Apta ishinde 3 bala kópqabatty úılerdiń terezesinen qulady

ASTANA. QazAqparat - 19 naýryz kúni saǵat 18:15-te Qaraǵandy oblysynyń Balqash qalasyndaǵy Muhamedjanov shaǵynaýdanynda eki jasar bala 5-qabatta ornalasqan páterdiń terezesinen qulap ketken, dep habarlaıdy QazAqparat.

QR Tótenshe jaǵdaılar mınıstrligi baspasóz qyzmetiniń habarlaýynsha, qaıǵyly sátte balanyń anasy basqa bólmede bolǵan. Aýyr jaraqat alǵan bala Balqash qalasyndaǵy ortalyq aýrýhanaǵa jetkizildi. Sol jaq jambasynda ashyq synyǵy bar, balanyń jaǵdaıy aýyr.

Shymkentte kóppáterli turǵyn úılerdiń biriniń terezesinen bes jasar qyz qulap tústi. Jazataıym oqıǵa týraly aqparat 23 naýryzda saǵat 14.50-de «103» qyzmetinen Shymkent qalasy, TJ departamentiniń Daǵdarys jaǵdaılarda basqarý basqarmasyna tústi. Oqıǵa Shymkent qalasy, Ál-Farabı aýdany, 16 shaǵynaýdanyndaǵy kópqabatty № 18 turǵyn úıde bolǵan. Kóp páterli 5-qabatty turǵyn úıdiń 4-qabatynda ornalasqan páterdiń terezesinen ata-anasynyń qaraýynsyz qalǵan 2018 jyly týǵan qyz terezeden qulap túsken. Ol tez arada aýyr jaǵdaıda aýrýhanaǵa jetkizildi.

Oqıǵanyń mán-jaıyn Shymkent qalasy Polıtsııa departamentiniń qyzmetkerleri anyqtap jatyr. Qazirgi tańda qyzǵa operatsııa jasaldy.

Sondaı-aq, Astana qalasynda bıylǵy 21 naýryzda «103» jedel medıtsınalyq járdem stantsııasynan turǵyn úıdiń terezesinen balanyń qulap túskeni týraly habarlama kelip tústi.

21 naýryz kúni saǵat 18.55-te Áýezov kóshesinde bes qabatty turǵyn úıdiń tórtinshi qabatynan eresekterdiń qaraýynsyz qalǵan 2014 jyly týǵan qyz terezeden qulap tústi. Qyz bala aýrýhanaǵa jatqyzyldy, jaǵdaıy ortasha.

Joǵaryda atalǵan jaǵdaılardyń barlyǵy eresekterdiń, ata-analardyń salǵyrt qaraýynyń, balalardyń júris-turysyn baqylamaýynyń, terezelerde arnaıy bekitetin qurlǵylardyń bolmaýynyń, jıhazdy durys ornalastyrmaýdyń saldarynan boldy. Al jıhazdy durys ornalastyrmaý balalarǵa terezelerge óz betinshe kóterilýine múmkindik beredi.

Osyǵan baılanysty TJM eskertedi!

Balalardyń terezeler men balkondardan qulaýyna jol bermeý úshin kelesi qaýipsizdik sharalaryn saqtańyzdar:

- kishkentaı balalardy qaraýsyz qaldyrmańyz;

- kishkentaı bala terezeniń aldyna shyǵa almaý úshin jıhazdyń barlyq túrlerin terezeniń janynan alyp tastańyz;

- moskıt toryna senbeńiz, olar qaýipten qutqarmaıdy;

- balaǵa terezeni birneshe santımetrden artyq ashýǵa múmkindik bermeıtin arnaıy bekitkishterdi qoıyńyz;

- ashyq terezeniń janynda bolý qaýpi týraly balalarǵa túsindirińiz;

- eger bekitkish qurylǵy ornatý múmkindigi bolmasa, terezeniń tutqasyn alyp tastap, ony tek qajet bolǵan jaǵdaıda ornatyńyz.

«Barlyq oqıǵalar men TJ týraly 112 nemese 101 telefondary boıynsha habarlańyz»,-delingen QR TJM baspasóz qyzmeti taratqan habarlamada.