Apple kompanııasynyń bas dırektory qyzmetinen ketedi
ASTANA. KAZINFORM — Apple kompanııasy basshylyǵynyń josparly aýysýy týraly resmı túrde habarlady. Qazirgi bas dırektor Tım Kýk dırektorlar keńesiniń atqarýshy tóraǵasy qyzmetine aýysady, onyń ornyna Djon Ternýs keledi.
Sheshim 2026 jylǵy 1 qyrkúıekte kúshine enedi. Dırektorlar keńesi apparattyq qamtamasyz etýdi ázirleý jónindegi aǵa vıtse-prezıdent Djon Ternýsty kompanııanyń bas atqarýshy dırektory qyzmetine biraýyzdan bekitti.
Tım Kýk jazdyń sońyna deıin CEO mindetin atqara beredi, ókilettikterdiń birqalypty berilýin qamtamasyz etý úshin Ternýspen tyǵyz jumys isteıdi. Odan keıin ol dırektorlar keńesiniń atqarýshy tóraǵasy qyzmetin atqaryp, búkil álemdegi memlekettik qurylymdarmen ózara is-qımylǵa nazar aýdarady.
Eske sala keteıik, Kýk Apple kompanııasyna 1998 jyly kelgen, 2011 jyldan bastap ony basqaryp keledi. Onyń basshylyǵy kezeńinde Apple jahandyq naryqtaǵy pozıtsııasyn aıtarlyqtaı nyǵaıtty. Kompanııanyń naryqtyq kapıtalızatsııasy shamamen 350 mlrd dollardan 4 trln dollarǵa deıin ósti, al byltyrǵy jyldyq tabysy 416 mlrd dollardan asty.
Onyń jetekshiligimen Apple jańa ónim sanattaryn iske qosty, sonyń ishinde Apple Watch, AirPods jáne Apple Vision Pro bar. Sondaı-aq kompanııa iCloud, Apple Pay, Apple TV jáne Apple Music sııaqty servıstik baǵytty belsendi damytty. Búginde bul qyzmetter kompanııaǵa jylyna 100 mlrd dollardan astam tabys ákeledi.
Djon Ternýs Apple kompanııasynda 2001 jyldan beri jumys isteıdi. Ol 2021 jyly apparattyq ınjenerııa jónindegi aǵa vıtse-prezıdent retinde joǵary basshylyq quramyna kirdi.
Ternýs óz mansabynda iPhone, Mac, iPad jáne Apple Watch sııaqty ónim jelileriniń damýyn basqardy. Sondaı-aq AirPods jáne iPhone 17 serııasy, sonyń ishinde Pro, Pro Max jáne iPhone Air sııaqty jańa modelderdiń iske qosylýyna qatysqan.
Ternýs ónimderdiń senimdiligi men ekologııalyq turaqtylyǵyn arttyrýǵa erekshe kóńil bóldi. Onyń jetekshiligimen qaıta óńdelgen alıýmınıı, 3D-basyp shyǵarǵan tıtan sııaqty jańa materıaldar engizilip, qurylǵylardyń jóndeýge jaramdylyǵy jaqsartyldy.
Eske sala keteıik, Apple álemdegi eń qymbat brend atanǵan bolatyn.