Apta ishinde bolǵan sporttaǵy ataýly oqıǵalar
NUR-SULTAN. QazAqparat – Osy aptada álem jáne elimizde sport salasynda kóptegen iri jarystar ótkizildi. Atalǵan básekelerde qazaqstandyq komandalar men sportshylar jankúıerler kóńilinen shyǵatyn nátıjege qol jetkizdi. Keıbirinde kórsetkish kópshilikti qanaǵattandyra alǵan joq. QazAqparat tilshisi atalǵan sporttyq sharalarǵa taǵy bir márte nazar aýdaryp, olarǵa sholý jasap kórgen edi.
Jazǵy Olımpıada-2028 qashan bastalady?
2028 jylǵy jazǵy Olımpıadanyń ótetin merzimi belgilendi.
Atalǵan jazǵy Olımpıada AQSh-tyń Los-Andjeles qalasynda 2028 jyldyń 14-30 shilde aralyǵynda ótedi. Al Paralımpıada 15-27 tamyz kúnderine josparlanyp otyr.
Aıta ketsek, Los-Andjeles osydan bes jyl buryn 2028 jylǵy jazǵy Olımpıada astanasy retinde anyqtaldy. Bul qalada budan buryn 1932 jáne 1984 jyldary atalǵan dúbirli doda ótkizilgen bolatyn.
Álem jurtshylyǵy AQSh-ty atalǵan saıysty eń kóp ótkizgen el retinde tanıdy. Onda 4 ret jazǵy jáne 4 ret qysqy Olımpıada ótkizilgen. Sondaı-aq osy aptada
2022 jylǵy Azııa oıyndaryn ótkizýdiń jańa merzimi jarııalandy . Bul jóninde Azııanyń Olımpıadalyq keńesi resmı málimdedi.
Endi Azıada 2023 jyldyń 23 qyrkúıegi men 8 qazany aralyǵynda ótedi. Atalǵan týrnırdiń ótkizý merzimi negizinde 2022 jyldyń 10-25 qyrkúıek aralyǵyna belgilengen edi. Azııa oıyndary Qytaıdyń Hanchjoý qalasynda ótetini josparlanǵan bolatyn. Álemdegi koronavırýs ınfektsııasynyń órshýine baılanysty ol keıinge shegerildi.
Elenanyń eleýli jetistigi
2022 jyly eń kóp aqsha tapqan álemniń eń úzdik 16 tennısshisiniń reıtıngi jarııalandy .
Tizimge, erler de áıelder de kirdi. Ýımbldonda jeńimpaz atanǵan qazaqstandyq tennısshi Elena Rybakına da osy reıtıngte 7-shi orynnan kórindi. Ol 3.3 mln dollar tabys tapqan.
Sondaı-aq, tennısshi Beıbit Jýkaev álemdik reıtıngide rekordtyq nátıjege qol jetkizdi.
Reıtıng demekshi, aıta keteıik qazaqstandyq tennısshilerden erler arasynda Aleksandr Býblık, áıelder arasynda Elena Rybakına joǵary satyda tur.
Al elordada alǵash ret ATP 500 týrnıri ótetin boldy.
Jánibek Álimhanuly álem chempıony atanýy múmkin
Kásipqoı boksshy Jánibek Álimhanuly jekpe-jekke qatyspaı-aq tolyqqandy álem chempıony atanýy múmkin.
WBO resmı túrde amerıkalyq boksshy Demetrıýs Andradege (31-0, 19 KO) orta salmaqtaǵy belbeýin qorǵaýdy buıyrdy. Eger ol bas tartsa, Jánibek Álimhanuly avtomatty túrde «ýaqytsha» álem chempıony ataǵynan «tolyqqandy» chempıon dárejesine ıe bolady.
Álimhanuly mamyr aıynda brıtandyq Dennı Dıgnýmdy (14-1-1, 8 KO) ekinshi raýndta nokaýtqa túsirip, WBO ýaqytsha belbeýin jeńip alǵan bolatyn. Andradege keletin bolsaq, ol da mamyr aıynda rıngke oralyp, ırlandııalyq Zak Parkermen (22-0, 16 KO) judyryqtasýy kerek edi, biraq jaraqat alyp, jekpe-jek ótpeı qaldy.
Eýrokýboktaǵy sátsiz oıyndar
Ótip bara jatqan aptada fýtboldan Konferentsııa lıgasynda ekinshi irikteý satysy oıyndary ótkizildi. Týrnırdiń atalǵan satysynda elimizdiń atynan qostanaılyq «Tobyl», elordalyq «Astana», almatylyq «Qaırat» jáne petropavldyq «Qyzyljar» komandalary synǵa tústi.
Eýrokýbok oıyndaryna óz tarıhynda tuńǵysh ret qatysýǵa múmkindik alǵan «Qyzyljar» horvatııalyq «Osıek» komandasyna 1:2 esebimen jol berdi.
Fýtboldan Konferentsııa lıgasynda «Tobyl» jeńip, «Qaırat» qarsylasyna ese jiberdi.
Taǵy bir kezdesýde Almatynyń «Qaıraty» óz alańynda vengrııalyq «Kıshvarda» komandasyn qabyldady.
Vengrııalyq komandadan ıAsır Asanı 82-mınýtta gol soǵyp ketti. Osylaısha «Qaırat» qarsylasyna 0:1 esebimen ese jiberdi.
Al qostanaılyq «Tobyly» óz alańynda Gıbraltardyń «Lınkoln Red Imps» komandasymen sheberlik baıqasty.
«Tobyl» oıynshysy Aıbar Jaqsylyqov 65-mınýtta qarsylastar qaqpashysyn qapy qaldyrsa, Serj Deble 89-mınýtta esepti ústemeleı tústi. Alǵashqy kezdesýinde «Tobyl» qarsylasynan 2:0 esebimen basym tústi.
Elordalyq «Astana» Polshanyń «Rakýv» komandasynan 0:5 esebimen oısyraı jeńildi.
Jas aýyr atletter tabysy
Ózbekstan astanasy Tashkent qalasynda ótip jatqan aýyr atletıkadan jasóspirimder men jastar arasyndaǵy Azııa chempıonatynda qazaqstandyq sportshylar jeńisimen jankúıerdi jelpindirip otyr.
Qurlyqtyq dodaǵa el quramasy sapynda uldardan 13, qyzdardan 9 aýyr atlet bardy.
Qazaqstandyq aýyr atletter qatarynan Edige Emberdi (73 keli), Álisher Baıbýrov (67 keli), Denıs Polýboıarınov (81 keli) altyn medal aldy. Sondaı-aq Nadejda Lı (64 keli), Arýjan Dáýletova (71 keli), Alekseı Chýrkın (73 keli) kúmis medalǵa qol jetkizdi. Al Erasyl Omarov (55 keli), Azamat Tólegen (61 keli) jáne Egor Sherer (81 keli ) qola júldeger atandy.
Azııa chempıonaty erteń, 25 shildede máresine jetedi.
Fýtzaldan álem chempıonatyna irikteý bastalady
Fýtzaldan 2024 jylǵy álem chempıonaty negizgi satysyndaǵy Qazaqstan quramasynyń qatysýymen ótetin oıyndar kestesi belgili boldy.
Eske salsaq, ulttyq qurama besinshi topqa tústi. Qarsylastary - Slovenııa jáne Chernogorııa.
Qazaqstandyq fýtzalshylar alǵashqy oıynyn óz alańynda bıylǵy jyldyń 8 qazanynda Slovenııaǵa qarsy ótkizedi. Odan keıin 12 qazanda syrt alańda Chernogorııamen sheberlik baıqasady. Al Chernogorııamen óz alańyndaǵy oıyny 9 qarashaǵa belgilense, Slovenııamen taǵy bir kezdesý 2023 jyldyń 8 naýryzynda bolady.
