Apple kompanııasynyń sırek kompıýteri aýktsıonda 1,15 mıllıon dollarǵa satyldy
ASTANA. KAZINFORM — Apple tarıhyndaǵy eń sırek kompıýterlerdiń biri Nıý-Iorkte Bonhams aýktsıonynda 1,15 mıllıon dollarǵa satyldy, dep habarlaıdy BILD.
Hatfield dep atalatyn kompıýter 1976 jyly, ıaǵnı Apple kompanııasy qurylǵan jyly shyǵarylǵan. Qurylǵy áli de jumys isteıdi. Onyń baspa taqshasynda kompanııanyń negizin qalaýshylardyń biri Stıv Voznıaktyń qoltańbasy saqtalǵan.
Kompıýtermen birge jańa ıesine Stıv Djobstyń 1978 jylǵy qańtarda jazǵan haty da tabystaldy. Hatta Djobs qurylǵynyń alǵashqy ıesi Fred Hetfıldke Apple-1 kompıýterin 4 kılobaıt jady bar jańa Apple II modeliniń taqshasyna aıyrbastaýdy usynǵan. Alaıda Hetfıld bul usynystan bas tartyp, kompıýterdi saqtap qalǵan. Arada ondaǵan jyl ótken soń, ol qundy tarıhı jádigerge aınaldy.
Apple-1 kompanııanyń alǵashqy ónimi boldy. Ol qurastyrylǵan baspa taqshasy túrinde satylǵan. Satyp alýshy oǵan pernetaqta men monıtordy ózi jalǵaýy kerek edi.
Apple-1 kompıýterleriniń tizilimine sáıkes, bul modeldiń 94 danasynyń bar ekeni rastalǵan. Bonhams aýktsıon úıiniń baǵalaýynsha, qazir álemde osyndaı kompıýterlerdiń 75 danasyna jetpeıtini saqtalǵan. Al olardyń ishinde áli de jumys istep turǵandary odan da az.
Aýktsıon bastalǵanǵa deıin Hatfield kompıýteriniń quny 500–800 myń dollar aralyǵynda baǵalanǵan.
Eske sala keteıik, Apple qaıtadan álemdegi eń qymbat kompanııa atandy.
