Apple Ulybrıtanııada sanktsııalardy buzǵany úshin aıyppul arqalady
ASTANA. KAZINFORM — Ulybrıtanııa bıligi amerıkalyq Apple kompanııasyna antıreseılik sanktsııalardy buzǵany úshin 390 myń fýnt sterlıng (shamamen 516 myń AQSh dollary) kóleminde aıyppul saldy. Bul týraly Ulybrıtanııanyń Qarjylyq sanktsııalardy iske asyrý basqarmasy (OFSI) málimdedi, dep TASS agenttigi jazdy.
Aıyppul salýǵa «lıtsenzııasyz sanktsııaǵa ilikken tulǵaǵa aqsha qarajatyn berý» sebep bolǵan.
Málimetke sáıkes, aıyppul Apple Distribution International Ltd. (ADI) kompanııasyna qatysty qoldanylǵan. Tergeý barysynda ADI Reseıdiń Okko mýltımedııalyq servısine jalpy somasy 635,62 myń fýnt (shamamen 841 myń dollar) kóleminde eki tólem jasaǵany anyqtalǵan. Bul tólemder 2022 jyldyń maýsym jáne shilde aılarynda júrgizilgen.
ADI — Irlandııada tirkelgen Apple kompanııasynyń enshiles uıymy, ol Eýropa men Taıaý Shyǵystaǵy bıznesti júrgizýge jaýapty. Kompanııa bul yqtımal zańbuzýshylyq týraly brıtandyq qadaǵalaý organyna ózi habarlaǵan.
2022 jyldyń mamyr aıynda Sberbank óziniń ekojúıesine kirgen birqatar kompanııalar quramynan shyqty. Reseılik zańdy tulǵalar tizilimine sáıkes, «Zvýk», Okko, «Okko Sport», SberCloud, TsRT kompanııalar toby jáne «Evotor» ІT-kompanııasy «Novye vozmojnostı» kompanııasynyń menshigine ótken. Al 2022 jyldyń qarashasynda Okko onlaın-kınoteatrynyń benefıtsıary kompanııa menedjmenti boldy.
AQSh 2022 jyldyń sáýir aıynyń basynda Sberbankke qarsy buǵattaýshy sanktsııalar engizgen bolatyn. Bul sanktsııalar AQSh aýmaǵyndaǵy aktıvterdi buǵattaýdy jáne amerıkalyq azamattarǵa bankpen kez kelgen operatsııa jasaýǵa tyıym salýdy qamtıdy. Osyndaı shekteýlerdi Ulybrıtanııany qosa alǵanda, birqatar elder de engizdi.
Al 2022 jyldyń 29 maýsymynda Ulybrıtanııa «Novye vozmojnostı» kompanııasyna da sanktsııa saldy.
Aıta keteıik, Apple kompanııasy Qytaıdaǵy App Store dúkenindegi qoldanba ishindegi satyp alýlar úshin alynatyn komıssııa tólemderin 2026 jyldyń 15 naýryzynan bastap azaıtady.