Apple men OpenAI-ǵa monopolııa jasady degen aıyp taǵyldy
ASTANA.KAZINFORM – Ilon Maskqa tıesili xAI kompanııasy Apple jáne OpenAI kompanııalaryna qarsy 61 betten turatyn sotqa shaǵym túsirip, olardyń jasandy ıntellekt naryǵyndaǵy básekelestikti zańsyz túrde shektep otyrǵanyn málimdedi.
Shaǵymnyń basynda Apple kompanııasy jasandy ıntellektini baıaý damytqany aıtylyp, keıin bul tehnologııany iPhone-nyń naryqtaǵy ústemdigine qaýip tóndiretin faktor retinde qarastyra bastaǵany kórsetilgen. Qujatta Masktyń kompanııalary ázirlep jatqan «sýperqosymsha» smartfon fýnktsııalarynyń kóbin almastyryp, Apple-diń yqpalyn álsiretýi múmkin ekeni alǵa tartylǵan.
xAI shaǵymynda, smartfon naryǵyndaǵy óz monopolııasyn qorǵaýǵa tyrysqan Apple, básekelestikti jáne JI salasyndaǵy jańashyldyqty tejep otyrǵan OpenAI kompanııasymen seriktestikke bardy delingen.
Sonymen qatar qujatta ChatGPT júıesiniń Apple qurylǵylaryna ıntegratsııalanýy sıpattalyp, ózge básekeles júıelerdiń nazardan tys qalǵany aıtylǵan. Shaǵymda Apple kompanııasyndaǵy JI salasy qyzmetkerleriniń bul jaǵdaıdy «daǵdarys» dep baǵalaǵany, al kompanııanyń aǵa vıtse-prezıdenti Eddı Kıý jasandy ıntellekt 10 jyl ishinde iPhone-dy naryqtan yǵystyrýy múmkin ekenin eskertkeni kórsetilgen.
– Apple men OpenAI arasyndaǵy eksklıýzıv kelisimniń nátıjesinde júzdegen mıllıon iPhone qurylǵysy arqyly keletin mıllıardtaǵan suranystan tek ChatGPT paıda kórip otyr. Bul óz kezeginde ChatGPT jáne sýperqosymshaǵa negizdelgen ózge de chat-bottardyń ósýine jáne jańashyldyq engizýine kedergi keltiredi, – delingen qujatta.
Shaǵymda xAI kompanııasy Apple-diń bul «monopolııany» App Store arqyly da qorǵap otyrǵanyn atap ótedi. Atap aıtqanda, básekeles qosymshalar, mysaly Grok, reıtıngte tómen kórsetilip nemese maquldaý protsesi uzartylyp, tutynýshylardyń tańdaýyn shekteý arqyly naryqtaǵy básekelestikti tejep jatyr delingen.
– Generatıvti JI chat-bottary naryǵynda shynaıy básekelestik ornasa, tutynýshylar óz tańdaýlaryn erkin jasaı alady, – delingen qujatta.
Sondaı-aq qujatta bul tájirıbeler smartfon naryǵyna keńinen áser etetini aıtylǵan. xAI málimdeýinshe, JI-ge negizdelgen «sýperqosymsha» habar almasý, qarjylyq qyzmetter, oıyn-saýyq jáne kontent jasaý fýnktsııalaryn biriktirip, túrli qurylǵylarda qoldanýǵa múmkindik beredi. Mundaı qyzmetter paıdalanýshylarǵa belgili bir júıege baılanbaı, balama qurylǵylarǵa kóshýin jeńildetedi.
Shaǵymda Apple men OpenAI «óz naryqtarynda básekelestikti basý úshin kúsh biriktirdi» delingen. Onda 2024 jyldyń maýsymynda Apple-diń ChatGPT-di iOS júıesine eksklıýzıvti túrde engizetini týraly jarııalaǵany, al Grok, Google jáne Anthropic sekildi ózge usynystardyń qabyldanbaǵany da atap ótiledi.
Apple men OpenAI arasyndaǵy bul kelisimniń eksklıýzıvti bolýyna eshqandaı bıznes sebep joq. Apple birneshe chat-botty qoldap, odan da kóp paıda taba alatyn edi. Alaıda kompanııa tek bir chat-botty tańdady, bul iPhone qoldanýshylaryn ChatGPT-ge baılap qoıdy.
– Apple men OpenAI arasyndaǵy kelisim generatıvti jasandy ıntellektke negizdelgen chat-bottar arasyndaǵy básekelestikti toqtatty, básekeles ónimderdiń aýqymyn keńeıtý múmkindiginen aıyrdy jáne sapa men ınnovatsııalar deńgeıin tómendetti. Munyń bári, óz kezeginde, OpenAI men Apple kompanııalaryna óz monopolııalaryn saqtap qalýǵa kómektesti, – delingen talap-aryzda.
Qujatta ChatGPT-diń naryqtaǵy úlesin kórsetý úshin naqty derekter de keltirilgen. OpenAI basshylyǵynyń málimetinshe, ChatGPT AQSh-taǵy naryqtyń 85 paıyzyn, al álemdik naryqtyń 80-90 paıyzyn ıelenip otyr. Sondaı-aq 2025 jyldyń shildesine qaraı atalǵan mobıldi qosymshasy 938 mıllıon ret júktelgen, bul onyń eń jaqyn básekelesinen bes ese artyq. Qoldanýshylardyń jahandyq shyǵyndary 2 mıllıard AQSh dollaryna jetken.
xAI shaǵymynda Grok chat-boty qajetti deńgeıge jete almaı, ınvestıtsııa kólemi men kirisi azaıǵany, sonyń saldarynan kompanııa quny da tómendegeni aıtylǵan. Sonymen birge, X áleýmettik jelisi de zardap shekkeni, óıtkeni Grok-tyń shekteýli damýy qoldanýshylar belsendiligi men tabysqa teris áser etkeni kórsetilgen.
Buǵan deıin, amerıkalyq kásipker Ilon Mask Apple kompanııasy OpenAI-ge basymdyq beretinin aıtqan bolatyn.