde jasalǵan 3 myń 335 qylmystyń 1 myń 773-iniń izi sýymaı ashyldy - ІІM
TANA. 10 tamyz. QazAqparat /Aıdar Ospanalıev/ - Ótken aptada respýblıkada 3 myń 335 qylmys jasalyp, olardyń 1 myń 773-iniń izi sýymaı ashyldy.
Bul málimettermen búgin jýrnalıstermen bolǵan brıfıngte Іshki ister mınıstrliginiń resmı ókili Nurdildá Oraz tanystyrdy.
Onyń aıtýynsha, apta ishinde izdeýde júrgen 85 kúdikti ustalyp, 7 qarý tárkilendi. Sondaı-aq esirtkimen baılanysty 59 qylmys anyqtalyp, onyń 33-i esirtkini saýdalaýmen baılanysty boldy. Sonymen qatar 266 keli esirtki tárkilenip, onyń 6,5 kelisin geroın qurady. «Atyraý oblystyq qylmystyq polıtsııa qyzmetiniń ókilderi 24 jasar jergilikti turǵyndy óltirý qylmysyn áshkereledi. Atalmysh azamattyń zorlyq-zombylyq áreketteriniń belgisi bar múrdesi shilde aıynda qala mańyndaǵy toǵaıda tabylǵan. Oǵan qatysty degen kúdikpen Atyraý qalasynyń 25-26 jastar aralyǵyndaǵy úsh turǵyny ustaldy», - dedi resmı ókil.
Onyń málimetteri boıynsha, Aqtóbe oblysynyń Birlik aýylynda tamyz aıynyń basynda 20-22 jastar aralyǵyndaǵy eki azamattyń múrdesi tabylǵan. Spırtti ishimdikke toıyp alǵan soń janjaldyń saldarynan bolǵan qylmystyq áreketke qatysty taǵy úsh azamat ustaldy.
