Apple Watch saǵaty el kútkendeı qyzyqty bolmaı shyqty
ASTANA. QazAqparat - Keshe kópten kútken Apple óniminiń álemdik tusaýkeseri ótti. Alaıda Apple Watch qolsaǵatyn armandap júrgenderdiń qarasy áldeqaıda az bolyp shyqty, dep jazady khabar.kz.
Apple kompanııasynyń kezekti ónimi álemniń 6 eksklıýzıvti dúkenderinde ǵana satylymǵa shyqpaq. Olar London, Parıj, Berlın, Mılan, Tokıo jáne Los-Andjeleste ornalasqan.
Apple Watch - aty álemge máshhúr kompanııanyń negizin qalaýshy Stıv Djobstyń qazasynan keıin jahandyq naryqqa shyǵarylǵan alǵashqy jańa qurylǵy. Saǵat týraly synshylardyń pikiri san túrli. Olardyń birazy qolsaǵattyń zamanaýılyǵyn moıyndasa, endi biri óz baǵasyn aqtaıtynyna senimdi emes.
Sport atalatyn eń arzan úlgisiniń baǵasy - 299 fýnt. Al altynmen aptalǵan eń qymbatyna qol jetkizgińiz kelse, qaltańyzdaǵy qarajat 13 myń fýntten kem bolmaǵany abzal. El aýzyndaǵy qurylǵynyń ereksheligi - telefonǵa kelip túsken qońyraý, habarlandyrý nemese elektrondy poshtadaǵy ózgerister týraly óz ıisine habar berip turýynda. Sonymen qatar saǵat iPhone smartfonymen juptasqan kúıde ǵana jumys jasaıdy. Qýat kúshiniń qaýqary tek bir kúnge ǵana jetkilikti. Sondaı-aq saǵat ıeleriniń bir-birimen sýret almasa alatyn artyqshylyǵy taǵy bar.
Apple kompanııasy taýardyń jetkizilimi týraly málimetti ázirge jarııalamaı otyr. Al saǵattyń alǵashqy qoldanýshylary jańa qurylǵy múmkindikteriniń shekteýli ekenine kóz jetkize túsýde.
