Apta ishinde respýblıka boıynsha 3610 qylmys tirkeldi - ІІM
ASTANA. 7 qyrkúıek. QazAqparat /Marlan Jıembaı/ - Apta ishinde 3610 qylmys tirkelip, «izi sýymaı» - 3265, buryn jasalǵan 443 qylmys ashyldy.
Bul týraly búgin QR Іshki ister mınıstrligi Memlekettik til jáne aqparat departamentiniń basshysy Nurdildá Oraz málim etti.
Onyń atap ótýinshe, buǵan deıin izdeýde bolǵan 80 kúdikti qolǵa túsip, 15 qarý tárkilengen. Sondaı-aq apta ishinde esirtkiniń zańsyz aınalymyna baılanysty 71 qylmys anyqtalǵan. Onyń ishinde 39 satý faktisi. Aınalymnan 884 keli esirtki zaty alynsa, onyń jarty kelisi esirtkiniń eń aýyr túri - geroın.
Máselen, QR ІІM Esirtki bıznesine qarsy kúres komıtetiniń jáne «Delta-Dolına» esirtki bıznesine qarsy kúres óńiraralyq bólimniń qyzmetkerleri birlesip, Jambyl oblysy Merke aýdanynda Tátti aýylynan 55 shaqyrym jerde Qyrǵyz Respýblıkasynyń 30 jastaǵy azamatyn qolǵa túsirdi. Tekserý barysynda kúdiktige tıesili 793 keli daıyndalǵan marıhýana tabyldy.
Al Almaty qalasynda jedel-izdestirý jáne arnaıy is-sharalar kezinde qala kósheleriniń birinde 32 jastaǵy jergilikti azamatsha ustaldy. Onyń jeke zattaryn tintý barysynda býmalanyp oralǵan 215 gram geroın tabyldy. Esirtkiniń qaıdan jetkizilgeni anyqtalýda.
«Joǵaryda atalǵandar ýaqytsha oqshaýlaý ornyna qamaldy. Іri mólsherde esirtki zatyn saqtaý faktisi boıynsha tergeý amaldary júrgizilýde», - dedi N.Oraz.
