Apta ishinde elimizdiń aýmaǵynda 3 306 qylmys tirkeldi

NUR-SULTAN. QazAqparat – Bir apta ishinde elimizdiń aýmaǵynda 3 306 qylmys tirkeldi. Bul jaıynda QR Іshki ister mınıstrliginiń resmı ókili Nurdildá Oraz málim etti, dep habarlaıdy QazAqparat tilshisi.

«Bir apta ishinde 3 306 qylmys jasaldy. Onyń 2 272-si táýlik ishinde ashyldy», - dedi resmı ókil Іshki ister mınıstrliginiń baspasóz qyzmeti alańynda ótken brıfıng barysynda.

Nurdildá Orazdyń dereginshe, polıtsııa qyzmetkerleri «izin sýytpaı» 9 kisi óltirýdi, 4 ólimge ákep soqqan densaýlyqqa qasaqana aýyr zııan keltirýdi, 2 qaraqshylyq, 40 tonaý jáne 558 bóten múlikti urlaý qylmystaryn ashty.

Esterińizge sala ketsek, onyń aldyndaǵy aptada respýblıka aýmaǵynda 3 225 qylmys jasalyp, onyń 2 222-si táýlik ishinde ashylǵan bolatyn.