Apple kompanııasy jarqyn tústi, qoljetimdi MacBook A18 Pro modelin shyǵarmaq
ASTANA. KAZINFORM — Apple kompanııasy bıýdjet segmentine arnalǵan jańa MacBook noýtbýgin shyǵarýǵa daıyndalyp jatyr. Qurylǵy iPhone smartfondaryna arnalǵan protsessormen jabdyqtalyp, jarqyn tústi korpýsta usynylady. Jańalyqtyń resmı tanystyrylymy naýryz aıynda ótedi dep kútiledi. Bul týraly Bloomberg-ke silteme jasap, 24 kg jazdy.
Jańa modeldiń basty ereksheligi – dástúrli Apple Silicon M-serııasynyń chıpteriniń ornyna iPhone 16 Pro smartfonynda qoldanylatyn A18 Pro protsessorynyń paıdalanylýy. Ónimdilik turǵysynan bul sheshim qazirgi MacBook Air modelderinen tómen bolýy múmkin, alaıda A18 Pro qýaty M1 chıpimen shamalas deńgeıde baǵalanyp otyr.
Noýtbýk dıagonali 13 dıýımden kishi, shamamen 12,9 dıýımdik dıspleıge ıe bolady dep boljanýda. Qurylǵy metall korpýsta shyǵarylady, plastık qoldanýdan kompanııa bas tartqan. Onyń ornyna Apple alıýmınıı korpýsty jyldamyraq ári únemdi óndirýge múmkindik beretin jańa tehnologııany ázirlegen. Bul tásil qazirgi MacBook Air jáne MacBook Pro modelderine qaraǵanda tıimdirek bolmaq.
Sonymen qatar tús gammasyna erekshe kóńil bólingen. Synaq aıasynda ashyq sary, ashyq jasyl, kógildir, qyzǵylt, kúmis jáne qoıý sur túster qarastyrylýda.
Qurylǵynyń boljamdy bastapqy baǵasy shamamen 699 AQSh dollaryn quraýy múmkin. Bul 999 dollar turatyn bazalyq MacBook Air nusqasynan aıtarlyqtaı arzan.
Apple 4 naýryzda qandaı jańalyqtar usynatynyn myna siltemeden oqyńyz.