Apple kompanııasy iOS júıesin buzyp kirgen 17 jasar hakerdi jumysqa aldy
ASTANA. QazAqparat - Álemde eń berik sanalatyn iOS pen OS X júıelerin buzyp kirgen Winocm esimdi jas hakerdiń tanymaldylyǵy kún sanap artýda. Onyń Twitter-degi sózderine qaraǵanda, Apple kompanııasy jas talantty jumysqa alyp jatqan kórinedi.
Qazirgi ýaqytta haker óziniń aty-jónin jarııalaǵan joq, alaıda onyń jasy nebári 17 jasta jáne ol mektepte oqıtyndyǵy belgili. Kompıýterlik baǵdarlamalarmen ol 9 jasynda aınalysa bastaǵan jáne búginde úlken jetistikterge de jetken. Ásirese ol Apple ónimderine qatysty barlyq qyr-syrlardy, sonyń ishinde onyń osal tustaryn myqty meńgergen.
Mysaly, Winocm - tek Apple ónimderinde ornatylǵan iOS pen OS X júıeleriniń ıadrolyq kodtaryn kóshirip alyp, ózge óndirýshilerdiń ónimderine engize alǵan jalǵyz adam. Onyń aıtýynsha, Apple kompanııasynyń júzdegen programmısteri jasaǵan jumysty ol jalǵyz ózi atqaryp shyqqan. Ázirge 17 jastaǵy haker atalmysh kompanııada qandaı qyzmetke taǵaıyndalatyny belgisiz. Múmkin ol iOS qaýipsizdigine qatysty suraqtarǵa tartylýy da ǵajap emes.
