Apple, Microsoft, Tesla: BJZQ aktıvteri qandaı sheteldik aktsııalarǵa salynǵan

ASTANA. KAZINFORM – Ulttyq banktiń Monetarlyq operatsııalar departamentiniń dırektory Nurjan Tursynhanov Biryńǵaı jınaqtaýshy zeınetaqy qorynyń dollarmen saqtalatyn aktıvteri qandaı sheteldik emıtentterge salynǵanyn atady.

- 2025 jylǵy 1 qańtardaǵy málimet boıynsha BJZQ zeınetaqy aktıvteriniń shamamen 40%-y (17,2 mlrd dollar nemese 9 trln teńge) valıýtamen saqtaýly. Portfeldiń valıýta bóligi sheteldiń negizgi aktıv klastaryna ınvestıtsııalanady. Olarǵa AQSh qazynashylyq oblıgatsııalary, damýshy elderdiń memlekettik oblıgatsııalary, ınvestıtsııalyq deńgeıdegi korporatıvtik oblıgatsııalar men aktsııalar jatady, - dedi Ulttyq bank ókili Senatta ótken dóńgelek ústelde.

Sondaı-aq, ol dollarmen saqtaýly aktıvter qandaı tanymal kompanııalardyń aktsııasynda jatqanyn aıtty.

- Valıýtalyq portfeldiń aktıvteri ındekstik negizde basqarylady, ındeks tańdaýly ınvestıtsııa naryǵyndaǵy kóptegen baǵaly qaǵazdan turady. Mysaly, aktsııalar ındeksi Apple, Microsoft, Tesla jáne basqa da kompanııalardyń 1 000-nan astam emıtentinen quralady, - dedi Nurjan Tursynhanov.

BJZQ-niń teńgemen saqtaýly portfeliniń kólemi 13,4 trln teńgege jetken. Bul búkil aktıvtiń 60%-y degen sóz. Onyń shamamen 70%-y memlekettik baǵaly qaǵazdarǵa, 15%-y kvazımemlekettik kompanııalardyń oblıgatsııalaryna, 7%-y bankterdiń oblıgatsııalaryna salynǵan.

Buǵan deıin Ulttyq bank tóraǵasynyń orynbasary Aqyljan Baımaǵambetov Biryńǵaı jınaqtaýshy zeınetaqy qorynyń aqshasy qandaı jobalarǵa ınvestıtsııalanatynyn aıtqan edi.