Apple men Google vırýs juqtyrǵan patsıentterdi baqylaıtyn qosymshany iske qosty
VAShINGTON. QazAqparat – Álemge tanymal Apple jáne Google kompanııalary kópten kútken qosymshany iske qosty. Ol COVID-19 juqtyrǵan adamnyń ornyn habarlaıdy. Bul týraly QazAqparat Technology Review-ge silteme jasap habarlaıdy.
Bul qosymsha álemniń densaýlyq saqtaý organdaryna koronavırýstyń taralýyn qadaǵalaýǵa múmkindik beredi. Álemniń túrli elderiniń úkimeti endi bul tehnologııany aýrý juqtyrǵan naýqastardy jáne olarmen baılanysta bolýy múmkin adamdardy baqylaý úshin qoldana alady.
Jıyrmadan astam el naýqaspen baılanysta bolǵan adamdardy baqylaýǵa arnalǵan óz qosymshasyn shyǵardy, biraq Apple jáne Google kompanııalarynyń birlesip jasaǵan qosymshasy pandemııamen kúres protsesin edáýir jedeldetedi dep kútilýde.
Bul ǵalamdyq alpaýyttardyń seriktestigi aýrýdy juqtyrýy múmkin tasymaldaýshylardy tabý boıynsha aqparat almasýǵa múmkindik beredi.
Apple jáne Google bes qurlyqtaǵy 22 memleket, sonymen qatar AQSh birneshe shtaty API-ge qol jetkizgenin málimdedi.
Apple jáne Google kompanııalarynyń habarlaýynsha, koranavırýsy bar naýqastardy baqylaý tehnologııasy pandemııany jeńgen elderde birtindep óshiriledi.
Mundaı tehnologııa pandemııa aýqymyn jeńýge kómektesedi. Sondaı-aq jahandyq ekonomıkany qalpyna keltirý protsesiniń bir bóligi bola alady.
