Apple pen Adidas Qazaqstandaǵy quqyqtarynyń buzylǵandyǵyn aıtty
PETROPAVL. QazAqparat - Soltústik Qazaqstan oblysy ádilet basqarmasynyń basshysy Rýslan Kákitaı 2017 jylǵy jumystardyń qorytyndysyn jarııalady, dep habarlaıdy QazAqparat tilshisi.
R. Kákitaıdyń aıtýynsha, ótken jyly zııatkerlik menshik quqyqtaryn qorǵaý boıynsha kóp jumys atqarylǵan.
«Quqyq ıelerimen birlesken jumys júrgizilip jatyr. 2017 jyly ádilet departamentine IKEA, FARY, NADLOC, StarLaın, Beats, Apple, Adidas jáne Reebok sekildi taýar belgileri men ataýlarynyń quqyǵy buzylǵan faktiler týraly shaǵymdar keldi», - deıdi ol.
Departament basshysy atalǵan faktilerdiń barlyǵy boıynsha tekserister júrgizilip, 11 ákimshilik is qozǵalǵanyn, jalpy 265 myń teńgeniń ónimi tárkilengenin jetkizdi.
«QR Ákimshilik quqyq buzýshylyq týraly kodeksiniń 158-babyna sáıkes, 11 tulǵa ákimshilik jaýapqa tartyldy. Olarǵa salynǵan aıyppuldardyń jalpy mólsheri 971 myń teńgeden asady», - deıdi ol.
Óńirde «Alımentti tóleýden jaltarýǵa qarsy 30 qadam» jobasy iske asyrylýda. Byltyr departament qyzmetkerleri alıment tóleý boıynsha qaryzy bar 134 tulǵanyń júrgizýshi kýáligin alyp, zań aldyndaǵy mindetterin oryndaýyn talap etti.
«QR QK 139-babymen 240 boryshkerge qatysty isti qaraý jáne protsestik sheshim qabyldaý úshin ishki ister organdaryna jiberildi. Sonyń ishinde 2 boryshker qylmystyq jaýapqa tartyldy», - deıdi Rýslan Kákitaı.
